¹ Ku urusiko ruyo Yesu yaimokire kurwa ka akaikara ko omorambo ughwi inyansha. ² Abhanto abharu mbamwinare, akarina mubhwato no ukwikara mo. Abhanto bhonswe bhakaemera komorambo. ³ Nho Yesu yaghambire amang'ana amaru ko bherenghyo, Akaghamba, "Maha umubhusuri yagheye kubhusura. ⁴ Hano yabhusuranga shentetere ishyende shyekaghwa mbareka ye enshera ibhinyonyi bhekatosha. ⁵ Shentetere shyende shyekaghwa korotare, tishyanyore amarobhahe. Shekamera nu ukukwa kobhora amarobha teghareho aghu kwisahe. ⁶ Hano omobhaso ghwabhare shekasambhwa kobhora teshyarenge niimirihe shekoma. ⁷ Shentetere shyende shyekaghwa momahwa. Emete ighya amahwa ghekakina bhokong'u ghekashehegha. ⁸ Shentetere shyende shekaghwa komarobha amaiya shekaebhora shentetere shyende, kotamboka ighana ishyende merongo esansabha ishyende merongo etato ⁹ Ono anaamatwe naaighwe.

¹⁰ Abhana bhegha bhakasha no okotebhya Yesu, "Nkwake ukushumansha abhanto bhonse ko ebherengyo?"

¹¹ Yesu akahonshokya no okoghamba, "Mohaywe obhohanshe ubhwo okomanya ikibhisire ikyo obhonene ubhwa mwisaro nabho tebharahanwahe. ¹² Naho, wowonswe ora anakyo, umwene naryongeribhwa bhokong'u, (na) narinyora ubhwera bhonene. Nawe ora atanakyo nunyora ne ekeke keno urinyora anakyo narirusibhwa. ¹³ Ku igho nkushumanshande nabho ko ebherengyo kobhora nunyora nkorora bhare, bhatakamaha ehene. Ghweki mbaighwe bhange kuighwa. ¹⁴ Obhoroti ubhwa Isaya bhwabhahekera ko bhene, bhora bhakoghamba, "Hano mukwighwa mwighwe, naho kotemo yoyonswe temomanyehe; enkagha mokomaha moratora kwanga komanya.

¹⁵ Enkoro (ya) abhanto bhano yabha kisunte nkekong'u kwighwa bhahindirya amaiso okoreke korora (na) amaiso ghabho hamwe kwighwa (na) amatwe ghabho hamwe komanyerya ko enkoro yabho, ku igho mbakanyisyoreyi nekabha hweniri.'

¹⁶ Naho amaiso ghabho ghaitabheribhwa kobhora nkorora ghare, (na) amatwe ghenyu bhora ghakwighwa. ¹⁷ Mbhohene nkobhatebhya abharoti bharu naabhanto abhahene mbaighombire komaha ghano mokomaha bhono, nawe tebhahikire kogharorahe. Bhakaighomba kwighwa ghara mukwighwa, nawe tebhaghaighurehe.

¹⁸ Bhono mwighwe ekerengyo ikyu umubhusuri. ¹⁹ Enkagha yoyonswe hano yaighwa eng'ana yo obhonene nho omoghogho akusha no okomosaka kera kyatorwa monkoro yaye. Eno niimbusiro eno yabhusurwe mbhareka ye enshera. ²⁰ Ono yemibhwi momaghene nora akwighwa eng'ana no ukuyitabherya bhongo nu ubhushomerwa. ²¹ Oranyore tana umurihe, no okobha okoghomerya ko nkagha nyeng'e. Enkagha inyanko ne etabhu hano yabha ko bhora ye eng'ana nkwituraturare kamwe. ²² Ono yemibhwi momete ghate ighya momahwa, uyo nora yaighure eng'ana nawe inyanko yi ikyaro no obhorongo ubhu ubhwame bhora rehegha eng'ana iyo etakama shyehagho. ²³ Ono yemibhwi ko amarobha amaiya, ono no ora yaighure eng'ana no okyemanya. Ono nora akwebhora shehagho no okoghenderya kwebhora emwe bhokong'u kotambhokya ighana ishyende merongo esansabha, ishyende merongo etato."

²⁴ Yesu akabhaha ekerengyo kyende. Akaghamba, "Obhonene ubhwa mwisaro mbhutubhanibhwi no omonto ono yemiri entetere inshiya momoghondo ghwaye. ²⁵ Naho abhanto hano bharaye, abhabhisa bhaye bhakasha bhonswe kwemya entoki ghate ghate ye eng'ana bhakamara bhakaghya shyabho. ²⁶ Hano engano yamere no okosamunsa, nho entoki yonswe yarishokire. ²⁷ Abhabhaghati abha mwene moghondo bhaishire komotebhya, 'Omokama, tuwemiri entetere inshiya momoghondo ghwaho? Niyake ebhaye bhono ghona entoki?

²⁸ Akabhatebhya, Umubhisa we akore riyo.' Abhabhaghati bhakamotebhya, "Ku igho oratuna tughi toghaihe?"

²⁹ Mwene moghondo akaghamba, 'Tighohe, enkagha moraihe entoki moraiherani ne engano. ³⁰ Muyitighe entoki iyo bhekenere hamwe kohekera kokoghesa. Enkagha nendeghamba ko bhaghesi, 'Bhasimi kwiha entoki bhayekomani no okoyesamba, bhamare bhakomani engano moketara kyane.'"

