¹ Eshitabo eshia olwibulo lwa Yesu Kristo, omwana wa Daudi, omwana wa Abrahamu. ² Abrahamu niyebula Isaka, Isaka niyebula Yakobo, Yakobo niyebula Yuda nende abaana babwe. ³ Naye Yuda niyebula Peresi nende Zera abayebula muTamari, naye Peresi niyebula Hezironi, naye Hezironi niyebula Ramu. ⁴ Ramu yali samwana Aminadabu, Aminadabu samwana Nashoni, naye Nashoni samwana Salimoni. ⁵ Salimoni yali samwana Boazi muRahabu, Boazi niye samwana Obedi muRutsi, Obedi niye samwana Yesse. ⁶ Yese niyebula Daudi omuruchi. Daudi yali samwana Sulumani mumukhasi ousika Uria. ⁷ Sulemani yali samwana Rehoboamu, Rehoboamu naba samwana Abiya, Abiya niyebula Asa. ⁸ Asa niyebula Josfati, Josfati niyebula Yoramu, Yoramu niyebula Uzia. ⁹ Uzia niyebula Yosamu; Yosamu niyebula Ahasi; Ahasi niyebula Hezekia. ¹⁰ Hezekia niyebula Manase; Manase niyebula Amoni, Amoni niyebula Yosia. ¹¹ Yosia niyebula Yekonia, nende abana baabo, mutsinyanga etsia bachingwa nibatsia Ebabiloni;

¹² Olunyuma lwokhutsia eBabiloni Yekonia yebula Shialatieli; Shialatieli niyebula Thurubabeli. ¹³ Thurubabeli niyebula Abiudi; ¹⁴ Abiudi niyebula Eliakimu; Eliakimu niyebula Azori; Naye Azori niyebula Zadoki, Zadoki niyebula Akimu; Akimu niyebula Eliudi. ¹⁵ Eliudi niyebula Elieza; Elieza niyebula Matani; Matani niyebula Yakobo; ¹⁶ naye Yakobo niyebula Yusufu omusatsa wa Mariamu owebula Yesu, oulangwa Kristo.

¹⁷ Kho tsinzibulo tsiosi okhurula khu Abrahamu okhula khu Daudi tsiali ekhumi na tsine; Ne okhurula khu Daudi okhula okhubukulwa okhutsia mumbohe eBabiloni ne tsinzibulo ekhumi na tsine, okhurula okhubukulwa okhutsia mumbohe eBabiloni okhula khukhwibulwa khwa Kristo ne tsinzibulo ekhumi na tsine.

¹⁸ Okhwibulwa khwa Yesu Kristo khwali endi, Mariamu ouli nyinamwana, yali nashikhwebungwa nende Yusufu, nibashili okhuteshania, yanyolekha nali inda ya Roho Omutakatifu. ¹⁹ Habutswa naye Yusufu, yali omundu omulunjishi, naye nalenya okhufimbia Mariamu omurwe habulafu tawe; napaara okhulekhana ninaye masirisi. ²⁰ Nebutswa olwa yali nashiyililisinjia khumakhuwa kano, malaika wOmwami yamuloleshela mwilooro, namubolela mbu; "Yusufu omwana wa Daudi, sholaria okhubukula Mariamu omukhasi wuwo tawe, okhuba Inda yali ninayo ne eya Roho Omutakatifu. ²¹ Naye alebula omwana omusiani, nawe olamukulikha eliira mbu, Yesu, shichira niye oulihonia abandube okhurula mutsiimbi tsiabwe." ²² Kano koosi kekholekha kho mbu koosibwe aka Omwami yaboola okhubirira mumulakusi mbu; ²³ "Omukhana omushisira alahera inda, naye yakhebule omwana omusiani, naye bakhamukulishe eliira mbu Imanueli"- eshisina mbu "Nyasaye halala ninefwe." ²⁴ Mana Yusufu nabuukha okhurula mundoolo nabukula Mariamu, shinga Olwa malaika wOmwami yali namulachilisiye. ²⁵ Nebutswa shiyamumanya tawe okhula olwa yebula omwana omusiani. Naye namukulikha eliira mbu Yesu.