¹ Pepano uSanibalati nu Tobia nu Gesemu uMwalabu na valugu viitu avange, yevapuliike kuuti nijengile uluvumba vupia, natupalekile pamonga, nambe natuviluile amalyango gha kudinda, ² U Sanibalati nu Gesemu vakasung'ha imhola kulyune vakati, "Ghwise, tutang'hane palikimo nuuve mukikaaja kimonga muluvindi ulwa Ono." Ulweene vakalondagha kukumbuda.

³ Une nikasuung'ha imhola kuveene, nikati, "Une kuno nilikuvomba imbombo imbaha nanikwisa. Lwa kiiki imbombo jiime kuvombua pano nikwisa ukuo?" ⁴ Vakasung'ha imhola ijio akasiki kane, najuune nikavamula vulevule.

⁵ U Sanibalati pe akasuung'ha u m'bombi ghwake kulyune akasiki aka vuhaano nikalata alembile. ⁶ Ijeene ikatata jilembilue ndiki, "Jipulikiike imhola muvanhu vano valipiipi, naju Gesemu ghwope alinimhola iji kuuti uve na Vayahudi avanino mulonda kuvuuka muvutwa uvu fyenamba mujenga uluvumba vupia. Mumhola iji luvoniike kuuti uve ghulonda kuuva ntwa ghwave.

⁷ Kange luvoniike kuuti uvasalwile avavili vavavuule ava mu Yelusalemu, kuuti, "Kwale untwa ku Yuda!" Lino imhola iji ivulua untwa u Alatasasita. Lino nikukuvuula kuuti ghwise tukale uve nuune tujove.

⁸ Najuune nikagomosia imhola nikati nakulilumonga muisio sino ghujova, aghuo masaghe gha mumwoja ghwako." ⁹ Aveene vakavomba uluo kuuti vatwoghofie mumasaghe ghave piiti, "Natungaghendelele ni mbombo, luleke kujenga." Nikufunya kwa Nguluve, ghwango nikati Lino ghwe Nguluve nisuuma umhele ingufu.

¹⁰ Nikati nilutile kukaaja kwa Semaya, umwana ghwa Delaya, umwana ghwa Mehetabeli, juno na alyatavulue kuhuma munyumba akambuula akati, "Leka tutang'hane palikimo mulinyumba ja Nguluve ija kufunyila ulwa kuva tedinde amalyango ulwakuva ikilo iji vikwisa vakubude."

¹¹ Nikamwamula nikati, "Asi! Ne munhu ndavule une ndepoonu nikimbile? Nambe nengile munyumba ja kufunyila mwe nikalaghe? Nambe nanikwingila." ¹² Pe nikakagula kuuti uju naasung'hilue nu Nguluve, looli asung'hilue nava Sanivalati nu Tobia ajove uvu viivi vwango kuveene. ¹³ Alyasung'hilue kuuti anyoghofie nihoke amakole neke aveene vajaaghe isila ijakunjova fivi na kunangania ilitavua lyango nu lutogo lwango.

¹⁴ Nikifunya kwa Nguluve nikati ghwe Nguluve ghwango ukumbuke ghooni ghano vambombile uTobia nu Sanibalati naju mbili uNoadia palikimo na vavili avange vano vakaghelagha kukunyoghofia.

¹⁵ Pepano imbombo ija kujenga uluvumba jikasila ikighono kya vijigho na fihano, umwesi ughwa Eluli, imbombo jilyale ja fighono fijigho vihano na fivili. ¹⁶ Avalugu viitu vooni vakati vapuliike na vanhu avange vano valipiipi vakati vapuliike kuuti imbombo tumalile vakoghopa nakuvona soni kyongo. Ulwakuva valyakagwile kuuti imbombo jivombiike mulutangilo lwa Nguluve ghwitu.

¹⁷ Unsiki ghwoni ughu avalongosi va Vayahudi vakava vile mbelanila ikalata nu Tobia. ¹⁸ Vamonga mukikolo kya Vayahudi vakava vitangana naghuo ulwakuva valyafingile nu mwene ulwakuva alyale nkwive ghwa Sekania, umwana ghwa ala, ulwene u Yehohanani umwanake akantoola umwalive ghwa Mesulamu umwana ghwa Belekia. ¹⁹ Pevakamangila ghooni amanofu agha Tobia, nasimhola sango vakantwalilagha. Ghwope akalembagha ikalata isa kunyoghofia.