¹ Kitabu cha lukolo lwa Yesu Kilisito, mwelekwa ywa Daudi andaga mlukolo ywa Ibulahimu. ² Ibulahimu amwelekaga Isaka, Isaka amwelekaga Yakobo, Yakobo amwelekaga Yuda na wanduguze, ³ Yuda amwelekaga Pelesi na Zela, mamiyawe andaga ni Tamali, Pelesi amwelekaga Heziloni, Heziloni naye amwelekaga Alamu, ⁴ Alamu amwelekaga Aminadabu, Aminadabu amwelekaga Nahashoni, Nahashoni amwelekaga Salimoni, ⁵ Salimoni amwelekaga Boazi, Boazi etangagwa Lahabu. Boazi amwelekaga Obedi, nine etangagwa Luti, Obedi amwelekaga Yese, ⁶ Yese naye niye amwelekega zumbe Daudi. Daudi amwelekaga Sulemani, nine andaga mkaza Yulia. ⁷ Sulemani amwelekaga Lehoboamu, Lehoboamu amwelekaga Abia, Abia amwelekaga Asa. ⁸ Asa amwelekaga Yehoshafati, Yehoshafati amwelekaga Yolamu, Yolamu amwelekaga Uzia, ⁹ Uzia amwelekaga Yosamu, Yosamu amwelekaga Ahazi, Ahazi amwelekaga Hezekia. ¹⁰ Hezekia amwelekaga Manase, Manase amwelekaga Amoni, Amoni amwelekaga Yosia, ¹¹ Yosia amwelekaga Yekonia na wanduguze umwo want'hu wa Izilaeli wegalagwa kwo utumwa uko Babeli.

¹² Na kukongela aho wegalagwa kwo utumwa uko Babeli. Yekonia amwelekaga Shealitieli, Shealitieli amwelekaga Zelubabeli, ¹³ Zelubabeli amwelekaga Abihudi, Abihudi amwelekaga Eliakimu, Eliakimu amwelekaga Azoli, ¹⁴ Azoli amwelekaga Zadoki, Zadoki amwelekaga Akimu, Akimu amwelekaga Eliudi, ¹⁵ Eliudi amwelekaga Eliazali, Eliazali naye amwelekaga Matani, Matani amwelekaga Yakobo, ¹⁶ Yakobo amwelekaga Yusufu, mnumewe dya Maliamu uyo nine dya Yesu akwitangwa Kilisito Mkombozi.

¹⁷ Ivo vatenda, kulawa Ibulahimu kubula kwa Daudi vyeleko mlongo na vine, kulawa Daudi kubula hadya want'hu wa Izilaeli waguhagwa utumwa uko Babiloni, vyeleko mlongo na vine, naho kulawa aho kubula mwo kwelekwa kwa Zumbe Yesu Kilisito, vyeleko mlongo na vine.

¹⁸ Kwelekwa kwa Yesu Kilisito kwandaga ivi. Maliamu uyo nine dya Yesu Kilisito, atumizagwa ni Yusufu. Umwo wandaga wakei kwikala enga ivo vili kwa mnt'hu na mkaziwe, Maliamu aonekaga kunda mbovu kwa udahi wa Muye ywa Mnungu. ¹⁹ Kwaviya Yusufu andaga mnt'hu akumwelela Mnungu, haungile kumgela soni mwa want'hu, ivo aungaga amwase Maliamu kwa kinyele. ²⁰ Umwo andaga akafanyanya ivo, mtumigwa ywa Zumbe niyo amlaila mwe zisozi akamgamba, “Yusufu, mwelekwa ywa Daudi, usekogoha kumguha Maliamu kunda mkaziyo kwaviya ubovu ananao ni kwa udahi wa Muye ywa Mnungu. ²¹ Neeleke mwana kilume, naho noumwitange zina dyakwe niye Yesu, kwaviya niye akuunga awayokole want'hu wakwe walawe mwo uwavu wawe.” ²² Aya yose yalailaga vileke kia kindedi cha Zumbe alongaga kombokela kwa mlotezi ywakwe kikelavilize, ²³ “Kaula, mwali na mazanga neenule ubovu, naho kwakwe naavumbuke mwana kilume, zina dyakwe neetangwe Imanueli” nuko kugamba, “Mnungu ehamwenga na suwe.” ²⁴ Ivo Yusufu eze enuke mwe zint'hongo, amlombaga Maliamu enga viya agambilwe ni mtumigwa ywa Zumbe. ²⁵ Mna hawagendaga enga mnt'hu na mkaziwe mpaka hadya Maliamu amwelekaga mwanawe ywa kilume, niyo Yusufu amwink'ha zina niye Yesu.