¹ Nho Amafarisayo nabhakonikoni bhamwishireko kukurwa Yerusalemu. No okoghamba. ² 'Nkwake abhana bhegha bhakwanga amaragheryo agha abhaghaka? Nko bhora bhatakwisabha amabhoko ghabho hano bhatuna korya ibhyakorya."

³ Yesu akabhahonshora nokobhatebhya, "Nabhenyu nkwake mukwanga umwahokano ogho Omokama kukughira iya amaragheryo ghenyu? ⁴ Kobhora Waryobha yaghambire, 'Osoke suwenyu nanyakuwenyu, ghweki ono akoghamba amaghogho ku suwabho {na} kunyakuwabho, mbhohene narikwa.'

⁵ Naho bhenyu moraghambe, kera ono akotebhya suwabho nanyakuwabho, "kera okotoribhwa kono akanyore kurwa kuoni bhono nituho kurwa ko Waryobha," ⁶ 'Omonto uyo tana esoko kusuwabhohe. Kubhuyo miitighire eng'ana iya Waryobha kukughira iya amaiteghero ghenyu. ⁷ Bhenyu bhare bharwambhe, mbuya kyabhora Isaya yarotire ighoro yenyu araghamba. ⁸ Abhanto bhano bharansoka kuminywa ghyabho, naho enkoro yabho hare ere naoni. ⁹ Bharansengera bhosa, kobhora bhareghya ameghyo agha bhairo."

¹⁰ Nho yabherekeye abhanto akabhatebhya, "mwiteghere ghweki momanye. ¹¹ Tekeho ekento keno kekosoha mumunywa ogho ononto kokomoreserya. Nko kera kikurwa mumunywa kiyo nkyo ikyo koreserya omonto."

¹² Nho abhana bhegha bhagheye ku Yesu nokoghamba nawe, "Bhono! Omanyire Amafarisayo hano bhaighure eng'ana era mbarereye?" ¹³ Yesu akabhahonshora nokoghamba, "Kera omonte ghono Tata weto uwa koryobha ataghwemiri ngurihwa. ¹⁴ Bhatighe abhene mbatangati abhahukuru. Nyore umuhukuru nararongeke umuhukuru wonde, bhonse bhabhere mbaraghwe mweroma."

¹⁵ Petro akamohonshora nokotebhya Yesu, "Totebhi ekerenghyo kiyo kobheto, ¹⁶ Yesu akabhahonshora, "bhenyu bhonse temomanyirehe? ¹⁷ Bhenyu temokomaha igha kera kikuya mumunywa nkohetera kere monda nukughya mushoroni? ¹⁸ Naho ebhento bhyonswe bheno bhikurwera mumunywa monkoro bhikurwa. Mbhyo ebhento bhekosarya omonto. ¹⁹ Kobhora monkoro nkurweragharemo amaiteghero amaghogho, namatoki. ²⁰ Ghano ngho amang'ana ghano ghakosarya omonto. No okorya otaisabhire amabhoko omonto takosarekerwahe."

²¹ Nho Yesu yarure ahase hara akaghya iyo hare kukughya imighi ighya Tiro {na} Sidoni. ²² Maha akasha omokari Omokanani kurwa shembareka shiyo. Akabharoka araghamba, "Nyabhera, Omokama, Omona uwa Daudi, mohara wane aranyankibhwa bhokong'u ne ekehwe."

²³ Naho Yesu akamohonshora eng'ana, Abhana bhegha bhaye bhakasha komokomerya, bharaghamba, "Murusiho aghi shaye, kobhora nkituri akotokora."

²⁴ Yesu akahonshora nokoghamba, tenatomirwe ko omonto wowonse nkukughirya iya amang'ondi ghano ghasire kumughi ughwa Israel."

²⁵ Ghweki yaishire akaihinya mobhoronge bhwaye, araghamba, "Omokama ntorya."

²⁶ Akamohonshora nokoghamba, "Tibhuyahe koghegha ibhyakorya ibhya abhana nokohana shesese," ²⁷ Akaghamba, "Nigho, Omokama, nokanyora shesese shenke nkorya shere ibhyakorya bheno bhekoghwa komesha iyo omonene wabho."

²⁸ Nho Yesu yahonshoye nokoghamba, "Oremokari, imighiro ghyaho menene. Ebhe nku uwe bhono ukutuna." No omohara waye akahwenibhwa ko nkagha iyo.

²⁹ Yesu akarwa hayo nukughya hang'e ninyansha iya Garilaya. Gweki akaghya ighoro yekekereghe nukwikara iyo. ³⁰ Abhanto abharu bhakamushako. No okomoretera abhabheru, abhahukuru, abhamumu, ebherema nabhande abharu, bhano bhare abharoye. Bhakabhatora momaghoro agha Yesu {na} akabhahwenya. ³¹ Abhanto bhayo bhakaroghora hano bharoshe abhamumu bharaghamba {na} abhabheru bharahwenibhwa abharindigharu bhakaghenda abhahukuru bhakaramokya. Bhakamukumya Waryobha uwa Israel.

³² Yesu akabherekera abhana bhegha bhaye akaghamba, "Nabheye ehamate eno kobhora ntobhaye nabho kushinsiko isato bhatakorya kento. Tembaraghe kuya wabho bhatareye kento kyokyonswe, bhatashe bhasheshekere konshera."

³³ Abhana bhegha bhaye bhakamotebhya, "Hayi toranyore emeghate ighyu kwisa mwisisi hano gheno ghirighoti ehamate eno? ³⁴ Yesu akabhatebhya, "Mona emeghate erenga?" Bhakaghamba, "Muhungate, nashinswe nke igho."

³⁵ Yesu akahama ehamate era bhaikare hanse. ³⁶ Akaghegha emeghate muhungate ghera nashinswe, hano yamare kosasama, akaghesonora nokohana abhana bhegha bhakahana ehamate era. ³⁷ Abhanto bhonswe bhakarya nokweghota. Bhakamara bhakakomanya amasaghyo aghi ibhyakorya bhera bhyasaghire, bhakaishorya ebhekapo muhungate. ³⁸ Bhonswe bhano bhareye abhashasha bhekwe bhine kutigha abhakari nabhana.

³⁹ Nho Yesu yabharaghire ehamate era bhaghi shabho akamara akarina mubhwato nukughya orobhareka rwa Magadani.