¹ Awoo nibaiza edi oYeesu aBafalisaayo nabawaandiiki abakuzwa omu Yerusaalemi nga bakoba ntti, ² Abeegesya abamwe kiki ekibasiissya emikiiro kiiro gyetwawebwebwe abakaire? olwakubba tibanaaba ngalo nga bakulya emeere.

³ Nairamu nabakoba naanywe kiki ekibasiisisya riteeka rya Nyamwanga olwa mikiiro kiiro gyemwawebwebwe? ⁴ Olwakubba oNyamwanga yakobere nti, oteekangamu oiteewo nomaawo ekitiinisya nowoondi ali zzuma otaamwe nomaamwe bamwiiteengembe.

⁵ Naye nywe mukoba nti buli alikobaanga oitaamwe obba omaamwe ntikyoona kyoona kyenandikuwaire okkugasa nkiwaire oNyamwanga. ⁶ Alyerabira okutaamu ekitiinisya omwiito waamwe, mwadibirye ekigaambo kya Nyamwanga olwa mikiiro kiiro gyanywe ggyimwawebwebwe. ⁷ Nywe abanakiweweita, OIsaaya yalagiire kusai okunywe, nakoba nti, ⁸ Abaantu bani banteekamu ekitiinisya kya kumunnwa nayete omyooyo gyaanywe giri alai. ⁹ Nayete baantekeramu bwerere nga bakweegesya ebiragiro byabaantu bya bakwaata.

¹⁰ Nayeta ebibiina nabakoba nti, muwuliirye, mweetegye. ¹¹ Ekiingira omumunnwa nti nikyo kisiisa omuuntu nayete ekizwaamu, nikyo kisiisa omuuntu.

¹² Awoo Abeegesya nibaiza nibamukoba ntti; omaite aBafalisaayo nga baanyiigire, nibaawuliire ekigaambo ekyo? ¹³ Yeena nairamu nabakoba nti buli kisiimbe oito waange kyaata siimbire omuwe kiri siimbulwa. ¹⁴ Mubaleke abasaale obatabonnya. naye omwiigali wa maiso nakuleembera omwiigali omiraamwe boonaboona baliggwa omukiina.

¹⁵ OPeetero nairamu namukoba nti ruunguura olugero olwo.

¹⁶ Yeena nakoba nti eraa nyweena mukyaali kubona magezi. ¹⁷ Tukumweetejja tuti, buli ekikwiingira omunnwa nikinagibwa omkiigo. ¹⁸ Nayete, ebikuuluka omunnwa bikuzzwa kumwooyo, nibyo ebikusiisa omuuntu. ¹⁹ OLwakubba nti omwooyo nimwo muzzwa endowooza ezibbi, obwiiti, obusiyaani, obukaba, obwiibbi, okwaangiirya, nokuzzuma. ²⁰ Ebyo nibyo bisiisa omuuntu: naye okulya nga tonaabire mungalo tikusiisa muuntu.

²¹ OYeesu nazwaayo nayaba okunjuui zaamwe Ttulo ne sodoni. ²² Alee, bona omukazi omukanani nazwa okumbibi eyo, nabazira aiguru nga akoba nti onsasire oNYamwanga waange, omwaana wa Dawudi Owaara waange alwaire omuno odayimooni.

²³ Naye natairamu kigaambo. Abeegesya baamwe nibaiza nga bakoba nti musiibule kubaanga atukokomeera ekaizuli.

²⁴ Yeena nairamu nakoba nti tinatumiibwe wazira eddi Entaama ezaabure eza munyubba ya Isiraeri.

²⁵ Yeena naiza namuramya nga akukoba nti Nyamwanga waange nyaamba.

²⁶ Nairamu namukoba nti, tikisai kwiirira mere yabaana noginagira embweene.

²⁷ Yeena nakoba nti nimwo Nyamwanga waange kubba neembweene zirya obukuunkumuka obuzwaa okumeeza yamukama waamu.

²⁸ OYeesu nairamu namukoba nyi we omukazi, okwiikiriza kwaamu kukooto kibbe jooli nkanokweendya omwaara nawona okuzzwa okukiseera ekyo.

²⁹ OYeesu nazwaayo, naira okulukeito olwanyaanja eyaGaliraaya, naniina okulusozi, naikaara okwo. ³⁰ Ebibuura biingi nibiizajaali nga balimu abukukyoodera, abakasiru, nabalema, nabaandi baingi nibabata awali amagulu gaamwe nibataambbibwa. ³¹ Eibuura nokwewunakya nibenaikya, baabweine abakasiru nga bakubaza nabakukyoodera nga bakutaambula, nibaramya oNyamwanga wa Israeri.

³² OYeesu nayeta abeegesya nabakoba nti Nganyira abaantu kubaanga ereero baakamala naanje ebiro bisatu, nga tibayina kyakulya: nokubasiibula nga baina enzala tikukyeendya kaanda babbalukira omwaanda.

³³ Abeegesya nibamukoba nti twayajja ayi owa migati Egiingi giti omiiruungu ejjaikutisya ekibiinja ekikootoekikweenkana anii? ³⁴ OYeesu nabakoba nti mulina emigaati imekai? nibamukoba nti musaanju, nebinage bitono tibiingi

³⁵ Nalagira ekibiinja okwiikala ansii; ³⁶ Natoola emigaati musaanju nebinage niyeebalya namenyamu nawa aBeegesya, aBeegesya nibagabira ebibuura. ³⁷ Nibalya boona nibaikuta nibakumbaanya obukuunkumuka obasigairewo ebigega musaanju ebyaizwiire. ³⁸ Nabo abaalire baali enkumi inai (4,000), abakazi mabana obutabagaitaku.

³⁹ Nasiibula ebibuura, naseeyeya omuryaato naiza oMumbibi ya Magadani.