2
Alih vey yei sarapu mihpoh

1 Lūngaleypu anārbou mehda, nananh diywēn sachi vapu hananh nalhaa leira̠k yakey-u. Dimih thaki nanh diywēn samēn tatugadhunpu mihpu Jishu Khrista sarapu alih vey yei sābou Deimei dou beipuh phāwn na̠nh tangouyeou.

2 Doupu mihpudou alih vey diywēn tali ka̠hra, nōnōnpu mihmeh vey diywēn chanaang thennih vapu saneiu.
Khrista vey yei sābou

3 Doupu mihpu pwensuih naang theikaza̠k gourapu dou ka̠hra theiyerouu rapuli nīnnih rapu ngaktatu theiyeou.
4 Mihpu na̠nh theiyeou, ruetanzi nīnnih rapudou ngakmukpu mihdou nihgaleh mih-u. Beidou garinrapu ngakchou.
5 Deimei vey dlo lorapu mihdou Shuri na̠nh lūnley rapu ba̠zina̠ng phreydan rou. Alihnanh Deimei cha tasa ngouuyeou, rapudou douvey ngana̠ng theilo yeou.
6 Hananh Deimei cha tasa ngouuyeou ra hwangrapu mihdou doupu Deimei vey ba̠sheh ba̠lengnei saba̠lung yeo.
Nīnnih rapu ka̠dhen

7 Lūngaleybou mehda, nalhaa hananh yakrapu nīnnih rapu hey ka̠dhen ka̠hrou. Gakhwa naang nakuk na̠nh ngouurapu nīnnih rapu gawōnpu dlo dou nananh gakhwa na̠ng yuehzatou.
8 Hananh nalhaa nīnnih rapu ka̠dhen yaklen ney-u. Doupu mihpu ngana̠ng leh, nameh ngana̠ng leh, ka̠dhen vanzang yeou. Chhourārouu rapuli yikgamā dou mannei gavengdou vengnei ngouyeou.
9 Beichi nārbou na̠nh tinmēnkou ha gavengna̠nh ngouuyeou ra hwangrapu mihdou atui na̠ngngaapa yika̠māna̠nh ngouupa rweiyeou.
10 Beichi nārbou na̠nh lūnley rapu mihdou gaveng na̠nh ngouuyeou. Shonh kehtei parrapu veychuin dou beimana̠nh ngouuchou.
11 Beichinārbou na̠nh tinrapu mihdou yika̠mā shungna̠nh ngouuyeou. Yikgamā shungna̠nhli nōnōnye tangouuyeou. Yikgamā ngana̠ng beivei na̠ktheicha bei kouna̠nh zehdeirouurapu theichau.
Naarbou, puhbou, nihtabou lhaa yakrapu vey chuin

12 Lūngaleypu anārbou mehda, nameh nanh doupu Deimei vey na̠nnaang diywēn gama̠ng phrarnih zarapu nganaang namehlhaa hananh leira̠k yakey-u.
13 Apuhbou mehda, gakhwa naang beina̠nh theiza rapu nganaang hananh nalhaa leira̠k yakey-u. Nihtabou mehda, namehnanh veimukpu yei na̠nh yokthuih rapungana̠ng namehlhaa hananh yaklo diwūnyeou. Nihtabou mehda, namehnanh beipuh na̠nh theirapu ngana̠ng namehlhaa hananh yaklo diwūn yeou.
14 Apuhbou mehda, gakhwanaang beina̠nh theizarapu nganaang hananh nalhaa leira̠k yakkou ratou. Nihtabou mehda nameh nanh renna̠ng phreydanra Shuri vey Gathenpu dlo na̠nh meyye dirāwu ka̠shihpu na̠nh yokrapu ngana̠ng nalhaa hananh leira̠k yakzatou.
15 Leimagabou ka leimagabou na̠nh ngouurapu yeina̠nh lūngaley kangouu nihrouu. Nōnōnpu na̠nh ngūn rapu mihdou beipuhna̠nh lūngaley ngouuchou.
16 Leimagabou na̠nh ngouurapu yei gama̠ngjidou pwensuih vey vagangun, na̠k vagangun, nōnōnpu vey rweyra̠nh na̠nh layhak rapudou beipuh Shuri vey ka̠hrou, leima vey-u.
17 Leimāgabou na̠nh nōnōnpu vey vagangun dou seykou manneiu. Shuri vey ngūnrapu suīyuingmei yei sarapu mihdou ba̠rijan tangouuyeo. Gakhonpu vey ba̠ri
18 Lūngaleypu anārbou mehda, shiilung vey ba̠ridou gakhonpu vey ba̠riu. Khrista vey diraapu Khrista cha gakhā rapurayerapu nananh yuehlo rapu suīyuingmeishiilungliKhrista cha gakhā rapu titheita ngouuyeou. Doupurāshiilung vey ba̠ridou gakhonpu vey ba̠ri ra alih nanh theiloyeou.
19 Ba̠lih nanh alih vey naang sehdin nouu. Hrouleh gakhwa naang alihcha tasa ngouuchou. Alihcha shana aleitatu alihcha tasa ngouualeiu. Doubou mehdou alihcha shana chirapu ngana̠ng theilo valhaapān alih vey shungna̠ng sehdinouu.
20 Nameh nanh gathenpu Shuri kuknaang chennih rapudou garokei yei moūdou theiyeou.
21 Nananh gadhunpu na̠nh theichi rapupān hananh leira̠k yakravey ka̠hrou. Nameh nanh gadhunpu na̠nhleh, nihlehrapu moūdou gadhunpucha shana chirapudou theirapu ngana̠ng hananh yakravey-u.
22 Nihgalehpu dou chhuenaar rouu? Jishu na̠nh Khrista ka̠hrou ra ka̠laarrapu mih-u. Beipuh ka Beinārlapu na̠nh ka̠laarapu mihdou Khrista cha gakhā rapu mih-u.
23 Beinār lapuna̠nh ka̠laa rapu mihdou Beipuh na̠nh theichau. Beinār lapuna̠nhlosanrapu mihdou Beipuh na̠nh theiyeou.
Shuri cha ngouu rapoh

24 Doupurā nameh nanh gakhwa naang yuehlo rapu chēndou nacha ngouuya̠n rouu. Doupu chēndou nacha ngouuya̠ntatu nananh Beinārlapu ka Beipuh cha ngouuya̠nyeo.
25 Alih lhaa nihrapu garinnih rapudou siimān mukpu mihdunna̠nh losan rapu shaakhiu.
26 Nana̠nh nihlehtei ghouprey rapuba̠lihmeh vey chuindou heyhra nalhaa hananh yaklo nihyeou.
27 Hrouleh gathenpu Shuri vey kukna̠ng nananh garokrapu chennih rapudou namana̠nh ngouurapu ngana̠ng chhuenanh tali namehna̠nh shēnshenh rapu tangouuchou. Doupu chennih rapudou nihlehtei sara vey ka̠hrou, ba̠zihna̠ng yei moūdou namehlhaa dwenthei ravey ba̠lengnei nameh nanh beinārlapu cha tangouu ya̠nrouu.
Shuri vey naarboumeh

28 Lūngaleypu anārbou mehda, beinārlapu nanh raseh rarina̠nh alihnanh beinga vasehtatu lunhban rapu garokei ka̠ya̠kei jirapu ngouucha beinār lapucha tangourouu.
29 Shuri nanh gadhunpou ra nameh theitatu gadhunpu yei sarapu mihdou Shuri vey na̠ng sehravey ra nananh theilo rouu.