Pasal 28

Walriyei Depuko

1 Sabat nepelrenakaye, ye manimba beseyowenane, ne minggune Maria Magdalena pelre Maria sipelre bulre bulrate yaye doute tenaimbonde nate. 2 Nepelre, tiyaye kani delre telre dalre yomuna, nepelre malaikat Tuhan walri yolre ate meyowe, nepelre ne olrute bulrunsuku. Nepelre ne nebulrane nekeyowe. 3 Nena be elri tena mane yateyonu, nepelre nena mayon kelreu-kelreu wau tena mane. 4 Nepelre, ne nete enadikite dekaikeko, semapelre tipiyayena yo titeyaikeko nepelre detelro neotemane. 5 Nemenakaye, nena malaikat ne milre-milrete sameyomu. Endikitena dikoipainya. De nimeyembukalrena we Yesus salibne bepai pekonate duwewu. 6 Ne dapena ambai. Ne nepe deyepuko. Nena ne dina saneyomu. Membe, nembelre tenoyowena noute tenembombe. 7 Selraimote embe nena ototounate senemembe ne dina deyepuko. Ne detelro soweyowena nelrolre dina deyepuko, nepelre tembe ne Galilea te memetelrete embe. Dipune, we netelati tenembombe. Tenembe, de wete dina saniyamalre. 8 Nepelre, ne selrai-selrai mote bulrete taimbeko, indikite dekaikeko, nepelre kalrite koyaye, tenuyaye ne ate nena ototounate saniyaime. 9 Nemenakaye, tiyae Yesus nete kote miyaye nakaye saneyoumu, "Pooi" nepelre ne Yesus nete tupeykemelre nena otote kelroukaye nepelre nate belrengakye (sesoye) tupuyanye. 10 Nemenakaye, Yesus nete ate saneyoumu, " Endikite dekoipainya : Embe dena dokekate sanemembe Galileate aye, nepene ne dete tenai telre.

Bulre Sema Nikiyayena Sente Mekai Peko Ate Anepelrenaipondenate
11 Ne suselrei ne yaye, sema pelre nikiyayena detelro kote yaye, nepelre atung semana detelrote saniyaime nekalro mekopukonate. 12 Nemenakaye, nete dasi-dasina detelro pelre nembeye kopraimepeko. Ate tiyayena kaye, ne doi dopelrete dasi-dasina detelrote yatiyaime. 13 Nemenakaye, elriyoye, "Elrembe, Yesus kena ototouna deneye miyaye, de kute neme tenoyandenane ditesewaipeko. 14 Da kalrote Gubernur betombondena de nete telrepelrete elremaponde nepelre wetena poitena elripaiye. 15 Nepelrenakaye ne nedorite yataipekonakaye, ne dina sani kilri yaimena mane mekoyaye, nepelre ne a saniyai mena Yahudi detelro kena nelrolre meyowe menayate.
Yesus Kena Ate Sanemupuko
16 Nepelrenakaye, nena ototouna, mebe mbeipelre Galileate yaye, ne mekone Yesus nete dina sanmupuko. 17 Ne nete taimbeko, nete sesoyutupuyanye. Nepelre, detelro meselrei netena telre pelretena elripai. 18 Nepelrena kaye Yesus meyowenakaye nete saneyoumu, emukuna delrepo dete nepe iketelre, walri yona pelre yo bulrana pelre. 19 Netenate, embe nakaye emukuna bangsate ototouna mane mekombombe, nete bute kelromembe, memai kena eu done, nepelre yei, nepelre alru melro-melro kenalre. 20 Nete kilrimembe dena a saniyamalrenate betonaye, nepelre tembe, de wembelre nemena mote nekemalre ende kelra tute mekonde.