¹ Gan enɛ mɛ kɔsu elodu se yesu e nuwiwa lɛ. e mɔ lɔ na e devi lɛ fan: ² jaan yehwesin lɛ na emɛ tɔ lɔ nɛ, efɔn ɖe mɛkuku lɛ mɛ, eyi e wanu elo ɖo hinhlɔn mɔ nɔ nu lɛ jlɛ tɔn. ³ ɖo elodu yi e nɔvi filipu esi exe e ylɔ fan elodiadi ɔ yi ɖe. ⁴ jaan mɔ lɔ ni fan: esɛn lɔ o na gbe wi fan nɔ ɖee. ixo enɛ exe jaan lɔ ni ɔ eyi e zɔn e mɔ wli mɔ blɛ, ⁵ mɔ ze do gan kpa mɛ. enɔ din a hui ɖo e nɔ cuɔ na togun ɔ. ɖo togun ɔ mɔ jean lo mɔ gbeyi lɔ mawu etɔn. ⁶ Gbelokpo mɔ wa elodu mɔ nɔ ɖu e jigbezan. elodiadi e vi tugbejɛ mɔ la ɖuwe mɛjlo lɛ e unkɔn iwe exe eɖu ɔ jɛ elodu nukun. ⁷ e mɔ dakpa na tugbejɛ ɔ mɔ tanu deji fan: e biɔ inu lele kpokpoe ɔ eyɛ la ni. ⁸ Ivi lɔ e nɔ mɔ kplɔn nu wi fan: biɔ jaan yehwesinlɛnaemɛtɔ lɔ e takun do gannu gbɛjɛ mɛ ɖe xie trolo tɛn. ⁹ exe vi ɔ lɔ etɔnɛ na ga ɔ owu kui, vɔ exe mɔ dakpa mɔ tanu deji ɖe mɛjlo lɛ okun mɛ ɔ, ena gbe fan nɛ bayi do etɔnɛ. ¹⁰ E ɖo mɛ lo xlan fan nɛ la gbotakun na jaan ɖe gan kpamɛ lo wa ni. ¹¹ e mɔ sɔn la gbo jaan e takun do gannu gbɛjɛ mɛ lowa na tugbejɛ ɔ. emɔ la yi na enɛ. ¹² Jaan e awhanvi lɛ mɔ wa we cɔ cuɔ mɔ la ɖi mɔ la lɔ inu exe jɔ ɔ na yesu. ¹³ Exe yesu se xo enɛ ɔ, e lɛ ɖe xinɛ emɔ biɛ tɔji hun mɛ mɔ sɔn xie mɛti go ɖe e. exe ahwan lɔ se ixo enɛ ɔ, mɛ lɛ ɛ lɛ ɖe xilɛ mɔ zɔn ofɔ lo jɛ egun. ¹⁴ yesu mɔ nɔ te ɖe ounkɔn nɛ mɔ mɔ awhan susu ye nu mɔ ɖu dɔnu ni e mɔ gbɔ ozɔn nɛ. ¹⁵ Exe hwedo wa ɔ, ahwan lɛ wa ekɛ mɔ lɔ ni fan: zogbeji eyi ewa xie, gan mɛ mɔ nɔ nya. nya mɛlɛ lo hlan ye to lɛ mɛ. mɔ tɛn kpego lo la xɔ nuɖuɖu. ¹⁶ Vɔ ɔ, yesu mɔ lɔ nɛ fan: ye o ɖo a sɔn e. ¹⁷ miɛ tete lɛ mi na nuɖuɖu wi nɛ ɖu. ¹⁸ e mɔ lɔ ni fan, kpɔnɔ otɔn gɔ ihwe owe jɛn mi mɔ ɖo ɖe xie. yesu fan mi bɛ lowa na. ¹⁹ Yesu mɔ lɔna ahwan lɔ fan nɛ si nɔ gbehan ji. e mɔ yi kpɔnɔ otɔn gɔ ihwe owe lɛ mɔ kpɔn jihwle mɔ dekpɛ na etɔ, ²⁰ e mɔ na ahwan ɔ lɛ. ye ɖu gbɔn ogo mɔ ji i. ²¹ e mɔ gɔ kpo kpɔnɔ jaxwi owi owe jijwɔ. emɛ exe ɖunu ɔ lɛ sɔn gbɛtɔ afatɔn donu atɔɔn isru, nyɔnsi gɔ vikpɛvu. ²² jlokpo e ɔ e biɛ tɔji humɛ gɔ ahwanvu lɛ nɛ lo jɛ egun lo sɔn ada ɖe. exe yesu lo yan mɛlɛ lo hlan osin ɔ, ela yla iso ji alo xo iɖɛ. ²³ exe hwedo we ɖo ɔ, e yɔ lokpo nɔ ɖe xi nɛ. ²⁴ vɔ ɔ tɔji hun lɔ mɔ sɛ lo sɔn xumɛ exulɔ mɔ gba dego ɖo ixu lɔ nɔ kpe jɛhɔn. ²⁵ Bɛɖe gan otɔn lo sɔn gan atrokpo finfɔn mɛ etɔnɛ ɔ yesu zɔn zɔnlin zɔn ixu ji lo o sɔn e kɛ. ²⁶ exe e ahwanvi lɛ mɔ ɛn kɛn e nɔ zɔnzɔn lin zɔn sinji ɔ, ye ayi gbado ye mɔ lɔ ²⁷ fan: inu we mi nɔ kpe we ye mɔ nɔ cuɔ gɔ abobo. yesu mɔlɔnɛ fan mikpăn okɔ, nyɔ nɛ mi ma cuɔ e ²⁸ Piyɛ mɔ lɔ ni fan: aklunɔ nɛ oyɔ nɛ ɔ, ɖe gbe na nyɔ fe na zɔnzɔnlin zɔn esin lɔ ji mɔ wa ike. ²⁹ yesu fan wa, piyɛ mɔ tɔn ɖe tɔji hunɔmɛ mɔ nɔ zɔn zɔn li zɔn ixu ɔ ji a lo sɔn yesu kɛ. ³⁰ vɔ ɔ exe piyɛ mɔ jɛhɔn xo ɔ, cicuɔ hui emɔ bɛ sisiɔ do sin ɔ mɛ mɔ do abobo fan: hwlɛn un gan aklunɔ. ³¹ Jlopkoe ɔ yesu mɔ na olɔ piyɛ mɔ lɔ ni fan: nuɖiɖi vitin nɔ a mutu olo bu nu kpɔ? ³² exe piyɛ gɔ yesu lo biɛ tɔji hunɔ mɛ ɔ, jɛhɔn lɔ nɔ te. ahwanvi exe ɖe tɔjihunɔ mɛ lɛ bɛ yesu kpikpɔn mɔ lɔ ³³ fan: ɖe xonugbo mɛ ɔ, mawu evi ewɛ. ³⁴ Exe elo jɛ ege ɔ, ejɛ genezalɛti e awlango ji. ³⁵ exe mɛ exe ɖe xinɛ lɛ mɔ fan yesu wa ɔ, ye ɖo iwɛn lo hlan ito lɛ mɛ. e mɔ hɛn mɛ exe nɔ jɛ ozɔn lɛ lowa. ³⁶ ye ɖe kuku ni fan ni gbɛ ɖolɔ ye ovɔn go. emɛ exe go edolɔ lɛ tɛtɛ mɔ ozɔn hɛn gbɔ.