¹ Avy reo Fariseo naho Sadoseo vaho nitsapa Aze le nangatake Aze soa hampiboake aiereo famantara abak'agne an-dagnitse.

² Te Reke namale vaho nitsara aiereo tihoe: “Lafa hariva, le manao tihoe nareo: 'Ho soa ty andro, te mena ty lagnitse.' ³ Lafa maraindray, le manao tihoe nareo: 'Ho rate ty andro, te mena naho magnimbonke ty lagnitse.' Hainareo ty mamantatse ty tarehe ty lagnitse, te narei tsy afake mandike reo famantara ty fotoa. ⁴ ty taranake rate mpijangajanga le mipay famantara, te tsy hisy famantara homea aze ankoatse ty famantara ndre jona.” Bak'eo Jesosy nagnenga aiereo le lasa.

⁵ Lafa avy tegne ampita reo mpianatse, le haligno iareo ty nanday mofo. ⁶ Nanao tihoe Jesosy tamy iareo: “Miambena vaho mitao amy ty masirasira reo Fariseo naho Sadoseo.”

⁷ Niale hevitse reo mpinatse le nitalily tihoe: “Noho tika tsy nanday mofo zay.”

⁸ Jesosy nahay zay le nitsara tihoe: “Nareo kele finoa, nanao akore nareo ro miale hevitse aminareo le mitsara te noho ty tsy nandesanareo mofo zay? ⁹ Mboe tsy hainareo na tiaronareo vao ty mofo lime ho ahy ty dimy arivo, vaho haro fire ro navorinareo? ¹⁰ na reo mofo fito ho ahy reo efats'arivo, vaho haro fire ro nalanareo? ¹¹ Nanao akore ro tsy ahazoanareo te tsy mikasike ty mofo ro nitalilieko anareo? Miambena vaho mitao amy ty masirasira reo Fariseo naho Sadoseo.” ¹² Bak'eo azo iareo te tsy hitao amy ty masirasira ty mofo ro nitaliliene aiereo, te hitao ty amy ty fampianaragny reo Fariseo naho Sadoseo.

¹³ Vaho lafa avy tagne amy ty faritse marine ty Kaisaria-filipo Jesosy, le nagnontane reo mpianane Re, Manao tihoe: “Atao ty ndaty ho ia moa ty Anagn'Ondaty?”

¹⁴ Nanao tihoe iareo: “Ty ilane mitalily te Jaona mpanao batisa, ty ilane, Elia, vaho reo hafa, Jeremiana raeke amy reo mpitoke.”

¹⁵ Nanao tihoe Re tamy iareo: “Te nareo kea manao Ahike ho ia?”

¹⁶ Namale, Simona Petera nanao tihoe: “Iriha ro Kristy Anagn'iaze Andragnahare velo.”

¹⁷ Namale Jesosy le nanao tihoe tamine: “Vototse iriha, Simona Bar-jona te tsy ty nofotse naho lio ro naneho zay taminao, te ty Babako ze agne an-dagnitse. ¹⁸ Talilieko aminao avao kea te iriha ro Petera, vaho ambone toy lamelame toy ro hagnoregnako ty fiangonako. Ty vavahade ty valavato le tsy haharese zay. ¹⁹ Homeiko anareo ty lakile ty fanjaka ty lagnitse. Na ino na ino fehezinao eto embone ty tane le ho feheze agne an-dagnitse, vaho na ino na ino vahanao etoy an-tane le ho vaha agne an-dagnitse.” ²⁰ Bak'eo Jesosy nandily reo mpianatse te iareo le tsy tokone hitalile na amy ia na ia te Re ro Kristy.

²¹ Tamy zay andro zay Jesosy nanomboke nitsar reo mpianane te tsy maintse ho agne Jerosalema Re, hiaritse fijalea maro eo an-tagna ty ndaty bey naho loha ty mpisoro vaho reo mpanoratse lalàgna, ho vonoa, naho hatsanga ndraeke amy ty andro fahatelo. ²² Bak'eo Petera nangalake Aze le nitsara mafe Aze, manao tihoe: “Ho lavitse anao vatane zay, Tompo; Tsy hiseho aminao vatne zay.”

²³ Te Jesosy nitolike le nitsara tamy ndre Petera tihoe: “Mindrisoa agne ambohoko, ry Satana! Iriha le fandavoa ho Ahike, Noho riha tsy midare reo raraha ty Andragnahare, te reo raraha ty ndaty.”

²⁴ Bak'eo Jesosy nitsara tamy reo mpianane tiheo: “Laha misy te-hagnarake Ahike, le tsy mainmtse mandà ty vatagny re, handay ty hazofijaleane, vaho magnarake Ahike. ²⁵ Te na ia na ia te-hanarombake ty fiaine le haharombake aze, vaho na ia na ia ro hahavere ty fiaine noho ty amiko, le hahazo zay. ²⁶ Te ino moa ro soa ho azo ty ndaty mahazo zao tontolo zao nefa rombake ty fiaine? ino ro omea ty ndaty ho solo ty fiaine? ²⁷ Te ty Anagn'Ondaty le ho avy amy ty hasine ty Babane miarake amy reo Anjeline. Bak'eo Re hamale soa ty ndaty kiraikiraike arake ze vitane. ²⁸ Talilieko marine aminareo, te misy sasane aminareo ze mitsanga eto ro tsy hitsapa ty fahafatesa mandrapahisaha iareo ty Anagn'Ondate avy amy ty fanjakane.”