(Yesus Te Tonai Pondena Ate Boyewe) 1 Paska ya pelre piyeu ya te mekoyaina, ya beselrei bene nemenane, Imam-imam belrengka, taurat tepaina pelre ate tuwayalne. Yesus te kelronaina pelre nete baite tonai pende nate a peu-peu kalrona a te boyowe. 2 Da yana mekandena nelro na mikoipainya, Detelro telreng bulruna a te dumbon de. (Yesus Narwastu Bute Kelraimbuko) 3 Nepelrna Yesus betania meke nekeyowe, Simon si kusta kena mie ne ane nekeyowe, sa te aneyowe, Milre simbei ongkoi ne pelrto pelrna narwastu bu te daku meyowe, ne bupe nai te mekaina yalre dopelre ne mekaina, Ne ongkoi te baiteu besepuku, neaina tu te Yesus kena berengka suyoune. 4 Nepna detelro nikiyai na kembeng te bitiyai si ye si pelre a te suruyaine, di Narwastu bu beatena te di mane nemena kalro ne dilri we? 5 Di Narwastu pe do mebe mesina dinar nai te mekou powe ye sa ambai na detelro te wasemulre, Ne milre te a peko-peko saniayaine. 6 Nemenena Yesus mete a saniounu, nepene tenembombe netena biamena te neteaiye senaune! Dina mekowena pe de tena kembalri ppoi te mekounu. 7 Sa ambai nya detelro ppe weye nekau na nelro ne kaina, netenape wema kaso pelrma delrati yasenembe. De-ye peda wembelre ne nemna monate nikipai. 8 Ne nei kembalri mekowe na nepene mekonde mekonwe. De-ye na Eu pe, pelrlo pelrna bu nepe kotupuko, nenape de-te ambulru ye sanaitsine. 9 Telre pelre telrena, kite wete senamalre, da alru tema kelrimbuna da A te neme elrnai maiye. De mekoyeuwe kembalri nena eudo elrnainai. (Yudas Mendote Mekayoiye) 10 Yudas Iskariot youwe, ne-ye pe mebe suna be pelre yau-yau nelro takumelre walri yai na do simbei, Ne A sena semate nekaye na belreng ka kote youwe Yesus nena me bulra te salrnemponde. 11 Ne ate betai pekona kenakalri te koyaiya mesau te bekaipeko nete doi te inailre nena senaimbeiko. Nepelrna kaya neye nipi duweyowe Yesus te nai te mekom bondena te walreyouwe. (Yesus Nengi Oto Tauna Pelre Paska Sa Te Aniyaiye) 12 Bei tena yane piyeu te eni yai nayane. Neyana yau sa te ane naina domba te pelro yaiye, Yesus nenei oto tou naye nete simiyaine. Nau te kelri pou ne nenou te malre. We tena yausa te nepene mekomanelre? 13 Nepelrna nenei oto touna do beslrei sanumpuko nepelna a lati titau peko, " yo delre te epe nepena ditelro simbei bu te eingkon dondu mendena tupeipena" nete taunepe! 14 Ne me te esu teepe, ne mie na detelro te sanupope, kilri-kilri na ate sanumpuko na memena deko ne delrei oto toana pelre nepena yau sa teane malre. 15 Nepelrna kaye bulrane deko delrete kelrinimpone nepena yau sa malre ane malre, Ne deko sasi-sasi metelre mane nepependelr peko. 16 Wande ototou na do be oto te yoiye Yesus kena elriyowe mane, nepene kaiye yau sate anenai sate pendalryaye. 17 Ne deneyene Yesus ne oto tou na mebe-be selreina nembei meyaiye. 18 Nepene miki yaiye sa te ani yaiye, "Yesus a te kiampeko" De- ye wetena ate kiya pene santemelrewe na nelro na detelro simbei. De te peko nelrolre salrnete pone, ne- ye pe nembelre sate nembei anende. 19 Ne you-you na si nikiyaina kena bece-bese tayaiye si ye si te simenu "Tuhan de-pe ambai?" 