¹ Gu nyima ya gu butuga gwa Yesu gu Beteleyemi gu Yudeya mu tangwa dia fumu Elode, enya gu longuga themwa a katugile gu Yelusalemi a hudile egi: ² " Gwi gudi yonu wa katuga gu butuga, Fumu wa ba yuda? Ta katuga gu mona themwa yenji gu khanda ya mazogelo a tangwa hene te za ha gu mu hwa lukumu." ³ Tangwa fumu Elode a vile nganyi wa bwile gisaga-saga, nu dimbo dikima. ⁴ Elode wa bungishile mafumu a nganga nzambi nu a longi a shigo wa a hudile egi: " Gwi gwa butuga Kilistu? ⁵ A mu vutudile egi: " Gu Beteleyemi gu Yudeya, mukunda tala ndaga ya sonegeye gwa profeta: ⁶ " Eye Beteleyemi, dimbo dia gu Yudeya, udi ga dimbo ga moshi ga phamba mu katshi dia membo a gu yudeya, uvi mu katshi diaye mba gu zoga muthu yonu mba u twameza athu ami a gu Izalayele." ⁷ Gu nyima, elode wa tamegele mu giswegi enya gu longuga themwa ha gu a hula tangwa khi gibeni a monele themwa. ⁸ Wa a tumile gu Beteleyemi nu gu zwela egi: ' Ndenu mu kambe mwa bonga bonga mona mwene. Gula mwa mu mona, ngu lezenu mu phushi mukunda n'eme ngu ye ha gu mu hwa lukumu." ⁹ Gu nyima ya gu solula nu fumu, a hatele njila yawo enji amonele themwa yene inyi a monele gu khanda ya mazogelo a tangwa, ya kalele mu ya ti ya ile mu magana hama hanyi ha kalele mona mwene. ¹⁰ Tangwa a monele themwa yene, a vile kiese gia vula ¹¹ A ngidile monzo a monele mona nu ginenji Mariya. A fugamele ha gu mu hwa lukumu. A kangudile sagi a mu hwile makapho a gu vugisa nu wolo, nu ima ya nu tamegeya egi asa, nu mire. ¹² Nzambi wa a jiyishile mu nzoji ha gu konda gu vutugila mu njila ya dimbo dia Elode; hene a vutugile gu dimbo diawo mu njila iko. ¹³ Gu nyima ya guya gwawo, wanjo mu moshi wa monegele gwa Yozefi mu njila ya nzoji enji wa mu lezele egi: " zuga, zula mona nu ginenji, lenga nawo gu Ejipito. Bega gwene ti nu gilumbu mba ngu gu jiyisa gu ndaga ya Elode mukunda udi mu kamba phila ya gu shiya mona." ¹⁴ Kaka mu phipha yene, Yozefi wa zugile wa zudile mona nu ginenji a ile gu Ejipito. ¹⁵ Wa begele gwene ti nu gu lufwa lwa Elode. Ndaga yene mukunda nu gu lungisa ndaga ya zwelele Fumu mu njila ya profeta egi: " Nga tamegele Munami ha guya gu Ejipito." ¹⁶ Gu nyima tangwa Elode a jiyile egi enya gu longuga themwa a mu dimbile, wa vile khabu. Wa tumile athu ha gu shiya ana amala akima a mvula jiyadi bulumuga a kalele gu Beteleyemi nu mu membo a mu khanda, wanyi a butugile yandiga tangwa enya gu longuga themwa a jiyishile ndaga jene. ¹⁷ Nganyi, ndaga ya sonegeye gwa profeta Yeremia ya lungisamele: ¹⁸ Milolo ya viye gu Rama, nu idilo nu ya phashi ja vula, Rachel wa kalele mu dila anenji, enji wa tunyile ha gu heneseya mukunda mba gwa a monyi nji go. ¹⁹ Tangwa dia file Elode, tala wanjo mu moshi wa Fumu wa monegele gwa Yozefi mu njila ya nzoji gu Ejipito wa mu lezele egi: ²⁰ " Zuga; zula mona nu ginenji vutuga mu dimbo dienu gu Izalayele mukunda wanyi a kambele ha gu shiya mona a fi gale." ²¹ Yozefi wa zugile, wa zudile mona nu ginenji a vutugile mu dimbo dia Izalayele. ²² Uvi tangwa a vile egi Arkelusi wa zula giyega gia gu yala gu yudeya ha gu inga shenji Elode, wa vile woma. Gu nyima Nzambi wa mu jiyishile mu nzoji, hene a ile gu khanda ya gu Galileya ²³ mu jinga mu dimbo mi moshi dia nu tamegeya Nazareti. Yiyi mukunda nu gu lungisa ndaga ya sonegeye gwa profeta ya kalele mu zwela egi mba udi mu tamegeya egi mwenya gu Nazareti.