¹ Ago mango omu irungu ly'e Yudeya; mwa shoshoka omuntu w'aj'ay'igiriza. ² Akag'iderha, mpu: “Gokoli bulya obwami bw'e mpingu buli hofi.” ³ Yohana ye waderhagwa n'o mulebi Isaya erhi akaderha, mpu: “Er'izu liri ly'oli abalanjira omwirungu, mpu: Rheganyi enjira ya Nnâhamwirhu muna kubule aho agera.”

⁴ Yohana al'igwerhi omushangi gw'obwoya bw'engamiya, ali shekire n'omukaba gw'oluhu omu cibuno cage. Akag'irya enzige n'obuci bw'omu lubala ⁵ Abantu b'e Yeruzalemu, ab'e Yudeya boshi n'ab'e bihugo byoshi byal'iyegerire e Yudeya; ⁶ banaka hunguma e byaha byabo banaka babatiza omu lwishi lw'e Yordani ⁷ Ci kwone, Bafarizeyo banji n'Abasandukayo, ababona bayish'ire obubatizo bwage, ababwira, erhi: “Eci cibusi c'e njoka, nndi wabakengulaga oku yaka oburhe buli njira?” ⁸ Mulehekage amalehe g'oku gokola, ⁹ ciru murhaci rhanye omu mirhima yinyu, mpu: “Rhuli na larha y'e Ibrahimu!” Bulya Nyamuzinda anarhegeza Ibrahimu abana omu aga mabuye. ¹⁰ Embasha ekola eri oku cisina c'omurhi, ngasi murhi gurhaleheka amalehe minja, gwa twibwa n'oku kabulirwa omu muliro.

¹¹ Mbabatizize oku mishi bulya mwamagokola. Cikwone oyishire enyuma zani, ye mudarhi kuli nie, ntagerhi obuhashe bw'oku shunula emigozi y'ebirato byage. Ye wa babatiza oku Mûka n'oku muliro. ¹² Agwerhe olwibo lwage omu maboko, ali acesa oluganda lwage obulo abubike omu nguli n'ebihuhulu abiyoce n'omuliro gurhakazima.

¹³ Lero Yezu, anac'iyisha arhenga Galilaya aj'e Yordani, mpu nayhe abatizibwe n'oyo Yohana. ¹⁴ Cikwone Yohana alahira, aderha mpu: “kurhi wankabwira nnkubatize? N'obu we shinganine oku mmbatiza” ¹⁵ Yezu amushuza, erhi; “Jira ntyo mashi, bulya ntya rhugwasirwe rhu hikirize ngasi ebiri binja” Okuhandi Yohana ayemera.

¹⁶ Erhi Yezu ayus'ibatizibwa arhenga omu mishi. Ho n'aho, empingu za yiguka anac'ibona o Mûka gwa Nyamuzinda gwayandagala nka ngûku gwa murhwakwo. ¹⁷ Aho izu lya yumvikana empingu, lyaderha, mpu: “Oyu ali mwana wani muzigirwa, o nnsimisa.”