¹ E tusa le malo o le lagi ma taupou e sefulu na ave a latou lamepa ma o atu e fa'afetaia'i i le fa'atoāfaiavā. ² Ua popoto le toalima o i latou ae vālea le toalima. ³ O ē vālea ua ave a latou lamepa, ae lei avea ma ni suāu'u. ⁴ A'o ē popoto ua ave ni suāu'u i a latou fagu fa'atasi ma a latou lamepa. ⁵ Ua tuai mai le fa'atoāfaiavā, ona taufaitulemomoe ai lea o i latou uma, ua momoe lava. ⁶ A ua o'o i le tulua o po ona sau ai lea o le alaga, 'Fa'auta, ua sau le fa'atoāfaiavā, inā o ia outou e fa'afetaia'i ia te ia.' ⁷ Ona tutū ai lea i luga o taupou uma, ma teuteu a latou lamepa. ⁸ Ona fai atu lea o e vālea i e popoto, "Aumai ni a outou suāu'u mā matou, auā o le ā mamate a matou lamepa." ⁹ A ua tali mai o e popoto, ua fa'apea mai, "Ne'i le lava ia i matou ma outou; ae lelei ona outou o i e fa'atau ma fa'atau mai ai ni a outou." ¹⁰ Ua latou o e fa'atau, ona sau ai lea o le fa'atoāfaiavā; o i latou fo'i o e ua sauni ua ulufale atu fa'atasi ma ia i le tausama'aga, ona pupuni ai lea o le faitotoa. ¹¹ Mulimuli ane, ona omai ai lea o isi taupou ua fa'apea mai, "Le Alii e, Le Alii e, se'i e tatala mai le faitotoa (puipui) mo i matou. ¹² A ua tali atu o ia, ua fa'apea atu, "E moni, ou te fai atu ia te outou, ou te le iloa outou." ¹³ O lea, ia outou mata'ala, auā tou te leiloa le aso ma le itu aso. ¹⁴ E fa'apei o le tagata foi o le a alu malaga. Ua vala'au e ia ana auauna ma tu'uina atu iai o ana mea latou te vaaia. ¹⁵ Ua avatu e ia taleni e lima i le tasi, a e lua i le tasi, a e tasi i le tasi. Ua taitasi ma latou maua mai e fa'atatau i le mea ua mafai ai e le tagata; ona alu loa lea o ia i lana malaga. ¹⁶ Ona alu ai lea o le na iai taleni e lima ma fa'atau atu, ua maua ai fo'i isi taleni e lima. ¹⁷ Ua fa'apea foi i le na iai taleni e lua, ua maua ai foi e ia le tasi lua. ¹⁸ A'o le auauna na iai le tasi, ua alu ma eli le pu i le eleele, ua nanā ai taleni (ario) a lona alii, ¹⁹ Ua mavae po e tele, ona fo'i mai ai lea o le alii o ia auauna ma fa'amasino i ana mea ua ia te i latou. ²⁰ Ona sau ai lea o lē na iai taleni e lima ua aumai ma isi taleni e lima. Ua fa'apea mai, "Le Alii e, na e tu'uina mai ia te a'u taleni e lima, fa'auta ua ou maua ai isi taleni e lima. ²¹ Ona fetalai atu lea o lona alii ia te ia, "Ua lelei ia, le auauana lelei e ma le fa'amaoni! Ua e fa'amaoni i mea itiiti, ou te tofia oe e pule i mea e tele. Inā ulufale maia i le fiafia o lou alii." ²² Ua sau foi le ua iai taleni e lua, ua fa'apea mai, "Le Alii e, na e tu'uina mai ia te a'u taleni e lua, fa'auta, ua ou maua ai isi taleni e lua. ²³ Ona fetalai (fai) atu lea o lona alii ia te ia, "Ua lelei ia, le auauna lelei e ma le fa'amaoni! Ua e fa'amaoni i nai mea itiiti, ou te tofia oe e pule i mea e tele. Inā ulufale mai ia i le fiafia o lou alii." ²⁴ Ua sau foi lē ua iai le taleni e tasi, ua fa'apea mai, "Le Ali e, na ou iloa o oe o le tagata faigata, e te selesele i mea e te le'i lūlūina, e te fa'apotopoto fo'i mea e te le'i fa'ata'ape'apeina; ²⁵ Ona ou fefe ai lea, ua ou alu ma nanā lau taleni i le eleele. Fa'auta, o lau mea lea." ²⁶ Ona tali atu ai lea o lona