4
Okhukhemewa Khwa Yesu.

1 Olwoola Yesu kayiriwa no'mwoyo mwolerefu mu sibbarara okhukhemewa sitani. 2 Nikamala okhuwoonga endaalo amakhumi kane, esideete nende esiro, enjala kho yamuluma. 3 Omukhemi keecha yaali kamuwoola ati, Noba noli Omwana wa Weere, woola amakima kano kekhole ebyokhulya. 4 Yesu kakowolamo kawoola ati, Syawandiikiwa siiti: Omutu syabaanga mulamu khulwebyokhulya byoɳɳene, okhutusakho nawuli mboosi eyitula mu khanwa wa Weere.”’ 5 Khandi sitaani kamuyira khu siko syolerefu, kamuta khu sisuli sye’nyumba ya Weere, 6 kamuwoola ati, “Nooba nooli mwana wa Weere, tuuma okwe asi.” Olwokhuba syawandiikiwa siiti: “‘Alikhutumira bamalayika baye, bakhudiiririre mu makhono kaawe, okhaye okhwekumula khukina. 7 Yesu kamuwoola khandi syosi syawandiikiwa siiti: Syokhemanga Omwami wawo Weere.

8 Khandi, sitaani kamuyira khu lugulu oluleeyi lukali kaamwekesa ebyaalo nowuyiinda wa byo. 9 Kamuwoola ati, Ebyo byoosi ndabikhuwe, nonafuumale wanyinamira. 10 Yesu kamuwoola ati, Ntulekho, sitaani! Olwokhuba syawandiikiwa siiti: Winamiraanga Weere, khandi omukholeraanga yeɳɳene.’” 11 Awo sitaani kamulekha, bamalayika becha bamukholera owuyeedi wukali.
Yesu Achaaka Okhuwuulira

12 Olwoola Yesu nikawulira ati Yokana bamudiiye, kakowolayo e Ggaliaaya. 13 Natulire e Nasaaleesi kacha kamenya e Kaperunawumu, esiri khu nyanja mu syaalo sya Sebbulooni nende Nafutaali 14 okhwoseresa emboosi nnabbi Yisaaya yi kalomaloma nawoola ati:
15 Esyaalo Sebbulooni nende esyaalo sya Nafutaali, khungira yenyaanja, engerekha wo mwaalo Yoludaani, e Ggaliraaya asyaalo syabateende__
16 abatu abali nibamenya mu siirema bawene owulafu wungi; nende abo abalingi mu syaalo esye siinikha syokhufwa owulafu wubawonekheye.

17 Okhutula awo okhucha mu moni Yesu kachaka okhuwuulira nawoola ati Mweyolobye, olwokhuba Owenengo womukulu wuli ambi okhwoola.”
Yesu Alaanga A Beeki Abasookha

18 Yesu nikali nakeenda hu lukerekha lwe’nyanja ye Galiraaya, kawona abenda ndala babiri, Simooni yibalaanga Petero nende Andereya mwanaaɳɳina. Ni basukuna enjero mu nyanja, olwokhuba bali abanaabi. 19 Kabawoola ati, “Mwiiche mu noonde, nja okhubakhola mube abanaabi ba’batu.” 20 Mangu ako balekha enjero bamuloonda.

21 Yesu nikasudakho mu moni, kawona abenda ndala bandi babiri, Yakobo omwana wa Sebedaayo nende Yokana mwanawaɳɳina. Bali mu lyaato alala nende saawe Sebbadeeyo, niboonga enjero chawe. Kabalaanga, 22 mangu ako, balekha awo eryaato nende saawe bacha nende Yesu.
Yesu Awoniya Abalwaye

23 esu kamalakho Galiraaya, yoosi nga abasomesera mu makhuɳɳaaniro kaawe, nawuulira enjiri eyo’wene’ngo, khandi nga awoniya owulwaye woosi nowuchuuni woosi mu batu. 24 Efuma yaye yaswaaniya Siriya, bamuleetera boosi abali abalwaaye, abali ni bawambiswe endwaye chitasi nasirala, nende ebibasandya, nende abemisaambwa, nende abentulume, nende abali ni bakokoomba, kabawoniya. 25 Ebidiikha nebidiikha okhutula e Galiraaya, nende e Dekapoli, e Yerusaalemi, e wuYudaaya nende engerekha wo mwalo Kwa Yoludaani byamulonda.