¹ Gudi'di si ngue Jesús yené Espiritu xti Diuxi laa lu yu nda' para guquiinde binidxába laa. ² Ora laabe biaanabe sin góbe pur chu'pa late gande dxí ne gueela, bindaana be. ³ Ni ruquiinde que beeda ne gudxi laabe: "Pa lii nacalu xiiñi Diuxi, gunii que ca guie di' gaca ca ni pan." ⁴ Peru Jesús bicábi ne gudxi laabe: "Cá lu gui'chi', 'CADI DE PAN SI NGA SABANI HOMBRE, SINU QUE DE GUIRA DIIDXA NI RIREE RUAA DIUXI.'" ⁵ Gudi'di si ngue binidxába yene laabe ra guidxi nandxo' ne bizuhuaa laabe ra jma lugia' de yu'du' qué, ⁶ ne gúdxi laabe: "Pa lii nga xiiñi Diuxi, guyubi de xaguete cá, purti ca' lu gui'chi': 'DIUXI ZUSEENDA CA ÁNGEL XTI PARA GAPÁ LII,' ne, 'ZANDISACABE LII LU NÁ' CABE, TI ZACÁ QUE IRENDA ÑEELU LU GUIE'" ⁷ NE ZAQUECA JESUS GUDXI LAABE: "'QUE SUQUIINDELU XPIXUAANA NU' DIUXI XTINU.'"

⁸ Ne xti tiru, binidxaba yene laabe ra ti nasoo ne bilui' laabe guira guidxi ro' xti guidxilayu ne guira guenda sicarú xti ca ní. ⁹ Laabe gudxibe laa: "guira xixe ndi' zudiee lii, pa usuxibilu xa ñee, ne usizacalu naa." ¹⁰ Ora que Jesús gudxi laabe: "¡biree de rari', Binidxába! Purti ca lu xqui'chi' Diuxi: ZUSISACA LU' XPIXUAANALU DIUXI NE LAA SI NGA ZUZUUBALU XTIIDXA.'" ¹¹ Ora que ru' bisaana binidxába laabe, ne ora que, beeda ca angel ne bidiica ni gudó be.

¹² Ora Jesús binadiaga de que gunaazecabe Juan, biguetabe Galilea. ¹³ Bireebe de Nazaret ne yebi'be Capernaúm, ni nuu gaxha de nisado' xti Galilea, ra uléza ca ni zá de Zabulón ne Neftalí. ¹⁴ Ne ndi' úca ti ma gáca casi guni' profeta Isaias ra ná: ¹⁷ De dxiqué Jesús bizulú bisiidi ne cana ni': "La guinaba Diuxi ulá laatu, purti xquendaruni mandar Diuxi ma bidxiiña gaxha."

¹⁸ Laga sizábe uria nisado' xti Galilea, biiyabe chupa hombre bi'chica', Simón ni lá Pedru, ne bi'chibe Andrés, cundaaca' ti chin ndaani nisado', purti binni rie guuze' laacabe. ¹⁹ Jesús gudxi laacabe: "La ta' ne la sá nanda naa, ne naa zune laatu binni ni rinaaze' hombre." ²⁰ Ne nagueenda ca' bisaanacabe ca chin xticabe ne sinandacabe laabe.

²¹ Laga ziree Jesús de raque laabe biiyabe xupa bi'chi', Jacobo xiiñi Zebedeu, ne Juan, bi'chi'. Laacabe suhua cabe ndaani canua cue bixhozecabe, Zebedeu; laacabe caguibacabe ca chin xti cabe. Laabe bicáridxibe laaca, ²² ne naguenda bisaanaca canua qué, ne bixoze ca', ne uzanandaca laabe.

²³ Jesús guzá ira ladu ndaani Galilea, ne cana gusiidibe ndaani ca sinagoga xti ca'. Cana guchechebe xtiidxa ra runi mandar Diuxi, cana gusiandabe guira xixe guendahuara ne ira xixe yuuba de lade ca binni qué. ²⁴ Bire'che ni cayuni Jesús interu naca Siria, ne binni canané ra nuube ira ca ni huara, ni ne yuuba pur dentru, ne ni cayuuba xcuerpu, ca ni nuu binidxaba laa, ni rudii ataque laa ne ca ni ma qui rizá. Ne Jesús cusiánda laaca. ²⁵ Xtale binni zinanda laabe de Galilea, Decápolis, Jerusalén, Judea, ne jma cherica de gui'gu' Jordán.