¹ Erhi Yesu aba amayusa ahana amahano gage oku ntumwa zage ikumi na zibirhi, arhenga eyomunda, mpu ahanule ana yigirize omu mirhundu y'omucihugo.

² Yohana, erhi ali omu mugozi ayunva baderha emikolo ya kristu, amubwira kugerera abigirizibwa bage: ³ Ka-we olya wayisha? Erhi hali windi rhwalinda?

⁴ Yesu abashuza: Mugende mubwire Yohana ebi mwayunvirhe n'ebi mwa bwine: ⁵ Emihurha ekol'eriyabona, ebirema bikola biri byagenda, ababenzi bafumire, ba namurhunva bakolabali bayunva, abafire bafusire, n'emyanzi y'akalembe ya bigirizibwa emw'abakenyi. ⁶ Iragi ly'oyu ntabere cirhumire cage c'okuhirima!

⁷ Erhi bagenda, Yezu arhangira abwir'olubaga ebiyerekire Yohana: Bici mwalijiri lola omw'irungu? K'isheke liguma lyana dundwa n'empusi? ⁸ Cikwone, Bici mwalijiri lola? Ka mulume oyambirh'emishangi y'ecishingo? Lolagi, abayambirhe emishangi y'ecishingo bali omunyumpa z'abami. ⁹ Bici Lero mwalijiri lola? Mulebi? Neci, ndesire, na kulusha omulebi. ¹⁰ Bulya biyandisirwe kuli ye: Lola, narhuma entumwa yani embere ly'amalanga gawe, nti arheganye enjira yani embere zawe.

¹¹ Mmubwizire okunali, omu baburhagwa n'omukazi, harhasagibà omukulu kulusha Yohana mubatiza. Ci oli murho bwenene omubwami bw'empingu kuliye. ¹² Kurhenga amango ga Yohana mubatiza kuhik'ene, Obwami bw'empingu buba bwa misi, na abacihangana bobamujà. ¹³ Bulya abalebi n'irhegeko balebire kuhika Yohana; ¹⁴ na, nka wankalonza oku mumanya ye olya Eliya wayishi yisha. ¹⁵ Ogwerhe amarhwiri g'okuyunva ayunve.

¹⁶ Ndi nashushanya n'eriburha? Lishushine n'abana batamire abali Bantu banji, banali badesa abandi bana, ¹⁷ Bali baderha: rhwe rhwazihire akarhera, ci murhasamire; rhwamuyimbire endulu ci murha cidudumire. ¹⁸ Bulya Yohana ayishire, arhalya arhananywa, baderha: alimw'omuzimu. ¹⁹ Mwene omuntu ayishire, akalya ana nywa baderha mpu: Ali mudambye na mulalwe, na mwira wa bavurhisa n'abantu ba bworhere bwa kalamu kabi. Cikwone obukengere bwa ciyerekine oku mikolo yage.

²⁰ Anacirhangira ahabûla erya mirhundu ajiraga mw'ebisomerine binji, Bulya barhaciyunjuzagya. ²¹ Obuhanya bwawe, Korazini! Obuhanya bwawe betsaida! Bulya nka ebirhangaza byajiragwa ekarhi kinyu bwankajijirwe e Tiro n'omu Sidoni, hinga balimira baciyunjuzize, bayambale obusunzu n'olutulo. ²² Cocirhumire Mmubwizire: olusiku lwokutwolubanja tiro na sidoni bayishi hanwa hitya kuli mwe. ²³ Nawe, Kapernaumu, kawayishi yinamulwa kuhika empingu? Nanga. Wayishi honolwa kuhika olusiku lw'okufa. Bulya k'ebirhangaza byajirikanaga ekerhi Ka-we byankajirikine omu Sodoma hinga akacilamire kuhik'ene. ²⁴ Co cirhumire Mmubwizire: olusiku lw'okutw'olubanja, ecihugo ca Sodoma cayishi hanwa hitya kulimwe.

²⁵ Ago mango Yesu ayimuka aderha: nkukuzize larha Nyakasne w'empingu n'igulu, nk'oku ebi wabifulisire abanabwenge n'abobukengere, wabifulisire abana barho. ²⁶ Neci larha nkukuzize Bulya kwo walonzize Ntyo.

²⁷ Byoshi nabihirwe na Larha, na ntaye omanyire omugala nk'ishe. Ntaye wankamanya larha nkomugala, na oyu alonzize anamufululire ye. ²⁸ Muyishe e mwani, mweshi mwe mulagigirire, munazidohirwe, na murhamusa. ²⁹ Mubarhulire oku ngarha yani muna yankirire amarhegeko yani, Bulya ndi mutudu na mwirhonzi wa murhima. Mwayishi bona okurhamuka kwinja kw'emirhima. ³⁰ Bulya engarha yani eri nembu, n'omucimba gwani mwangu.