¹ Yesu akarina mubhwato, akambhoka nu ukuhika ku umughi ghono yaikaye. ² Maha, bhakamoretera omonto ono yarenge arindighaye araribhwi kwighodoro. Hano yaroshe imighiro ghyabho, Yesu akatebhya omonto ora yarenge arindighaye, "Mona wane shomerwa, ibhitimba bhyaho bhyabheywe" ³ Maha, abhaeghya abhi imiahokano bhakatebhyania abhene ko bhene, "Omonto ono mmosheri" ⁴ Yesu akamanya amaiteghero ghabho no okoghamba, "Nkwake mukwiteghera amaghogho monkoro shenyu? ⁵ Nkehe ikinyohu koghamba, 'Ibhitimba bhyaho bhyabheywe'kasi okoghamba, 'Emera oghende?' ⁶ Naho momanye igha Omona uwa Adamu ano obhotoro ubhu ukwabhera ibhitimba..." Ono yaghambire ghano ko ora yarenge arindighaye, "Emera, ghegha righodoro ryaho oghende waho" ⁷ Nho omonto ora yaimereye nu ukughya waye. ⁸ Abhanto hano bharoshe ghayo, bhakaroghora no okoghonga Waryobha, ono yaha abhanto obhotoro.

⁹ Hano Yesu yahetanga kukurwa hayo, akarora omonto ono yabherekeywe Mathayo, ono yarenge yikaye entahana iya abhatobhesya abhu ubhushuru. Wonswe akamotebhya, "Nsorana oni, Wonswe akaemera no okomosorana. ¹⁰ Hano Yesu yaikaye korya ibhyakorya mwighutu hara, bhakasha abhatobhesya abhu ubhushuru (na) abhanto abharu bhakarya nawe hamwe naabhana bhegha bhaye.

¹¹ Nho Mafarisayo hano bharoshe ghayo, bhakatebhya abhana bhegha bhaye, "Nkwake umweghya wenyu akosanga hamwe (na) abhatobhesya abhu ubhushuru (na) abhanto abhaghogho?"

¹² Yesu hano yaighure ghayo, wonswe akaghamba, "Abhanto bhao bhana obhohoru tebhakutuna omorerihe, nko abharoye abhene. ¹³ Mughi mweghe esobhoro (ya) riyo, "Ndatuna obhoghonshe ti ikimwensohe" Kobhora naishire, te ko abhahene kwitabherya, nko bhara bhana ibhitimba.

¹⁴ Nho abhana bhegha abha Yohana bhamwishireko no okoghamba, "Nkwake bheto (na) Mafarisayo tukukwemera korya nu ukunywa, nawe abhana bhegha bhaho tebhakokora igho he?"

¹⁵ Yesu akabhatebhya, Abhaherekeri abhu ubhwenga bharatora kosorombara hano ukunyoranga bhana Umwene bhwenga hamwe? Naho shinsiko nkushashera hano Umwene bhwenga aregheghwa kurwa wabho, nho abhari bharemera korya nu ukunywa.

¹⁶ Taho omonto ono akotora eketamunye ekyo umwenda omohya ku umwenda omoghotu, ekeraka kiyo nkratandore umwenda omoghotu bhokong'u. ¹⁷ Taho omonto ono akotora amarwa mokento ekekoro, hano bharakore igho, nkerebharoka, narisero ryako nderasareke. Keno keho amarwa gharaterekerwa mokento kena risero rehya ne ebhento bhiyobhebhe bhehoru.

¹⁸ Enkagha eno Yesu yabhatebhyanga amang'ana ghayo, maha omotake akasha akakumya mobhoronge bhwaye, no okoghamba, "Omohara wane mbhono yakwa, naho nsho omotore okobhoko kwaho naranyohe ghweki. ¹⁹ Nho Yesu yaimereye nokosorana omona mwegha waye wonswe. ²⁰ Maha, omokari ono yarure amanyinga kohekera ekerengere ikyo imioka ikomi nebhere, yaishire hang'e (na) Yesu nu ukukunia ororebherebhe urwi ingibho yaye.

²¹ Kobhora yaghambire, "Hano ndakuni ingibho yaye, nendahwene."

²² Yesu akaisyorya no okomomaha no okomotebhya. "Mohara, itabherya, umughiro ghwaho ngo ghoraghire uhwene," Ne enkagha iyoiyo omokari ora akahwene.

²³ Nho Yesu yahikire mwighutu iryo omotake, akamaha abhahuti abha shetarumbeta (na) abhanto abharu bhakoranga ikituri. ²⁴ Wonswe akaghamba, "Murwe hano, ko okobha omohara ono tarakwahe, no okobha naraye. Naho bho bhakaseka nu ukumushera. ²⁵ Hano abhanto bhara bharusibhwiho, akasoha mukinyumba riko akaghota omohara ora okobhoko akaemoka. ²⁶ Amang'ana ghano ghakanyaraghana mumughi ghonswe.

²⁷ Hano Yesu yaroshokanga kurwa hara abhanto bhabhere abhashasha abhahukuru bhakamosorana. Bhakaghenderya koshera no okoghamba, "Torasabha utuitabheri Omona uwa Daudi." ²⁸ Hano Yesu yahikire mwighutu hayo, abhahukuru bhara bhakamushako. Yesu akabhatebhya, "Muritabherya igha ndatora kokora?" Bhonswe bhakamotebhya, "Nigho, Omokama" ²⁹ Nho Yesu yakunuri amaiso ghabho no okoghamba, "Nigha ebhe igho ko bhenyu kigho imighiro ghyenyu gherenge" ³⁰ Amaiso ghabho ghakaramokya. Nho Yesu yakomereyi no okoghamba, "Morore omonto wowonswe atakamanya eng'ana eno" ³¹ Naho abhanto abhabhere bhaimokire no okorarokya amang'ana ghano ntahana shyonse mumughi.

³² Bhakamara abhashasha abhabhere bhara bhagheye shabho, Maha, omonto omwe umu mumu ono yarinirwe ne ebhehwe yaretirwe ku Yesu. ³³ Ebhehwe bhera hano bhyamurureko, omonto umumumu ora akasimya kushumansha. Abhanto bhakaroghora no okoghamba, "Eno teyakaroshwe Israel hano he.

³⁴ Naho Mafarisayo mbaghambanga "Ko abhanene abhe ebhehwe, nkokenyare ebhehwe" ³⁵ Yesu akainara mumighi ghyonswe (na) mubhishishi. Wonswe akaghenderya kwegha momasengero, aratebherya eng'ana iyo obhokama, nu ukuhwenia abharoye bha temo shyonswe no obhorosu haghare haghare. ³⁶ Enkagha eno yaroshe ehamate era wonse yabhabheye, kobhora bhanyankire no ukukwa enkoro. Mbhabhaye kya amang'ondi ghano ghatana omoresya. ³⁷ Wonse akatebhya abhana bhegha bhaye. "Righesa ndyaru nawe abhakori abhemeremo mbhake. ³⁸ Ku igho bhono mwangohe kosabha Omokama uwa righesa, okoreke yengeri abhaghesi abhande mwighesa ryaye."