20 Nena a te dombuko, Ne detelro pe da yau-yau nelro ne mebe be selrei melre walrandena nelrona, ne detelro pe dembelro piyeu te eingkon ei da titawende. Da a yeko nekewena semo ne melraipeko na mane. 21 Detelro yei nenei nou kote nekou te ende. Nemane detelrati semeye detelro yeite salrpukona ne detelro puaring pelre donde. Piambai telre nemeno detelro teni senopainya. (Yau Sa Te Deneye Aniyaiye) 22 Nepelrna Yesus nenei oto tou na pelre sateaniyaiye, Yesus piyeu tedoku "a foi te sanumbuko", piyeu te kaye-kaye teleayouwe nete waseyoumene kaye nete A te saniyoume, "Douwe, dana pe delreu Eu." 23 Nepelrna kaiye boiteu teduku,"nena kena bise-tena a sanumbuko", nepelrna ne boiteu na morlna bu te nembei aniyaiye, 24 A te saniyoume. Dana pe delreisa, da sa yeko pelre nekewena, metelrna detelro tena te delrinde. 25 Dena a te betombombe, telre pelre telre de-pe da anggut bu tena de nekou tena pelre de anisipai yambei ne wane anisitelre, nena pe manimpa na mangwalri kena Yone. 26 Walri dimi semo dimai peko na kaye Zaitun meko te yaye. (Nenei Ototounayo Yesus Nete Tenaimbone) 27 Yesus nete wake a te saneyoume we-pe metelrna, mane wena telrepelre telre titeinsiade, semone damane melraipeko. De ye pe marisa semana detelro te toteponde, domba-domba ye kelra-kelra takonde. 28 Nepelrna nekoute deiyeteponde, de-ye Galilea te memete telre. 29 Petrus a te tapeke "Ne-pe metelrna mane nena telrepelre titeinaikonde" Deye ambai 30 Neperna Yesus nete a saniyoune we-te senawalrna pe, dayane, dadenyeyena Yesus nete a saniyoune we-te senawalrna pe, dayane, da denye ye ne awe da be selrei ne di pai nyane. 31 Petrus delre po te neme elri youye, telre pelre a ne saukalre, we-ye tonai pona de-ye delrati baite tenonaite ponde. Ne-pe nikiyai na metelrna mane nemane a mo te saukaye. (Yesus Getsemani Emine) 32 Nou simbei te muayai ne nou eiko Getsemani, nei murid-murid te saneyome, "nekembe mendona ate elre tlre." 33 Petrus, Yakobus, Yohanes pelre yatekemlre yai, pe endiki pelrentuku kena endung titeiyama. 34 Nete sanuyome, "dimi kena mane tuanelre" tete tepone mane, danou mone nekembe sema-sema pelre nekembe." 35 Ne bebete bete nekusuku, kane bulrate eu te kengkenelre ko nepelre kenana ate elre yowe, da sea te (deneulre) baite nende. 36 Ne ate dombuku "Ya Abba" ya' memai mai dateute baite doime neme nasa dena kenalrena ambei, wei a bulra molre. 37 Ne nekote blrusuku meyowe tekemelre nedo namin kute tenaipeko Simon, Petrus te Sanuyonu wekai kute tenoyau we? Sambeimena sema, we kai nikipai? 38 Sema eine nekembe nepelre, kenalrena a eine nekembe, netenate wapi-wapi eite toplripai, yambu petenunelre, kena endeng wake ambai. 39 Nekoute lari blrusuku yowe, ne a mendo lati te meke samuyonu. 40 Nekoute lati belrusuku meyowe, tekemelre ku te dina plro-plro telre tenaipeko, dou se doplret tuwayane, ne nimeipai beya ate nete senamboue. 41 Da namin tena te blrusuku meyowe, sanuyome, kute tenombe nepelre note yembe, ne su nepe meyowe tenembe, detlro yeute, detlro peko kena mebulrate inaimlre. 42 Esuyemibong, malre dete neyo kena me bulra te sablrembone na delro nepe noupeyeto.(Yesus Te Kelroukai) 43 Yesus ate neme elriyowena selreine, Yudas meyowe tekambuko, ne mebe sibe pelrena murid-murid, ne detelro telreme muyaiye, metekaye opoye atekoi mu yaiye, Imam-imam belrengka ahli taurat do dasina senaimpeko miyaiye. 44 Nemblre inimelrena sanuyomu bete sentembona detelro, ne nepe, nete kelrombe, poi dowembe embe. 45 Nenoute nepe yainakai ne beteyowe Yesus tu tupeye kenelre sanuyone, "Rabi!" Wunda bete senembuko. 