¹ Ua tusa le malo o le lagi ma le matai e ona le fanua, na ala usu i le taeao e saili nisi e faafaigaluega i lona tovine. ² Ina ua malilie o ia ma le au faigaluega i le tenari e tasi i le aso, ona ia auina atu lea o i latou i le tovine. ³ O le mae'a o itula e tolu ona toe alu ai lea o ia ma tau atu i tagata e leai ni galuega o lo o tutu i le maketi. ⁴ Ona ia fai atu lea ia te i latou, "Ia faapea fo'i outou, ina outou o atu ia i le tovine, ae oute avatu ia te outou se totogi talafeagai". Ona o lea o i latou e faigaluega. ⁵ 5. Na toe alu o ia ina ua uma itula e ono, na faapena fo'i ina ua maea itula e iva, ma fai lava le mea e tasi. ⁶ Na faapea fo'i ina ua mae'a itula e sefulutasi, na alu o ia ma tau atu i tagata o lo o tutu e leai ni mea o faia. Ona ia fai atu lea ia i latou, "Aisea ua outou tutu ai faapea i le aso atoa e leai ni a outou mea o faia". ⁷ Ona latou tali mai lea ia te ia "Ona e leai se tasi e mana'o e faafaigaluega i matou". Ona ia tali atu lea ia i latou. "Ia faapea fo'i ona o atu outou i le tovine". ⁸ Ua oo i le afiafi, ona fai atu lea o le ona le tovine i lana pule. "Valaau le au faigaluega ma fai o latou totogi, amata mai i e na mulimuli mai i e na muamua mai. ⁹ Ina ua o mai le au faigaluega na amata i le itula e sefulu ma le tasi, na taitoatasi i latou ma ia maua le tenari. ¹⁰ Ina ua o mai le au faigaluega na muamua mai, na manatu i latou e tele atu lo latou totogi, ae na maua fo'i e i latou taitoatasi le tenari e tasi. ¹¹ Ina ua maua o latou totogi, ona latou faitio lea i le ona le fanua ¹² Ua latou fai atu "O le au faigaluega lea na mulimuli mai e na o le tasi le itula na galulue ai, ae ua e totogi tutusa i matou, ae na matou tigaina i le mamafa o le galuega ma le vevela o le aso." ¹³ Ae na tali atu le ona le fanua i le tasi o i latou. "La'u uo e, oute le i faia se mea sese. Na ta malilie i le tenari e tasi? ¹⁴ Alu ia oe ma ave au meatotino, na ou filifili e totogi tutusa outou ma i latou na faafaigaluega mulimuli mai. ¹⁵ E le o la'u lea pule faitalia, oute faia le mea oute mana'o ai i a'u lava mea? Po o e lotoleaga ona o lo'u lelei? ¹⁶ "O le a avea le mulimuli ma muamua, ma avea le muamua ma le mulimuli" ¹⁷ Ina ua alu a'e Iesu i Ierusalema, na Ia ave ona soo e sefulu ma le lua, a o alu la latou malaga ona Ia faapea atu lea ia i latou. ¹⁸ Ia outou iloa, o lea ua tatou o a'e i Ierusalema, ma o le a tuuina atu le Atalii o le Tagata i ositaulaga sili ma le 'au tusiupu. Ma o le a latou faasalaina o Ia i le oti. ¹⁹ O le a ave atu fo'i o Ia i nuuese e amusia ai, sasaina ma faasatauroina o Ia. Ae o le a toe faatu mai o Ia i le aso tolu. ²⁰ Ua sau ia Iesu le tina o atalii o Sepetaio ma aumai ona atalii. Ona ifo lea o ia i ona luma ma ia faatauanau atu ia te Ia. ²¹ Ona fai atu lea o Iesu ia te ia "O le a se mea o e manao ai?" Ona ia tali atu lea ia te Ia, "Ia faapea ona e faasino le mea e nonofo ai la'u fanau lea e toalua i lou malo, o le isi e nofo i lou itu taumatau a o le isi i lou itu agavale. ²² Ae tali atu Iesu ma faapea atu "E te le iloa le mea o lo o e fai mai ai nei. E te mafaia ona e inu i le ipu lea o le a ou inu ai?". Ona latou fai mai lea ia te Ia "E matou te mafaia". ²³ Ona Ia toe fai atu lea ia i latou "E mafai ona e inumia La'u ipu, a o le nofo i lo'u itu taumatau ma lo'u itu agavale, e le o ia te A'u lea e ave atu, ae e mo i latou ua saunia i ai e Lo'u Tama" ²⁴ Ina ua faalogo i ai le isi toasefulu o le au soo, ona tiga ai lea o i latou i le au uso nei e toalua. ²⁵ Ua valaau atu Iesu ia i latou e o mai ona Ia faapea atu lea "Ua outou iloa o alii o nuuese ua pule i latou, o i latou taua fo'i ua pule ia i latou. ²⁶ Ae le tatau ona faapea outou. O ai lava o outou e manao e sili ia avea o ia ma auauna. ²⁷ O ai lava o outou e manao e avea ma le muamua ia avea o ia ma auauna, ²⁸ E pei ona le i sau le Atalii o le Tagata ina ia auauna mai tagata ia te Ia, a ia auauna atu, ma foaina atu lona ola e fai ma tau e totogi e sui a'i tagata e toatele". ²⁹ Ua o ese mai i latou mai Ieriko, ma ua mulimuli atu fo'i ia te Ia tagata e toatele. ³⁰ Na i ai tamaloloa tauaso e toalua na nofonofo i autafa o le auala. Ina ua la faalogo ua oo mai Iesu ona la alaga atu lea, "Le Alii e, le Alo o Tavita, ia e alofa mai ia te i maua". ³¹ A ua taofi atu i laua e le motu o tagata ma fai atu ia i laua e fifilemu, ae ua atili ai ona toe alalaga leotetele i laua, "Le Alii e, le Alo o Tavita, ia e alofa mai ia te i maua". ³² Ona tu lea o Iesu ma valaau atu ia i la'ua ua faapea atu, "O le a le mea e te lua mananao oute faia mo oulua?" ³³ Ona tali mai le o i la'ua "Le Alii, ia pupula o ma'ua nei mata" ³⁴ Ona tele ai lea o le alofa o Iesu, ua Ia pa'i atu i o la mata. Ona faafuase' lea ona pupula o i la'ua, ona la mulimuli atu ai lea ia te Ia.