¹ Pepano avanhu vooni avanya mwojo ghumo vakakong'hana pano pelefu piipi nu mulyango ghwa malenga mulikaaja ilya Yelusalemu. Vakansuma uEzra umulembi atwale ikitabu ikya ndaghilo sa Musa kino Unguluve alyavapeliile avaana va Isilaheli. ² Isiku ja kwanda ija mwesi ghwa lekela lubale, uEzra, untekesi akaluta, akatoola indaghilo akatwala pavulongolo palipugha lya vaghosi na va mama, na vavange vano vakapulikagha na kugadiliila. ³ Pe akavimbila indaghilo kuhuma palwakilo kuhanga kufika pamwisi, avaghosi nava mama, palikimo navano vakapulikagha na kugadilila vooni vakapulikisyagha vunofu ikitabu kya Ndaghilo.

⁴ Ghwope u Ezra akiima pa kidalikililo kilyatendilwe ni mbavo vwimila imbombo ijio. Palubale pa mwene valimile uMatithia, Shema, Anaya, Uria, Hilkia nu Maaseya, ava valimili ulubale ulwa kundio, ulubale ulwa kung'highi valimile uPedaya, uMisbaeli, uMalkiya, uHashumu, uHashbadani, uZekaria nu Meshulamu.

⁵ U Ezra akavalula ikitabu pamaaso gha vanhu vooni ulwakuva alimile pakidalikililo ye avalwive, avanhu vooni vakiima. ⁶ U Ezra akamongesia Unguluve, Unguluve um'baha neke avanhu voone vakagholosia amavoko, vakamula vakati, "Amina! Amina!" Vakasulika amatu ghave pasi, vakamughinia Unguluve.

⁷ U Yeshua, u Bani, uSherebia, u Yamini, u Akubu, u Shabethai, u Hodai, u Maaseya, u Kelita, u Azaria, u Yozabidi, u Hanania, u Pelaya ava vevaLevi vano vakatangagha avanhu kugadilila indaghilo, kila jumo pavukalo vwake. ⁸ Aveene avuo vakimbagha indaghilo vakavulanisyagha na kughanula nu muluvo kuuti avanhu vakagule ghano ghikwimbua.

⁹ U Nehemia nu m'baha ghwa kighavo, nu Ezra untekesi kange mulembi na uLevi vano vakava vighanula kuvanhu vakavavula avanhu vooni vakati, ikighono iki kimike kwa Mutwa, Unguluve ghwinu. Meleke kulila, ulwakuva avanhu vooni valyalilile yevipulika amasio gha ndaghilo.

¹⁰ U Nehemia akavavula akati, 'Lino mugomoke kukaaja muluta mulie fino vinonile, nu nkate, na malenga amanono, neke muntwalilaghe umunhu unsila kimu, ulwakuva ikighono iki kimike kwa Mutwa ghwitu muleke kuuva nulusukunalo ulwakuva ulekeelo lwa Mutwa se ngufu sinu.

¹¹ Avalevi vakavanyamasia avanhu vakati, "Munyamale! Ulwa kuva ikighono iki kimike. Mululeke ulusukunalo."

¹² Avanhu vooni vakaluta kulia na kunyua na kukuvapelagha avange ikyakulia ulwakuva valyaghakagwile amasio vupile uvukagusi mumasio gha ndaghilo.

¹³ Ikighono kya vuvili avavaha mufikolo fyave palikimo na vatekesi na va Levi, vakkong'hana kwa Ezra umulembi kuuti vupile uvukagusi mumasio gha ndaghilo. ¹⁴ Vakakagula kuuti ulembiue mundaghilo vule Uguluve akam'bulagha uMose piiti avaana va Isilaheli vikalaghe mufijumba unsiki ghwa kikulukulu umwesi gha lekelalubale. ¹⁵ Vanoghiile kujova ilisio mumakaja ghooni na ku Yelusalemu, kukuvavuula kuuti, 'Mulutaghe ukuo ku iisi ija fidunda mulete inaafisa miseituni ighia mulisoli, na mataafi ghwa mihadasi na mataafi gha mitende na mataafi gha mapiki amakome kuuti mujengele ifijumba fya nsiki n'debe ndavule lilembilue."

¹⁶ Pepano avanhu vakahuma vakaleta amataafi vakajenga ifijumba kila munhu pa nyumba jaake, na si mbigho na papakuhighila pa nyumba saave na pakuhighila pa nyumba ja Mutwa, kukivanja pano pelefu pamulyango ghwa malenga nu mulyango ghwa Efraimu. ¹⁷ Pepeene ilipugha lwoni lino lilyagomwike kuhuma kundinde vakajenga ifijumba vakikalagha umuo. Ulwakuva kuhuma mufighono fya Yoshua, umwana ghwa Nuni mpaka ikighono iki namughelile kukwimika ikikulukulu iki. Na lulukeelo lukava luvaha kyongo.

¹⁸ Ifighono fyoni kuhuma ikighono kya kwanda kufika kuvusililo, uEzra akava ukuvimbila avanhu ikitabu kya ndaghilo sa Nguluve. Vakavombagha ikikulukulu ikio unsiki ghwa fighono lekela lubale ikighono livaha pavusililo vakava vipala sana, ndavule valyavalaghiile.