¹ Embuke yo shendi ñora, Teofiresi, iamba zonshe e zitendo ne ntuto za Jesu, ² kutwara ezyuba elyo na hindiwa ku wiru. Ezi kazi tendendara shana mani o kuha o murao ko Ruho ru Chenete kuba apositola bakwe abo na keta. ³ Mu mashara e shando lyakwe, na lireta kwabo na hara ne zisupo ezingi zi sunda bulyaho. Ka mazyuba a likana makumi o ne na libonahaza kwabo, mi kenahwa amba zo ku amana no mubuso wa Nyambe. ⁴ Aha kena hantu honke nabo, na ba raera ye bareke o kuzwa mwa Jerusalema, kono ba lindire e nsepiso Yeshi, ka bulyaho, aku bata ye "Nimwa shuwa kwangu ⁵ ye Johani ke niti ka kolobeza ka menji, kono mura korobezwa ko Ruho ru Chenete mu mazyuba machenya." ⁶ Aha ka bena hantu honke mpaho shiba mubuza, Nfumu, eyi nje nako no booze o mubuso wa Isilaere?" ⁷ Aku bata ye, "Oku taye muzyibe e nako kapa e myaka kali nzenu kuta ye muzyibe eyo na toma Tata ko bubusi bwakwe." ⁸ Kono mura tambura maata, o Ruho ru Chnete aho neru kezye kwenu, mi mura ba e mpanki zangu mwa Jerusalema nimwa nimwa Judea yonshe ne Samaria, noku ma manikizo efasi." ⁹ Nfumu Jesu aha sha mana oku ambe zo zintu, aha kaba tonderere ku wiru, aku nanunwa mwi wiru, e zyoba lyo kezya ku mubwika mu mensho abo. ¹⁰ Aha kaba tonderere bulyaho ku wiru aho ka kaya, haho bulyo, aba kwame bo bire abo kaba zwesi zo kutuba bo kezya ku zyimana nabo. Bo kuta ye, ¹¹ '' Enwe bakwame ba Galileya, chinji mu zyimanine hanu nemu dunine bulyaho ku wiru? Jesu zyuzyu na yendi ku wiru nara ka boora hape ke njire yo ifwana ne yiyi mwa muboni na yendi kayo ku wiru.'' ¹² Mpaho shiba ka boora mwa Jerusalema o kazwa kwi Rundu lye zishamu za Olive, aha fwihi ne Jerusalema, nduyendo rwe zyuba mukatumbi lya rwe Nsabata. ¹³ Aha shiba ka hura, boku lizya kuya mwi njuo yoku wiru, omu kaba karanga. Ka mwina Pitorosi, Johani, Jakobo, Andulu, Filipi, Tomasi, Batolomi, Mateu, Jakobo mwana wa Alufiusi, Simoni womu Zeloti, ne Judasi mwana wa Jakobo. ¹⁴ Bonshe kaba shangene kube chintu chonke, noku zwira ha buso oku goresa mwi ntapero. Oku weza ho ka kwina bakentu, Maliya nyina wa Jesu ni ba nchiye. ¹⁵ Mwawo mazyuba Pitorosi na zyimana mukati ka bayenze, kaba likana e kumi lye kumi na makumi obire, mi akuta ye, ¹⁶ ''Bayawe, nkwa butokwa ye a mañoro ahure haku bumbilizwa, okuta ye o Ruho ru Chenete oro nirwa ambiwa kantanzi ko muromo wa Davida oku amana ne Judasi, ozyo ka hitire abo niba shimina Jesu. ¹⁷ Mi kali zyumwi wetu mi na tambura e nkaruro yakwe kubo mupuzo wakwe mowu mutendo wetu.'' ¹⁸ (Ozyu mukwame na ura ewa nke ntuwero zo bubbi bwakwe, mi na tatika oka wisa mutwi, noku bbwahuka o mubili, mi e mira yakwe yonshe niya chukuka mo. ¹⁹ Ezi zintu niba zi shuwa bonshe abo ba hara mwa Jerusalema, boku ulika elyo wa mu mushobo wabo ye, ''Akeludama'', eyo i toroka ye, ''Ewa lya Maroha.'') ²⁰ Ka bulyaho ku ñoretwa mwi Mbuka ya Lisamu, 'Mu reke ewa lyakwe li sinyiwe, mi mwasha rekereli omuntu nanga ye nke ye a hare mo; 'muhe ungi e chibaka chakwe cho buyendesi.' ²¹ Ku oreseka, okuba ye, zyuzyo mukwame yenke ozyo katu sindikizanga e nako yonshe o Nfumu Jesu aha kena neswe noku yendaura mukati ketu, ²² ku tatika kwi nkorobezo ya Johani ku twara e zyuba elyo na hindiwa kuzwa kwetu, i swanera oku ba o bupaki ni kwetu oku amana noku buka kwakwe.'' ²³ Boku reta ku buso aba kwame bo bire, Josefa ozyo kaba kuwa ye ndi Bbarasabasi, ozyo niba ha e zina lya Jasitasi, ne Matiyasi. ²⁴ Niba rapera nibata ye, ''Ewe, Nfumu, ozyi myozo ya bantu bonshe, mi otu sunde oku taye ndini kwa ba bantu ozyo niwa keta ²⁵ oku hinda e chisa mo unu mutendo no bu apositola obo na nyansa Judasi noku ya ku chibaka echo kachi muswanera.'' ²⁶ Mi boku buka enshanga zabo; e nshanga zoku sundika matiyasi mi na balirwa ku ba apositola abo kaba likana e kumi ni yenke.