Alii, ua fa'apea atu ia te ia, "Le auauna leaga e ma le paiē, ua e iloa ou te selesele i le mea na ou lē lūlūina, ma fa'apotopoto i le mea ou te lei fa'ata'ape'apeina. ²⁷ O le mea lea sa tatau ai lava ona e tu'uina atu la'u taleni i ē fa'atau tupe, po ua ou sau, ona ou maua mai ai lea o la'u taleni (ario) ma lona taui. ²⁸ O lenei, ia outou fao ese le taleni nai ia te ia, ma avatu i lē ua iai taleni e sefulu. ²⁹ Auā o sē ua iai ni mea e foa'iina atu ia te ia e atili tele ai ana mea, a'o lē ua leai ni mea, e faoa le mea ua i ai. ³⁰ Ia outou tulia foi le auauna lē aogā i fafo i le pouliuli, e iai le tau faitagiauē ma le lilivau o nifo. ³¹ Pe a afio mai (sau) le Atali'i o le tagata i lona mamalu ma le au agelu uma fa'atasi ma ia, ona tietie ai lea o ia i lona nofoali'i mamalu. ³² E fa'apotopotoina fo'i i ona luma o nu'u uma lava; ona tu'ueseeseina lea o i latou e ia, e pei o le leoleo mamoe ona tu'ueseeseina o mamoe ma 'oti. ³³ E tu'uina foi e ia o mamoe i lona itu taumatau, a'o oti i lona itu tauagavale. ³⁴ Ona fetalai (fai) atu lea o le Tupu i ē o i lona itu taumatau, "Omai ia, o outou ua fa'amanuiaina e lo'u Tamā, ia fai mo outou tofi le malõ ua saunia mo outou a'o le'i fa'avaeina le lalolagi. ³⁵ Auā na ou fia ai, ona outou avane ai lea ni mea ou te ai ai; na ou fia inu, ona outou avane ai lea ni vai ou te inu ai; sa fai a'u ma tagata ese, ona outou talia lea o a'u; ³⁶ na ou lē lavalavā, ona outou fa'aofuina lea o a'u; na ou i le falepuipui, ona outou o ane ai lea ia te a'u." ³⁷ Ona tali mai lea ia te ia o e amiotonu, e fa'apea mai, "Le Alii e, o anafea lava na matou iloa ai oe ua fia ai, ma matou fagaina oe? po o fia inu, ma matou avane ai e te inu ai? ³⁸ O anafea fo'i na matou iloa ai oe le tagata ese, ma matou talia oe? po o le lē lavalavā ma matou fa'aofuina oe? ³⁹ O anafea foi na matou iloa ai oe ua ma'i, po o i le fale puipui, ma matou o atu ai ia te oe? ⁴⁰ Ona tali atu ai lea o le Tupu e faapea atu ia te i latou, "E moni ou te fai atu ia te outou, auā na faia e outou i le tasi o ē aupito itiiti o o'u uso nei, o a'u lea na outou faia i ai." ⁴¹ Ona fetalai atu (fai) fo'i lea o ia i ē ua i lona itu tauagavale, "Outou ua fa'afanoina, o ese atu ia outou ia te a'u i le afi e fa'avavau, ua saunia mo le tiapolo ma ana agelu. ⁴² Auā na ou fia ai, ae tou te le'i avane ni mea ou te ai ai, na ou fia inu, ae tou te le'i avane ni vai ou te inu ai; ⁴³ sa fai a'u ma tagata ese, ae le'i talia a'u e outou, na ou lē lavalavā, ae tou te le'i fa'aofuina a'u; na ou ma'i ma ou iai a'u i le falepuipui, ae e tou te le'i asia a'u." ⁴⁴ Ona tali mai ai lea o i latou foi ia te ia, e fa'apea mai; "Le Alii e, o anafea ea na matou iloa ai oe ua fia ai, pe fia inu, po se tagata ese, pe lē lavalavā, po o ma'i, po o i le falepuipui, ma matou le'i auauna atu ia te oe? ⁴⁵ Ona tali atu lea o ia ia te i latou, ua fetalai atu. " Emoni ou te fai atu ia te outou, auā na outou lē faia i le tasi o ē aupito itiiti o i latou nei, o a'u lava lea ua outou lē faia i ai. ⁴⁶ E o atu fo'i i latou na i le sala e fa'avavau, a'o e amiotonu e o atu i le ola e fa'avavau.