³¹ Ghweki Yesu akabhatebhya ekerengyo kyende. Akaghamba, "Obhonene ubhwa mwisaro bhoratubhana ne entetere (ya) haradali eno omonto yagheghire no kuyemya momoghondo ghwaye. ³² Entetere eno mahene nenke kokera ishyende shyonswe. Naho hano yamera nkobha ere nene kokera emete ghyonswe ighya mwisiko, nkobha ghore omote, kohekera igha ibhinyonyi kohaghashako ubhusu komasagharya ghako."

³³ Akabhatebhya ekerengyo kyende ghweki. "Obhonene ubhwa mwisaro nkyo obhotondoru bhono bhwagheghirwe no omokari akaishoghaniane ebherengero bhitato ibhyo obhose okoreke bhwebhoke.

³⁴ Ghayo ghonswe Yesu akaghaghamba mobhanto ku bherengyo. Hano ebherengyo bherabhoreho te yaghambire kentohe. ³⁵ Eno yarenge igha kera kyaghambwa kohetera omoroti ketore kuhika kukihiko, hara yaghambire, "Ndenanorya umunywa ghwane ko kerengyo. Nendeghamba amang'ana ghara ghareghabhiswa kurwa bhotange bhwa kyaro."

³⁶ Ho Yesu yatighire esango iya abhanto bhara akaghya ka waye. Abhana bhegha bhaye bhakamughyako no okoghamba, "Twanshore ekerengyo eke entoki iya momoghondo."

³⁷ Yesu akabhahonshokerya igha, "Ono akwemya entetere inshiya no Omona uwa Adamu. ³⁸ Omoghondo nkyaro; entetere inshiya, bhano mbhana abha mobhokama. Entoki mbhana abha omosarya ora, umubhisa ono yemiri uwe risambwa. ³⁹ Okoghesa engeso niikihiko iki ikyaro, abhaghesi mbho abharaghe. ⁴⁰ Kobhora entoki ekokomanibhwa no okosambhwa no omoro, nigho erebha ku kihiko iki ikyaro. ⁴¹ Omona uwa Adamu naretoma abharaghe bhaye, no okokomania kukurwa mobhanene bhaye amang'ana ghonswe ghano ghaghire ibhitimba nabhara bhakokora amasaryo. ⁴² Mbharerekerwa mwibheri ryo omoro, eno harebha niikikuro no okotakunya amaino. ⁴³ Hayo nho abhanto abhahene bharyoka ke eryobha mo obhokama ubhwa Suwabho. Ono anaamatwe aighwe.

⁴⁴ Obhokama ubhwa Mwisaro nkye emongo eno yabhiswa mo moghondo. Omonto akayemaha no ukuibhisa. Kubhushomerwa akaghya koghorya bhyonswe bheno yarenge nabhyo, no okoghora omoghondo.

⁴⁵ Ghweki, obhokama ubhwa mwisaro nkyo omonto ono aakushurusha ono akutuna ilulu iyu ubhwera. ⁴⁶ Enkagha era yaroshe ubhwera bhwako, yagheye akaghorya kera ekento keno yarenge nakyo (no) okoyeghora.

⁴⁷ Obhonene ubhwa mwisaro nkyo omotegho ghono ghorenge munyansha, nkokomania ghore kera ekento. ⁴⁸ Hano ghweshora abhaghokori mbhaghurutire komorambo. Bhakamara bhakaikara hanse bhakakomania ebhento ibhiya mobhento, nawe bheno bhetana ubhwera bhakabhetabhuta hare. ⁴⁹ Nigho erebha ku ikihiko iki ikyaro. Abharaghe mbarisha no okotegha abhanto abhasarya kurwa mobhahene. ⁵⁰ No okobharekera mwibheri iryo omoro, hano harebha ne ekero ukwarama kono kotakohwa no okotakunya amaino.

⁵¹ Momanyire amang'ana ghonswe ghano? Abhana bhegha bhakamohonshokerya, "Mbhohene."

⁵² Nho Yesu yaghambire, "Kera omokonikoni ono yabhaye omona mwegha uwo obhokama aratubhana namwene ighutu ono akurusya ko mongo yaye ebhento ebhehya (na) ibhyakare."

⁵³ Ekabha igha Hano Yesu yamare kurusya ebherengyo bhiyo, akemoka kurwa entahana iyo. ⁵⁴ Nho Yesu yahikire morong'ongo rwaye no okobheghya abhanto mwi sengero. Bhakaroghora no okoghamba, "Nhayi omonto ono yanyora esoko ne ebheroghoryobheno? ⁵⁵ Omonto ono to omona uwa omohori (wa) shembao? Nyakuwabho te Mariamu? Bhawamwabho te Yakobo Yusuph, Simoni (na) Yuda? ⁵⁶ Abhahara bhabho ntonabho weto hano? Bhono omonto ono hai yanyora ghonswe ghayo?"

⁵⁷ Yabharereyi. Naho Yesu akabhatebhya, "Omoroti takobhora kobha ne esoko wabho (na) kukyaro kyabhohe. ⁵⁸ Ghweki tiyakore bherengyo bhyende ko kobha tebharenge bharamwitabheryahe.