¹ Yesu ylɔ e ahwavu owi-owe lɛ bɔ, mɔ na acɛ wi, nɛ lo nya gbigbɔ nyinyla lɛ, ozɔn lɛ tɛtɛ, gɔ do wɔnglezɔn lɛ tɛtɛ. ² Mɛɖolohlan owi-owe lɛɛ we. Tantɛntɔn e wa Sinmɔ exe e yɔ fan Piyɛ gɔ e nɔ ni Andle fe, Zebede evi lɛ, Jaki gɔ Jan fe; ³ Filipu gɔ doBatelemi fe, Tɔma gɔ Matye, toxwa yi tɔ lɔ; Jaki Alifɛ e vi lɔ, gɔ Tade fe; ⁴ Sinmɔ hunjɛdotojitɔ, JUdasi Isikalyɔti exe sa Yesu ɔ. ⁵ Ɛyɛ mɛ owi-owe enɛ lɛ ɔ, Yesu ɖo e lo hlan mɔ kplănnu wi fan: Mi ma sɔn ɛmɛ exe go wa Jwifu lɛ kɛ e, mi ma byɛ Samalinu lɛ e tomɛ e; ⁶ Izrayɛlivi vikpɛlɛ exe ci ɖi kɛn lɛngbɔ bubu lɛ kɛ mi wa sɔn. ⁷ Mi jla lɔ fan xɔsuɖuɖu sɛxwetɔn ɔ mɔ sɛkpɔ. ⁸ Mi gɔ ozɔn na ozɔntɔ lɛ, mi fɔn ɛmɛ kuku lɛ, mi gɔ ozɔn na gudunɔ lɛ, mɔ na nɛ yi emɛ kinkɔn, mi nya gbigbɔ mawe lɛ. Exe i na acɛ wu mi vɔnu-vɔnu ɔ, miye lɛ fe ɔ mi bay nu tɛtɛ vɔnu. ⁹ Mi ma hɛn sika e, mi ma hɛn kpatagan e, mi ma hɛn ixwa e; ¹⁰ mi ma hɛn saki e, mi ma hɛn awu owe e, mi ma hɛn fɔkpa e, mi ma hɛn otin e he odɔnwatɔ lo wa idɔn e, ɖo idɔnwatɔ ɖo la ɖunu. ¹¹ Mi jɛ toxo gbo alo gletoxo lele mɛ ɔ, mi kan emɛ xe mi mɛjlo yiyi jɛ ɔ, e ta se. Mi mɔ sɔ ekɛ mɔ nɔ xinnɛ kaka lo jɛ gbe exe gbe mi wa lɛ do. ¹² Na mi byɛ osin lɔ mɛ ɔ, mi lɔ fan fifa ni nyi osin etɔn; ¹³ na osin lɔ jɛ na fifa, vɔ, e nyi fan e go ɖe etɔnɛ ɔ, mi mɔ gɔ lɛkɔ gɔdo mi fifa. ¹⁴ Na e go yi mi e alo e mɔ gbɛ mi xo sise ɖe osin lɔ mɛ alo toxo lɔ mɛ ɔ, mi tɔn ɖe osin lɔ mɛ, mɔ xuxu mi ofɔ e fifi lɔ lɛ. ¹⁵ Na lɔ xonugbo na mi: hwɛɖɔzangbe we kpe ɔ, e la bɔkun na Sodɔmu gɔdo Gomɔnu hu ito enɛ mɛ nu lɛ. ¹⁶ Tɛn ɔ, i ɖo mi lo hwlan, mi la ci ɖi kɛn lɛngbɔ exe ɖe ohla lɛ e cɛncɛn mɛ ha. Mi mɔ ɖo ayite ɖi idan mɔ ɖe, mi mɔ fa dɔmɛ ɖi hɔnnɛ mɔ ɖe. ¹⁷ Mi cɔ miɖe do gbɛtɔ lɛ go, ɖo e la wa mɔ dɔn mi zɔn gankpa lɛ mɛ, ma go ɖo oba na mi ɖe nukplɔnmɛ tɛnxwe lɛ; ¹⁸ e la we kplan mi lo sɔn, tomɛxo lɛ gɔ xɔsu lɛ e ŋukɔn, a lo nyi kunnuɖiɖe na nyɔ gɔ emɛ exe wa Jwifu lɛ gɔdo emɛ exe go wa Jwifu lɛ e unkɔn. ¹⁹ Vɔ, gan exe mɛ e wa wli nyɔ la na ɔ, mi ma jɛ tagba lo lɔ onu exe mi la lɔ alo mi la we lɔ tɔn e: onu e xe mi wa lɔ ɔ Mawu la yi do nugbɛn na mi ɖe ganxixo lɔ mɛ; ²⁰ ɖo e go wa miye lɛ tete e nɔ dan lɔ xo e, ɛye Untɔ etɔn e nɔ dan lɔ xo zɔn mi ji. ²¹ Nɔvi la yi e nɔvi i na e mɔ hui, Otɔ la jo evi e mɔ hui; ivi la fun gu do etɔ gɔ enɔ ji fan nɛ hui ni. ²² Mɛtɛtɛ la gbɛ wan na mi do ungo, emɛ exe wa do ji ɖe aya enɛ nukɔn kaka la fo ɔ, e la hwlɛngan. ²³ Na e do aya na mi ɖe toxo lele mɛ ɔ, mi si mɔ sɔn to bu mɛ. Na lɔ xonugbo na mi, mi la mɔ zɔn Izrayɛli toxo tɛtɛ bi mɛ feto nyɔ Gbɛtɔvi lɔ la wa. ²⁴ Inukplanvi ti go hugan wu e cica e, ken ke mɛsɛntɔ go hugan wu e Osintɔ e. ²⁵ Nɛ fan inukplanvi la kpego nyɔnu kaka mɔ sɔgbe gɔ e cica ɔ, e la jɔhun, alo ɛmɛsɛntɔ la we sɔgbe gɔdo e sintɔ ha ɔ, e la jɔhun. E nyi fan e yɔ osintɔ lɔ fan Bɛzebulu ɔ, amu kɛn e wa yɔ ɛmɛ exe ɖe osin lɔ mɛ lɛ! ²⁶ Mi ma cwɔ na gbɛtɔ lɛ e; ɖo nu exe enɔ bay ɖe nugun lɛ ɔ la we jɛ govɛ, ɖo nu ti go na nɔ onugun e. ²⁷ Ixo i lɔ na mi do ovo ɔ, mi lɔ na mɛ tɛtɛ ni se, onu exe e lɔ do tomɛ na mi ɔ, mi do axwa mɔ jla na emɛ lɛ. ²⁸ Mi ma cwɔ na emɛ exe hu agbaza gbɛ e go kpego la hu mi okla e; mi cwɔ na emɛ exe la kpego mɔ crɔ okla lɔ mɔ iyi agbaza lɔ i gblan do ozo mavɔmavɔ e do mɛ. ²⁹ Otinvu ɔ o ɖe oxwa ti ji e. E ɖe etɔnɛ co, lokpo etɔn go ku Mawu mɛvo e. ³⁰ Kaka lo jɛ iɖa exe ɖe takun na mi ɔ, Mawu nyɔ nɛmu exe enyi ɔ. ³¹ Enɛ wutu ɔ, mi ma cwɔ e: mi vɛ xwa hu gan wu otinvu ɛnɛ e susu. ³² E yi e wanu, emɛ exe wa lɔ ɖe emɛ lɛ e okun mɛ fan eyɛ nyi un ahwanvi ɔ, nyɔfe la ɖe kunnu ni-i ɖe Untɔ exe ɖe esɛxwɛ lɔ e unkɔn; ³³ vɔ na mɛ lele gbɛ ɖe gbɛtɔ lɛ e unkɔn fan ɛye go nyɔ le ɔ, nyɔfe la gbɛ ɛ ɖe Untɔ exe ɖe esɛxwɛ lɔ fan nyɔfe go nyɔ-ɛ le. ³⁴ Mi ma mɔ lo mɔ fan fifa i hɛn lo wa xwlango ji e lo; fifa gonɛ i hɛn lo wa e, vɔ iji i hɛn lo wa. ³⁵ Ɖo, i wa a lo do kinklan ivi oslun gɔ etɔ mɛ, ɖe vinɔ gɔ evi nyɔsi mɛ, ivisi gɔ esunɔ mɛ; ³⁶ gbɛtɔ e kintɔ lɛ mɔ we nyi ɛmɛ exe gɔdi ɖe sinmɛ lɛ. ³⁷ Emɛ exe yi wan na etɔ alo enɔ hugan hu nyɔ ɔ, emɛ enɛ go wa hun ahwavi e, alo emɛ exe la yi wan na evi oslun alo evi nyɔsi hugan hu nyɔ, o jɛ la nyi un ahwanvi e; ³⁸ Emɛ exe o ze atisoga etɔn mɔ xwedo le ɔ, e go wa un ahwanvi e. ³⁹ Emɛ exe da hwlɛn eyɔ tete e gbɛ gan ɔ, e gbɛ la bu di, vɔ emɛ exe da hɛn e gbɛ bu do un takun ɔ, e la mɔ e gbɛ. ⁴⁰ Emɛ exe e yi mi ɔ, e yi nyɔ tete fe, emɛ exe yi nyɔ e yi emɛ exe ɖo lo hwlan. ⁴¹ Emɛ exe yi oxoloɖawantɔ xojɔxotɔn ɔ, e la yi e ale, emɛ exe yi ɛmɛ jijwɛ ɔ e la gɔ yi ale emɛ jijwɛ tɔn. ⁴² Emɛ exe wa na esin fifa kɔfo lokpo kpoŋu wu vikpɛvu etɔha ɔ ɖo e nyi un ahwanvi ɔ, na lɔ xonugbo na mi, e go da di e ale gbɔ e.