¹ Mutsinyanga etso Yohana omubatisia yetsa nayalaanga mushitsimi shia Yuda, ² khandi naboolanga mbu, mwikalukhasie enywe okhuba Obwami bwoMwikuli buli ahambi. ³ Okhuba uno niye owaboolwakhwo nomulakusi Isaya mbu, omwoyo kwa oyo oulanjirisinjia mushitsimi, mukasie tsinjira tsioMwami, mukasie emihandachie chikololoshe.

⁴ khandi Yohana mwenoyo yali yefwalire ebifwalo biobwoya bweingamia, khandi niyeboyere olukhoba lwelisero mushishienjeshie, ne ebiokhuliabie bialinji tsisiche nende obushi bwomushitsimi. ⁵ Mana natsia erwanyi eYerusalemi nende ebuYahudi yoosi nende mutsimbeka tsiosi etsirondakhaane nende Yorodani. ⁶ Mana nabatisia muYorodani nibekalukhasia ebionono biabwe.

⁷ Ne olwa yalola omukanda omukali okwaBafarisayo nende Abasadukayo nibetsa khuye, mbu ababatisie, nababoolera ari,"Enywe olwibulo lwetsinzokha, niwina owabachetsiiye, mbu mwirushe okhurula khushinyasio eshitsaanga? ⁸ kario mwame ebiamo ebikhoyere okhwikalukhasia kwenywe. ⁹ Mana mulapaara mumioyo chienywe mbu muli abolwibulo lwa Aburahamu, kho emubaboolera mbu, Nyasaye ali nobunyali obwokhuchingula olwibulo lwa Aburahamu okhurula khumachina kano. ¹⁰ Ne bulano Imbatsi irerirwe khushisina shiomusala. Mbu buli omusala kwosi kwosi okulama ebiamo ebilayi ta, kularemwa mana kusukunwe mumuliro.

¹¹ Esie emubatisia nende amatsi okhumanyia mbu mwikalukhasiiye, nebutswa aliho owitsanga inyuma wanje omutsienukhu okhushira isie, owa isie kata ebilarobie shekhoyere okhumuchinjira ta, alamubatisia nende Roho omulafu khandi nende omuliro. ¹² Ali noluteru mumukhonokwe, mana alasesa imere, khandi akhung'asia ingano nabikha mushiachi, nebutswa alasamba amukhuutsi nomuliro okulasima tawe.

¹³ Mana Yesu narula eGalilaya natsia eYorodani khu Yohana mbu amubatisie. ¹⁴ Mana Yohana namukania namuboolera mbu "nisie oukhoyere okhubatisibwa ninawe, nawe witsire orie khwisie?" ¹⁵ Naye Yesu namukalusia namuboolera mbu, ekhoyere okhubatisibwa ninawe,"fuchirira kabe kario bulano, mbu, obulunjishi bwosi busibwe".

¹⁶ Ne olwa Yesu yali niyakhabatisibwa, narula mumatsi, ne lola Likulu nilimwikushira, mana Roho waNyasaye niyeekha shinga Lihusi namuherakhwo. ¹⁷ Mana lola Omwoyo nikuulirikha okhurula Mwikulu, nikuboola,"Uno niye Omwana wanje wandahera, ounjamisinjia po".