¹ Laha namonje andre Jerosalema Jesosy naho ty mpianane le nandeha ao Betifaga, agne amboe vohitse ndre Oliva, le nandefa mpianatse roe Jesosy, ² nitalily tamy iareo tihoe: “Manena ao amy ze vohitse magnarake ao, te eo noho eo nareo le hahisake borike mirohy vaho ana ty borike raeke miarake amine. Vahao iareo vaho handeso atoy amiko. ³ Laha misy mitsara anareo mikasike zay, le talilio tihoe: 'Misy impaiava ty Tompo aireo,' vaho eo noho eo zay ndaty le handefa aziereo miarake aminareo.”

⁴ Vaho niseho zay soa hahatanterake ze natalily tamy ty alala ty mpitokine. Nanao tihoe Reeke: ⁵ “Atalilio ty anak'ampela ndre Ziona tihoe: “Ingo, ty Mpanjakanao mamonje anao, Miambane vata vaho mijo borike- ana-borike lahy.”'

⁶ Bak'eo le lasa reo mpianatse vaho nanao arake ze nandilia ndre Jesosy aiereo. ⁷ Nandesy iareo iaze ampondra naho iaze ana-borike vaho nampimpoke ty lamba iareo teo amine, le nitoboke teo amy iaze lamba Jesosy. ⁸ Ty ankamaroa ty vahoake le namelatse ty lamabane tamy ty tane, vaho reo hafa nanapake ratsan-ketae vaho nanaparitake zay tamy ty lala. ⁹ bak'eo reo vahoake niaolo ahy ndre Jesosy naho reo ze nagnarake aze nikorakorake tihoe: “Hosana ho ahy ty ana ndre Davida! Isaora iaze avy bak'amy ty agnara ty Tompo, Hosana agne amy ty ambone loatse!”

¹⁰ Lafa nizilike ty raeke tanà le nanao tihoe: “Ia moa io?”

¹¹ Ty vahoake namale tihoe: “Reke ro Jesosy iazy mpitoke bak'agne Nazareta agne Galilia.”

¹² Bak'eo nizilke tao an-tempoly Jesosy niroahine iaby reo mpivile naho mpivarotyse tao an-tempoly, vaho navalikine ty latabatsy reo mpanakalo vola naho ty fitoboha reo mpivarotse voromahilala. ¹³ Nanao tihoe Re tamy iareo: “Fa voasoratse tihoe: 'Ty tragnoko le ho kaihy tihoe tagno fivavaha,' nefa ataoanareo trano fitsioha ty ndaty rate.”

¹⁴ Lafa bak'eo le nisy goa naho maleme namonje Aze tao an-tempole, le nafahane iareo.

¹⁵ Te lafa nahisake ty raraha mahavere nanoane ty bey ty mpisoro naho ty mpanora-dalagna, vaho lafa heno iareo ty ajaja malinike nikorakorake tao an-tempoly tihoe: “Hosana ho ahy ty ana ndre Davida,” le meloke mafe iareo.

¹⁶ Nanao tihoe iareo tamine: “henonareo vao zay talily reo ndaty reo?” Namale aiereo Jesosy tihoe: “Eka! te tsy mboe nivakinareo vao ty tihoe: “Bak'amy ty vava ty ajaja malinikenaho ajaja minono ro nampahitianareo ty fiantsa?”

¹⁷ Bak'eo nagnenga aiereo Jesosy le nadeha tagne amy ty tanà ndre Betania vaho nitoboke tao ty halike.

¹⁸ Vaho lafa maraindray laha nimpoly tyagne an-tanà Re, le kere. ¹⁹ Nahisake hetae aviave tegne an-tsisin-dala, le namonje tegne Re vaho tsy nahisake na ino na ino teo ankoatsy ty ravine. Nanao tihoe re tamine: “Lonike tsy hisy voa sase bak'amina zisikam-parane,” vaho niarake tamy zay le maike iaze aviave.

²⁰ Lafa nahisake zay reo mpianatse, le vere iareo vaho nitsara tihoe: “Nanao akore ro nahalasa nahamaike toy aviave toy?”

²¹ Namale Jesosy vaho nitalily aiareo tihoe: “Ataliliko marene aminareo, laha manam-pinoa naho tsy misy fisalasala nareo le tsy ze natao tamy io aviave io avao to hataonareo, te na le hitsara amy toy vohitse toy kea tihoe: 'miombota vaho mitotà agne an-dranomasy.' le ho atao zay. ²² Na ino na ino angatahinareo am-bavake, am-pinoa le ho azonareo.”

²³ Lafa nizilike tao an-tempoly Jesosy, le namonje aze Azwe ty bey ty mpisoro naho ty ndaty bey laha nampianatsy Re vaho nitsara tihoe: “Fahefa bak'aia moa ro anaovanao regny raraha regny, vaho ia ro nagnome anao zay fahefa zay?”

