¹ Eshitabu shiolwibulo lwa Yesu Kristo Omwana wa Daudi, Omwana wa Abrahamu. ² Abrahamu yebula Isaka naye Isaka yebula Yakobo, naye Yakobo yebula Yuda halala nende abana babwe. ³ Naye Yuda yebula Perezi nende Zera wa Tamari, naye Perezi yebula Hezironi, naye Hezironi yebula Ramu, ⁴ Naye Ramu yebula Aminadabu, naye Aminadabu yebula Nashoni, naye Nashoni yebula Salimoni. ⁵ Naye Salimoni yebula Boazi, naye Boazi yebula Obedi wa Rutsi, Obedi yebula Yese. ⁶ Naye Yese yebula Omuruchi Daudi, naye Omuruchi Daudi yebula Suleimani okhurula mumukhasi wali wa Uria. ⁷ Naye Suleimani yebula Rehoboamu, naye Rehoboamu yebula Abiya, naye Abiya yebula Asa. ⁸ Naye Asa yebula Jehosifati, naye Jehosofati yebula Yoramu, naye Yoramu yebula Uzia. ⁹ Naye Uzia yebula Yosamu, naye Yosamu yebula Ahazi, naye Ahazi yebula Hezekiah. ¹⁰ Naye Hezekiah yebula Manase, naye Manase yebule Amoni, naye Amoni yebula Yosia. ¹¹ Naye Yosia yebula Yekonia halala nende abanababo khubise ebia bayirwa Babiloni

¹² Ne olunyuma lwokhuirwa Babiloni, Yekonia yebula Shelitieli, naye Shelitieli yebula Zerubabeli. ¹³ Naye Zerubabeli niyebula Abiudi, naye Abiudi niyebula Eliakimu, naye Eliakimu yebula Azori. ¹⁴ Naye Azori yebula Zadoki, naye Zadoki niyebula Akimu, naye Akimu niyebula Eliudi. ¹⁵ Naye Eliudi niyebula Eliazari, naye Eliazari niyebula Matsani, naye Matsani niyebula Yakobo. ¹⁶ Naye Yakobo niyebula Yusufu Omusatasa wa Mariamu, owebula Yesu oulangwa mbu Kristo.

¹⁷ Kho tsinzibulo tsiosi okhurula khu Abrahamu okhula khu Daudi tsiali ekhumi na tsine, ne okhurula khu Daudi okhula khukhuchingwa okhuirwa Babiloni tsiali ekhumi na tsine muluyia ne okhurula khukhuchingwa okhutsia Babiloni okhula khu Kristo bali ekhumi na tsine muluyia.

¹⁸ Ne okhwibulwa khwa Yesu khwali khuri, ne olwa Mariamu nyinamwana yali nakhwebungwa nende Yusufu nibashiri okhuteshania, yanyolekha nali inda ya Roho Omulafu. ¹⁹ Yusufu Omusatsa we yali omundu omulunjishi, nalenya okhumufimbula habulafu ta, kho napara okhumulekha mumasirisi. ²⁰ Nebutswa olwa yali naparanga amakhuwa ako, Omumalaika wa Nyasaye yamwitsira mumalooro naboola mbu, Yusufu iwe Omwana wa Daudi, olaria okhumubukula Mariamu okhuba omukhasiwo ta, okhuba Inda eya ali ninayo niya Roho omulafu. ²¹ Ne alebula Omwana, naye alalangwa elira mbu YESU okhuba alahonia abandube okhurula mubionono biabwe. ²² Ako kosi kekholekha khulwa okhusia akaboolwa khu Mwami okhubirira khumulakusi mbu, ²³ lole Omushisira alaba inda ne alebula Omwana omusiani ne alaalangwa mbu Emmanueli."eshisina mbu Nyasaye halala ninefu". ²⁴ Olwa Yusufu yabuukha mundolo, yakhola shinga olwa Omumalaika wa Nyasaye yamuboolera namubukula okhuba omukhasiwe. ²⁵ Ne nalabakhwo ninaye ta okhuula olwa yebula Omwana wamberi omusiani namukulikha mbu Yesu.