2
Abakesikesi Okhutula Ewukwe.
1
Yesu nikakhewulwa mu Bbesirekemu esyewuYudaaya, khu mireembe cha Herode Omwenengo, wona abakesikesi abatula ewukwe bacha e Yerusaalemi
2
ni bateeba baati, Ali yeena weene oyo owiwuuywe Omwen’engo wa Bayudaaya? Olwokhuba khwawona eɳɳiniɳɳini e wukwe sakira khwiichire okhumwiinamira.”
3
Herode Omwen’engo nikawulira kelaliikhirira, alala nende abe Yerusaalemi boosi.
4
Kawuusa ba khawona bakhulutu boosi nende abeekesa bamalako kabateeba Kurisito yikakhewulwe.
5
Bamukowolamo baati, Mu Bbesirekemu esyewuYudaaya. Olwokhuba nje lu syawaandiikiwa nabbi siityo nti:
6
Ewe wesi Bbesirekemu, esyaalo sya Yuda, syooli mutono mu banawaami ba Yuda; olwokhuba otuka alitula mwiwe olyaaya abatu bange Yisirayiri.
7
Manu Herode kalanga abakesi kesi abo mu wekisi, kabahemekeresa lukali ebikha byeene bi ɳɳiniɳɳini yakhamala niyiwonekhire.
8
Kabatuma e Bbesirekemu, kabawoola ati, “Muche mukoonye lukali, muwone omwana oyo. Naye ni mu mwakhakana mwicha mwaamboolera sesi kho niiche mwiinamire.”
9
Nibamala okhuwulira Omwene’ngo byabawooye, bemeeda no’lukendo lwawe, manu eɳɳiniɳɳini eyo yibawonera ewukwe yabatangiramo yecha yema amukulu omwana ali.
10
Nibawona eɳɳiniɳɳini, basangaala lukali.
11
Ne nibengira mu nyumba, bawona omwana nende Malyamu ɳɳina baafumala, benamira omwana. Bawolola ensawo chawe bamuwa ebiwaanwa ebye saabbu owubbani nende amafuta akawunya wulayi lukali.
12
Ne nibalawuliwa mu silooto batakowolayo eyiri Herode, bakowolayo e waawe nibabita khungira yiindi.
Okhwirukhira e Misiri.
13
Manu nibamala okhuwaawo, malayika wa Weere kawonehera Yusufu mu sirooto namuwoola ati. Singira, wukula omwana nende ɳɳina wirukhire e Misiri. Ba eyo okhwosa Ese omwene lu ndikhuwoola, olwokhuba Herode kecha okhumukiiya amwiite.”
14
Yusufu ni kasisimukha, kawukula omwana nende ɳɳina esiro baacha e Misiri,
15
baaba eyo okhwosa Herode lukafwa. Emboosi yolerere Weere yikalomalomera mu nabbi nga awoola ati: Nakhalange omwana wange okhutula mu Misiri.
16
Herode ni kawona nga abakesikesi bala bamwekosobanisyekho, kasunguwala lukali, kalagira okhwiita abaana besisyani boosi abali e Bbeserekemu nende khu njakho chasyo choosi abakhamala emyaaka chibiri nende assi wacho, nga ebiro bikateebereseramo lukali abakesikesi lu byali.
17
Manu nje emboosi nabbi Yeremiya yi kalomaloma luyolerera lukawoola ati:
18
Ekono lyawulirikhana mu Laama. Okhulira nokhwekasyaabira khungi, Lakeeri nalirira abaana baye ni batamukumya omwoyo, olwokhuba ali nga si asiiri.
Okhukowolayo e Nasaleesi
19
Naye Herode nikamala okhufwa, wona malayika wa Weere kawonekhera Yusufu mu sirooto e Misiri
20
nga awoola ati, Singira, owukule omwana nende ɳɳina oche mu syaalo sya Yisirayiri, olwokhuba abali bayiima omwana okhumwiita bafwiye.”
21
Kasingira, kayira omwana nende ɳɳina bacha mu syaalo sya Yisirayiri.
22
Naye nikawulira ati Akhikerawo nje Omwene’ngo we wuYudaya nga asikhiiye simwana Herode, katya okhukowolayo. Naye Weere keecha kamulawulira mu sirooto, kekholoobya kabita khu luwande lwe Ggaliraaya,
23
keecha kaba mu siko eriita lyasyo Nasaalesi. Emboosi ba nabbi yi balomaloma yolereye yiiti: Kakhalangiwe mu Nasaalaayo.