¹ Kushinsiko shera Yohana omokori wisubho yaishire aratabherya mobhesaka ibhya Yuda araghamba. ² "Mwetobhore kokobha obhokama ubhwa koryobha hang'e bhore," ³ Kobhora ono owe yaghambirwekho omoroti Isaya araghamba, "obhoraka bho omonto ono akobherekera kurwa kokekongo: "mokore bhongo enshera iyo Omokama, moroki kyaigho areheta," ⁴ Bhono Yohana akaibhoha amabhuri aghe ngamia numushibhi ughwa risero mobhokende bhwaye. Ibhiyakorya bhyaye mbesase bhyare nobhoke ubhwa mobhesaka. ⁵ Ghweki Yerusaremu, Yuda yonswe, nekebhara kyonswe keno kinare ikyoro ikya Yodani bhakaya waye. ⁶ Bhasubhwanga nawe mokyoro ikya Yodani eno bhararebhora ibhitimba bhyabho.

⁷ Naho akabhamaha abharu bha mafarisayo namasadukayo bharasha kumwene kusubhwa, akabhatebhya, "Bhenyu urwibhoro urwi inshoka eno ena obhosongo nawe yabhorokiri kokenya obhoreru bhono bhukusha? ⁸ Mwebhore shehagho sheno shisire inyanyi yenyu. ⁹ Motakaiteghera nukushumasha bhenyu abhene, tonawe Ibrahimu kya tata weto,' Kobhora ndabhatebhya Waryobha aratora kumwimokerya Ibrahimu abhana nokanyora nkurwa kho maghena ghano. ¹⁰ Bhono ishoka emare kotorwa kumuri gho omote, kuigho kera omote ghono ghwetakwebhora shehagho shinshiya ngorabhotorwe nokotabhutwa momoro.

¹¹ Ndabhasubha namanshe kukughira yinyanyi. Nawe umwene ono akusha nkagha ndureho monene kokera oni naoni tinisire kura okoghegha shengeto shaye. Umwene narebhasubha kho enkoro yobhohoreru nako omoro. ¹² Ekebhebheto kyaye mokobhoko kwaye kere keramurentekya bhokong'u ekebhara bhansha kyaye nokokomanya engano yaye moketara. Nawe narasambe amasaghyo kho omoro ghono ghotaririma.

¹³ Ghweki Yesu akasha kurwa Garilaya nokohekera mukyoro ikya Yorodani kusubha {na} Yohana. ¹⁴ Nawe Yohana yatunire komorebhera araghamba, "Oni ndatuna kusubhwa nauwe, nauwe wishire kuoni?" ¹⁵ Yesu akamohonshora akaghamba, "ikerya ibhe bhonigho, kokobha nigho ikutuna tobhe kuhikya obhohene bhonse." Ghweki Yohana akamwikererya.

¹⁶ Hano yamare kusubhwa, Yesu yarure momanshe, hakigho risaro rekeghoka kumwene akamaha umwahorwa uwa Waryobha aarika hanse khi ikighuti nukumunya ighoro yaye. ¹⁷ Maha, obhoraka kurwa koryobha bhoraghamba, "Ono mona wane omohanshe. Ono nkushomerwa nawe."