46 Yesus te mehe doukeinelre wena nete kelrou iye. 47 Detelro simbei nena nelrona meteka te daupuko belrengka bulrate tapeyoye Imam (delre kena kembalri detelro kena buntekei te beite melrombuko/ 48 Yesus sanuyomu, wepasuku depe bisi detelro, metekaye opye dunambuko miyau de te kelroutembena? 49 De, ya yunu-yunu wena nelrone kilramalre, Mang Walri kena miena, we detena kilraipai, netenate asna walrini melraipeko nepelre asra walri youmbonete. 50 Nei murid-murid nete taimbeko, nei eu walru te seipeko. 51 Nedaine do sekelro mbei Yesus takumulre mayong lenan belra te, nei eu te plrebuko taukenelre, nete nai krounaina te. 52 Nena mayong belra at delreke eu melro-melro dite tengkuyowe. (Yahudi Berengka Yesus Kena Atetiyaye) 53 Yesus te deukainelre Imam delrekena bekoute yaye Imam-Imam kelreka, detelro sena nepelre ahliTaurat nepene koplriyonu. 54 Petrus, nete bailre takumelre yaye, Esu te yowe Imam delre kena mie bekoune, kembalri detelroo sing te kelraimbeko netekumlre nepene tipiyaye. 55 Imam-imam belrengka nepelre metelrena Mahkamah Agama kerai detelro te simaimbeko Yesus te a sete tenebone nete, baite tanaipone, nemena detelro te tupai pai. 56 Detelro telreng miyai aupeuna atelre yai ne a elri yaine sipelr-sipelrena yuupai. 57 Detelro meselreimbei bulrate yaye nena akelrai a peu-peuna te miyaye elri yaye. 58 We, da detelro elrayowena, betapuko Mang Walri kena da mie, me melrapukona te baite kilreteppone. Ya naming meno nekoute melro tepone, detelro kena (melra na ambai) me semona ambai. 59 Da a kalro me nena a sipelre-sipelre yaupai. 60 A nelrone Imam delre esuyemuku tepeyowe Yesus te si simeyone wekai atena sauwipai, we bulra te a site-site dimana di elrai. 61 Ne a mena sauwipai Imam delro nekote simeyonu beyamane wekai Mesias. Walri kena yei? 62 Yesus ate saku, de nepe nepelre we tenembe detelro yei, mang Walri kena me telre mesune nekende ma nelro bulra metelre. 63 Nepelre, mayongte bisiyaye, Imam delre ate elreyowe, beyatenate, men adelrote nekenoute duwemalre? 64 We betaupuko nena a peko Mang Walri te sanuyoonu, wena mendelrena beyamane? Ne a bmei te doukaiye, da detlre baite toma pone. 65 Detelro si nete eki toyaine doute me pelraimbeko me duka peniayai saneyani nabi bei domboi. Nepelre, nei kebabu detelro me piniayai. (Petrus, Yesus Te Bukunsuku) 66 Ne su selrei, Petrus mee diane, milre si meyowe, Imam delre kena kembalro melre. 67 Nekai ne milre Petrus te tembuko, esu tepeyoye nena bete tekenelre sanuyonu, we da Yesus Nasaret detelro pelre nembe welrauna. 68 Nepere Petrus bukun suku sanuyonu De ne mupai nepelre alroipai we beya ate elrauwe wande, ne mie mautu te yowe nepelre awe do ate mekopuko. 69 Ne kembalri milre, Petrus te nekou te tekenelre ne pelre detelro telrem tipiyainate sanu yomu, "Da detelro mbei ne nelrona. 70 Nemane lari nekaye nenekoute bukunsuku nepelre, tikimbawyaka, detelro tipiyana Petrus te nekoute saniyae, we nepe simbei ne nelro na we nepe Galiela detelro. 71 Wande a peko te elre yowe, we ate elrau detelro de nimeipai. 72 Netelru awe do da betena te mekopuko nepelre, Petrus mendo te meko yonu Yesus dina sanumbuku, cewe da betena mekoipanya selreine, we selrei dete bukun suke, wande Petrus dimitena titau pai.