¹ Pitorosi, omu apositora wa Jeso Kiresite, kubazazi bo bokure, bashalitwa, monshe mwa Pontasi, Galatiya, Kapadosiya, Asiya, ne Bitiniya. ² Eyi iya ke nzunu ya matatikizo ya Nyambe Shwetu, ibikitwa kumbali ko Ruho roku kuteka noku hasa a maroha a Jeso Kiresite. Chishemo chibe nenwe, kame ne mpore yenu iyingihe. ³ Nyambe kame Shwetu wo Nfumu Jeso Kiresite awane e nfuyauzi. Muchishemo chakwe chinene, na tuha echibumbo echiya okutiye tu jobore ke nsepo. Oku kujobora itoloka okubuka kwa Jeso Kiresite kubafu. ⁴ Oku kujobora oku kali nakumane, kali naku kakatire kame kali nakumane. Ku bikirwe enwe mwi wuru. ⁵ Mubabarerwa kwa Nyambe ke ngamu ze ntumero, noku hazwa kukere ko oko naku zyibahazwe kuma maninikizo enako. ⁶ Muli tembete kezi, nanga kube ye koshuwi oku choka mozyo mwinjira zingi ze seheko. ⁷ Ye entumero yenu ibonahare, endotu hawa kuhita e gauda imana, nanga niya yerekwa ku muliro. Eyi itendahara okutiye ye ntumero yenu neiwaniwe neiha entumbo, tubo, nekute lyoku zyibahaza Jeso Kiresite. ⁸ Ka mushini ku mubona, kono mumushaka. Mwaazya ku mubwene hanu, kono muzumina kwakwe kame mulitembete hawa ne mboterwa kai ambiwa. ⁹ Shemukwesi mutambura e nepo ze ntumero, yoku hazwa ko muzya wenu. ¹⁰ Aba polofita neba shakashaka noku buza nenja zoku hazwa, ze chishemo echo nachibe chenu. ¹¹ Niba shakashaka kuzyiba zozyo kame ne nako yo Ruho rwa Kiresite karwina kwabo naho karu amba kwabo. Ezi kazi tendahara aho kaba sumwina ku matatikizo ze seheko lya Kiresite ne tubo ye zintu. ¹² Niza boniswa kwabo ye kali mbabo bulyo, kono, aho niba amba ezintu ezo niza ambwa kwenu mbabo kaba kutaza ezywi lya Nyambe kwenu ko Ruho ru chenete ruzwa kwi wiru - ne zintu ezo Mangiroi ashaka kuba nezo. ¹³ Cware mulishumine munyonga oku shuwisisa kwenu. Mulikuteke. Mubike ensepo mu chishemo echo namuhewa choku sunda Jeso Kiresite. ¹⁴ Ka bana bena ekute, mwasha libiki kwi ntakazo eyo kamu chilile hena kamushini kuzyiba. ¹⁵ Shina ozyo na mikuwa a chena, nenwe, muchene mu mukaliro wenu. ¹⁶ Shina omo kuñorerwa, "Muchene, kakuli eme ndi chena." ¹⁷ Heba namu kuwa "Shwetu" ozyo a atula nikwaazya e nketururo kokuya kezitendo zo muntu no muntu, muyende munjira yenu namu tiite aho mushina hanshi. ¹⁸ Muzyi ye kali ke chilivera kapa egauda eyo nimwa hazwa kayo izwa kuzo mukaliro wo busiru ezo nimwa lizyiya kube shwenu. ¹⁹ Kono, nimwa hazwa ka maroha a marotu a Kiresite, ozyo kafwana mbwe nji ngu yaazya echintu cibbi ne cibbata. ²⁰ Kiresite na ketiwa habuso bwe chizyimo che fasi, kono hanu na boniswa kwenu mu mazyuba a maninikizo. ²¹ Kakwe muzumina kwa Nyambe, ozyo namubusa kubafu oko nahewa e tubo okutiye e ntumero yenu ne nsepo zibe kwa Nyambe. ²² Nimwa tenda o muzya wenu koku kuteka e niti. Ezi nzokutiye mulishake ke lato lyo bundambo, cware mulishake hawa kuzwila ku mozyo. ²³ Nimwa pakwa hape, kali mwi mbuto ifwa, kono mwi mbuto kaifwi, kezywi lihara lisiyalire lya Nyambe. ²⁴ Kakuli o muntu a fwana e sozu, kame ne tubo yakwe ifwana e mpalisa ye sozu. E sozu lizyuma, kame e mpalisa iwa ko, ²⁵ kono ezywi lya Nyambe lisiyara bulyaho kutwala oko," Eyi nje mbuzi endotu eyo nimwa sumwinwa.