¹ Olunyuma lwetsinyanga tsisasaba, Yesu yabukula. Petero, Yakobo nende Yohana omusiani wabo, natsia ninabo khushikulu. ² Naye nakalukhasibwa imberi wabo, obweni bwe nibwakha shinga Eliuba, natso tsingubo tsie nitsifwana shinga ibarafu. ³ Ne lole, barulira Musa nende Eliya, nibaboolanga ninaye. ⁴ Mana Petero naboola mbu, Omwami, nobulayi mbu, khuli hano, lekha khumbashe hano amatiri kataru, elala lia Elirio, elala lia Musa elala lia Eliya.

⁵ Ne olwa yali nashiboolanga, lole Lilesi lilafu liabafunikha, ne lole omwoyo kwarula mwilesi kuboola, "Uno niye Omwana wanje omuherwa, owa eyanzisibungwa muye, mumuulire." ⁶ Ne olwa abechibe baulira, bakwa hasi, nibaria po.

⁷ Naye Yesu yetsa nabatira khwo nababoolera mbu, "bushe, mularia ta." ⁸ Ne olwa babukha, shibalolakhwo omundu yesi ta, habula Yesu yenyene.

⁹ Ne olwabakholomokha hasi weShikulu, Yesu yabalachirisia mbu, shibalaboolerakhwo omundu yesi akamulutsi ta, okhula olwa Omwana womundu alamukha okhurula mubafu."

¹⁰ Nabo abechibe nibamureba, mbushina abahandichi nibaboolanga mbu, khatimba Eliya yetse mberio?

¹¹ Naye Yesu nabakalusia, "toto mwene khatimba Eliye yetse mberio, mana akalusie ebindu biosi. ¹² Nebutswa ebaboolera, Eliya amalire okhwitsa, nabo shibamumanya ta, nabo bamukholere kosi ". ¹³ kho abechi nibamanya mbu, aboolanga khuYohana.

¹⁴ Ne olwa betsa mumukanda, yamwitsira omusatsa undi namusikamira naboola mbu, ¹⁵ Omwami, umbere tsimbabasi, shichira omwana wanje noweindulume, khase na khase akwitsanga mumuliro, nomba mumatsi. ¹⁶ Nasi emurerere khubechibo nabo shibanyalire okhumuhonia ta.

¹⁷ Mana Yesu nakalusia naboola, O olwibula olumayanu olubula obusubiri, okhula lina olwandalaba ninenyu? okhula lina olwa ndalababakhalabanira? murere hano. ¹⁸ Naye Yesu nahalabira eshishieno nashio nishitsia, naye omwana nahona eshise shienesho.

¹⁹ Mana abechi nibamwitsira Yesu, nibamureba, mbushina khulanyalire okhumuhonia?

²⁰ Naye Yesu nabakalusia, khulwa okhubula obusubiri khwenywe. Toto mwene embaboolera mbu, nimuba nende obusuri shinga imwo yelisatsi, mulaboolera eshikulu shino mbu, sulikha orule hano otsie, nashio shilarula. Neshibulao eshiletsa okhunyalikha khwinywe ta. ²¹ Kata kario imbia yino shinyalikha halali okhusaya nende okhuhonga inzala.

²² Ne olwa bali nibashimenya Galilaya, Yesu yababoolera, "Omwana womundu alanyasibwa mumakhono kabandu. ²³ Nabo bala mwira ne inyanga yakhataru alalamukha, nabo nibaberera muno.

²⁴ Ne olwa betsa Ekapernaumi, balia abanyola amang'ondo kobushuru betsa khuPetero, nibareba mbu, Omwami wenywe arunganga obushuru? ²⁵ Naye naboola mbu, hee, ne olwa yali niyakhetsa munzu, Yesu namureba," oparanga oriena Simioni omwana wa Yona, abaruchi beshialo bakhoyera okhurunjia bena obushuru? abanababwe nohomba abacheni?"

²⁶ Petero namuboolera, abacheni, Yesu namukalusia,"kho abana nabalakhule." ²⁷ Ne mbu, khuleshe okhubesichirasia, tsia munyanza, osukune olulobo, nayo Inyeni yamberi yawitsa okhutira, wikule omunwa kwayo, olanyolamwo amang'ondo, baheresie khulwe ewe ninasi."