²⁴ Namale Jesosy vaho nitsara tamy iareo tihoe: “Hametrahako fagnontanea raeke avao kea nareo. Laha talilienareo amiko, le hataliliko aminareo ty fahefa anaovako regny raraha regny. ²⁵ Ty batisa ndre Jaona- baka aia ro niaviane? Bak'agne an-dagnitsy sa bak'amy ty ondaty?” Nialy hevitse iareo, nanao tihoe: “laha mitsara tike tihoe, 'bak'agne an-dagnitse,' Reke hitsara amaintika tihoe: 'Te nanao akore zane nareo ro tsy nino aze? ²⁶ Te laha mitsara tika tihoe: Bak'amy ty ondaty,' matahotse ty vahoake tike, satria iareo iaby le mihevitse andre Jaona manahake ty mpitoke.” Le namale ahy ndre Jesosy iareo le nitsara tihoe: “Tsy hainay.” ²⁷ Vaho nanao tihoe Reke Tamy iareo: “Raho avao kea le tsy hitalily aminareo tihoe bak'aia ty fahefa anaovako regny raraha regny.

²⁸ Nanao akore ty hivitsaraeo? Nisys lehilhay raeke nana anandahy roe. Nandeha agne amy iaze vaolohane re vaho nanao tihoe: 'Anake, mandenà miasa agne amy ty tanem-boaloboke androane.'

²⁹ Iaze anandahine namale aze tihoe: “Tsy ho agne raho,” Te avy eo niova hevitsy re le nandeha.

³⁰ Bak'eo le nandeha amy iaze faharoe re vaho nitsara manahake zay avao kea. Namale re le nitsara tihoe: Ho agne raho, tompoko,' feie tsy nandeha agne reke. ³¹ Ia tamy reo anane roe reo ro nanao ty tea ty raene?” Vaho nanao tihoe iareo: “Iaze voalohane.” Jesosy nitsara aiereo tihoe: “Talilieko marene aminareo, reo mpitake haba naho reo makorele le hizilike ty Fanjaka ty Andragnahare alohanareo. ³² Te Jaona namone anareo tamy ty fahamarigna, te tsy nino aze nareo. Te reo mpitaky haba naho makorele nino aze. Te nareo, na le nahisake zay kea, le tsy nibebake naho tsy nino aze.

³³ Janjigno toy fagnohara raeke hafa toy. Nisy lehilahy raeke, tompon-tane. Nanao tanem-boaloboke re, nofefene zay nandavahane fananigna tao ampone, nampitsangane tilikampo, vaho nampagnofaine tamy reo mpambole voaloboke. Bak'eo le nandeha agne amy ty tanà hafa reke. ³⁴ Lafa narinike ty taom-pahavokara, le nagnirake ty ialne tamy reo mpiasa re ho agne amy reo mpambole voaloboke hangalake ty vokatse. ³⁵ Te nisambory reo mpambole voaloboke reo mpiasane, nifofohine ty raeke, nivonoane ty hafa, le mboe nitorahine vato ty hafa. ³⁶ Vaho mboe, nandefa mpiasane hafa ndraeke iaze tompon-tane, lahiale noho ty tamy ty voalohane, te natao iareo manahake zay avao kea. ³⁷ Tafara zay, le nagnirake ty anandahine lahitoka tagne amy reo ty tompon-tane, nitalily tihoe: 'Hiasay ty anako iareo.'

³⁸ Te lafa nbahisake iaze anandahine reo mpambole voaloboke, le nifampiresake iareo tihoe: 'Toy ro mpandova. Ndao ho vonoantika re vaho halantika ty lova.' ³⁹ Noho zay le nisambory iareo re, natorake tao ampo ty tanem-boaloboke vaho nivonoa. ⁴⁰ Vaho lafa avy ty tompo ty tanem-boaloboke, ino ro hataone amy reo mpambole voaloboke?”

⁴¹ Nanao tihoe iareo tamine: “Haravane amy zay fomba mafe loatse reo ndaty loza, vaho bak'eo hampagnofaine amy reo mpambole voaloboke hafa ty tanem-boaloboke, ndaty hagnome aze ty anjara voline amy ty fotoam-pahavokara.”

⁴² Jesosy nitsara tamy iareo tihoe: “Tsy mboe namake ty soratse masy vao nareo tihoe: 'Ty vato nihalane ty mpagnore-tragno ro natao vato fototse. Bak'amy ty Tompo zay, mahavere eo amasontika'?

⁴³ Noho zay ataliliko aminareo, hafaha aminareo ty fanjaka ty Andragnahare vaho hamea ty firenena ze mamokatse reo voane. ⁴⁴ Na ia na ia ho lavo io vato io le ho potipotike. Te ze hitontane kea le ho torotoro.”

⁴⁵ Lafa naheno reo fagnaohare reo ty bey ty mpisoro naho reo Fariseo, le azo iareo te mikasike aiereo ro niresahane. ⁴⁶ Nisaviry ty hisambotse aze, feie natahotse ty vahoake iareo, satria natao ty ndaty ho mpitoke Re.