¹ Mulingere mbwe murakhola amalayi keng'we imberi wa baandu, mbwe mulolekhane nabo; okhuba nimukhola murio mubula esiaanwa khurula khu seng'we oli mwikulu. ² Khu kario ewe norusia ebiaanwa biao, oroba oluika imberi wao, nga abekaadi bakholanga mumasinagogi nende khuchingira mbwe baberesibwe oluyali nende abaandu mbaboolera obwadieri bamalire okhunyola omurungo kwabwe. ³ Arali ewe norusia ebiaanwa, kata omukhono kwao mukaada kuramanya akomukhono kwao omuluungi kukhola. ⁴ Arali ebiaanwa biao bibe ebiobwekisi: ne babao olola mubwekisi ye omwene anakhurunga mubwakhakhu.

⁵ Ne khandi eng'we nimulaama, muraba nga abekaadi: khuba bakheera osaba nibemere mumasinagogi nende muchimbeka chie chingira mbwe balolekhe nende abaandu. mbaboolera obwadieri mbwe bamalire okhurungwa. ⁶ Arali ewe nosaba ingira musigoro mwao, manu wikale olwiki lwao, saba khu babao, oli mubwekisi; ne babao alolanga mubwekisi anakhurunga mubwakhakhu. ⁷ Arali eng'we nimusaba, murekalukhira kalukhiramo, nga abesialo bakholanga: okhuba bapara mbwe banabulirwa khulwa mangi akabalomaloma. ⁸ Khu kario muraba nga nibo; okhuba seng'we amanyire ebiindu biamwenya, kata nimusiamusaba. ⁹ Bulano musabenge muri: Seefwe oli mwikulu, elira Liao liribwe. ¹⁴ Okhuba nimulekhera abaandu ebiononi biabwe, seng'we oli mwikulu yesi anabalekhera: ¹⁵ Arali nimuralekhera abaandu ebionono biabwe, Kata seng'we sachia okhubalekhera ebinono bieng'we.

¹⁶ Khumeedakho nimuli mukhusiiba, muraba nga, abekaadi, nimukhuluusia obweni: okhuba bakhuulusianga obweni mbwe, balolekhane nende abaandu mbwe basiiba. mbaboolera obwadieri banyolere omurungo kwaabwe. ¹⁷ Arali ewe, nosiiba, bakha omurwe kwao amafura, khandi wosie bweni bwao. ¹⁸ Mbwe oralolekha khu baandu mbwe osiiba, arali khu babao oli mubwekisi; ne babao, olola mubwekisi, anakhuruga mubwakhakhu.

¹⁹ Murara chimbikhiro chieng'we khusialo owa masiriri nende chimberebende chisasia, nende owa abebi bafunaka nibeeba. ²⁰ Arali mure chibikhiro chieng'we mwikulu, owa masiriri nende chimberebende, birasasia, khandi owa abeebi barakhafunaka beeba: ²¹ Okhuba owa embikhiro yao iri, awo niwo owa omwoyo kwao Kuchia Okhuba.

²² Itara yomubiri ni imoni; Manu: nikaba mbwe imoni yao iri abwene, omubiri kwao kwoosi kwechulamo obulafu. ²³ Arali imoni yao niiri imbi omubiri kwao kwoosi kwechulamo esiirima. Khu kario obulafu bukhuliimo nibuba esiirima, esiirima esio sinesikhongo!

²⁴ Abulao omundu onyala orumikhira abami babiri: Okhuba anasiula mulala, ne akheera oundi; khasi munyala orumikhira Nasaye alala nende emiandu.

²⁵ Khulwesio mbaboolera, murabeyabeera obulamu bweng'we, mbwe munalia murie, kose esiamunang'wa; kata mbwe munefwaala sina khumibiri kieng'we. Bulamu sibukhoyera okhira ebiakhulia, ne mubiri okhira ebiefwaalo? ²⁶ Lingera amayoni komumiyaka: sikaraka, khandi sikafuna, kata sikabusia kaara mubiaki; Arali seng'we owomwkulu akalisianga. eng'we simukhoyera lukali okakhira? ²⁷ Niwiina khweng'we mukhubeyabeya onyala okhwemeedakho sikero silala khubukhomefu bwaye?

²⁸ khulwasina mubeyabeera ebiefwaalo? Muparekho khubimuli ebiomumukunda nga olwabikhulaanga; sibinyakhananga, khandi sibilukhanga. ²⁹ Ne khandi mbabolera mbwe, kata Sulemani muluyali lwaye lwoosi siyefwalakho nga silala khubino ³⁰ Khu kario nibiri mbwe Nasaye afwala obunyasi bwomumukunda ario, obuluwo inyanga ino, ni muchuli busambwa, khasi achia obafwaala lukali okhirao, eng'we ababusubiri budiidi? ³¹ Khulwesio murakhendegana, nimuboola mbwe, nisina esia khunalia? Kata nisina esiakhunang'wa? kata mbwe khunefwaala khurie?' ³² (Okhubeera ebindu bino bioosi abesialo bakonyanga:) okhuba seng'we womwikulu amanyire mbwe mwenya ebiindu bino bioosi. ³³ Arali mukonye mberi obwami bwa Nasaye, nende obukololofu bwaye, ne biindu bino bioosi munamederwakho. ³⁴ Khu kario murayendera aka muchuli, okhuba muchuli inekhalabanira ebiindu bienyekhana yene. Buli inyanga ibechanga nende eminyakhano kiayo ekiyiyera.