¹ Buzinda, ahamagala balya baganda bage ikumi na babiri, abaha obuhashe bw'okukaga abazimu, n'okufumya ngasi ndwala na ngasi buzamba. ² Lolagi amazino g'entumwa ikumi na zibiri. Owaburhanzi, Simoni, akagi hamagala Petro, na Andra, mulumuna; Yakobo, mwene Zebedayo, na Yohana, mulumuna; ³ Filipo, na Batelemayo; Tomaso, na Matayo muvurhisa; Yakobo, mwene Alfayo, na Tedeyo. ⁴ Simoni mukananayo, na Yuda Iskariote, olya wahana Yesu.

⁵ Babo aba ikumi na babirhi Yesu arhumaga, enyuma ly'okubahanula gurhi bagenda: Murhaje olunda lw'abapagani, murhaje n'omu mirhundu y'abasamariya; ⁶ Cikwone muje emunda ebibuzi bihezire byabene Israeli. ⁷ Mugende muyigirize munaderhe: Obwami bw'empingu bukola buli hofi. ⁸ Mufumye abalwala, mufûle abafire, mucesè ababenzi, muhinve abazimu. Mwahabirwe bushà, ninyu muhane bushà. ⁹ Murhayomeke masholo, erhi nfaranga, erhi magerha, omu mikaba yinyu; ¹⁰ erhi nshoho za lubalamo, erhi myambalo ibirhi, erhi birato, erhi karhi, bulya omukozi akwanine akalyo kage. ¹¹ Omu ngasi mirhundu kandi erhi cishagala mwajemwo, munadose erhi hanabà omuntu mwinja wankamuyegereza; munabere ahamwage kuhika muyishi genda. ¹² Omukudaha munalamusè aho; ¹³ na erhi eyo nyumpa yankaba ekwanine, omurhima gwinyu gunaje Kulibo; ci erhi yankabà erha kwanini, aho omurhima gwinyu guna mugalukekwo. ¹⁴ Nka barhamuyegerezizi, na nka barhayunvirhi emyanzi yinyu, munarhenge omweyo nyumpa erhi omweco cishagala muna gukumule olutulo oku nshando zinyu. ¹⁵ Mmubwizire okunali: olusiku lw'okutw'olubanja, ecihugo c'esodoma n'egomora byanahwa kunyî kulusha eco cishagala.

¹⁶ Alagi, mmurhumire nka banabuzi omukarhi k'emirunga. Ntyo mine bengehushu nka njoka, na balembu nka ngukû. ¹⁷ Mumanye abantu; bulya bamuhàna omunyumpa z'okutwira emanja, bana mushurhire eminyuli omu bishagala byabo; ¹⁸ Mwahekwa, erhi nye ntuma, emalanga ga ba kavuruneri n'embere z'abami, Oyo muhamiriza emunda bali n'oku bapagani. ¹⁹ Ci, erhi baka muhana, murhayobohaga mpu gurhi mwa shambala erhi oku mwa derha: Ebi mwaderha mwayishi bihabwa honaho; ²⁰ Bulya arhali mwe mwaderha ci mûka wa sho winyu waderha mulimwe. ²¹ Omulondanyi ahana omulumuna mpu bamunige, n'omubusi ahana omwana wage; n'abana bagoboke ababusi babo, bana banige. ²² Mwayishi shombwa na boshi erhi izino lyani lirhima; ci owacihangana kuhika obuzinda ye wanacizibwe. ²³ Nka bamomulibuza omu cishagala ciguma, munayakire omu cindi. Mmubwizire okunali, murhayuse okugera omu mirhundu yoshi y'Israeli omwana w'omuntu arhayisha.

²⁴ Owayiga arhankalusha omwigiriza wage, n'omukozi arhankalusha Nahamwabo. ²⁵ Birhakahashikana omwigirizibwa alushe omwigiriza wage, n'omukozi nka nnahamwabo. Erhi bankaderha mpu nanyumpa ye belzeburi, kanga kulusha baka kubwira obomumwage!

²⁶ Ntyo murhayobohaga; Bulya ntabyo bifulike birha fululuke, erhi ihwe lirhanka manywa. ²⁷ Ebi ndi namubwira omu mwizizi, mubiderhe kalengerere; na ebi ndinamuderhera omu marhwiri, mubiyakulize oku burhungiri bw'enyumpa. ²⁸ Murhayobohe abakaniga omubiri barhangwerhi obuhashe okuyirha omurhima; Cikwone muyobohe owankashereza omurhima n'omubiri omu cihenama. ²⁹ K'orhufunzi rhubirhi rhurhagulwa nsimuni nguma? Cikwoki ntahyo higuma hyankarhogera okwidaho buzira obulonza bwa sho winyu. ³⁰ Na ciru enviri z'okwirhwe linyu ziringanje zoshi. ³¹ Ntyo murhayobohaga: ecishingo cinyu cilushire ecorhufunzi rhwinji. ³² Co cirhumire olya yeshi wanyemera embere z'abantu, nani namuyemera embere za larha oli omu mpingu. ³³ Cikwoki owakandahira emalanga g'abantu, na ishimulahira emalanga ga larha oli omu mpingu.

³⁴ Murhamanye mpu nayishire okulerha omurhula omw'igulu; ntali lerha mirhima ci ngorho. ³⁵ Bulya nayishire ndi berula omwana n'ishe, omunyere na Nina, omukazi na nazala; ³⁶ n'abashombanyi bomuntu bayishiba b'omumwage. ³⁷ Osima ishe erhi nnina kulusha nie erhi arhakwanini, n'osima omugala erhi mwali kundusha arhakwanini; ³⁸ orhaberhwire omusalaba gwage yene, erhi arhana nshimbuliri, arhakwanini. ³⁹ Owakenjerere obuzine bwage anabuheze, n'owabuheze nyentumire anabubone.

⁴⁰ Owamuyankirire erhi nye ayankirire, n'owanyakirire erhi ayankirire owantumaga. ⁴¹ Owanayankirire omulebi nk'oku abali mulebi ayishi habwa oluhembo lw'omulebi, n'owanayankirire omushinganya nk'oku anali mushinganya ayishihabwa oluhembo lw'obushinganya. ⁴² N'olya yeshi wana hane akabehe k'amishi g'emboho, emwa muguma waba bagalaganda mpu Bulya bali bigirizibwa bani, mmubwizire okunali, oluhembo lwage lurhanka hera.