¹ Kia Ijaò robireu, kia Esau rehemynymy rarerimy 400-my hãbu sõe-di, kia tariòre boho riwirarearenyre riijoinyrenymy, kia Léia wana, Rakeli wana, inatxi iwedena boho wana ratxirenyre. ² —Kia iwedena boho tariòre boho wana ikoki rỹirenyre, irahudita Léia tariòre boho wana rỹirenyre, kia ikonanaki tahe Rakeli Jyje wana rỹirenyre. ³ —Irahudita Ijaò rare, kia ikorenyki rỹire; kia debò inatxi sõemy tii tatiòhumy resere, taòsỹny su-ò ridemy, ihyyta Esau tyy-ò rehemynyre. ⁴ —Kiaremyta Esau ijaramy ròhònymy rare Ijaò wana witxi reakremy, kia tarybewihikỹ tamy riwahinyre; tii riaxiòtinymy iry-ò ruore. Kia iny inatxi my rahinyrenyre. ⁵ —Kia Esau retehereu rexiòsemy, kia hãwyy mahãdu my, uladu mahãdu my robire, kia rỹỹraxire: —Kaa motyhytyhybo awana rỹirenyreri? —Kia riòre boho Deuxu tainytyhy-di wadee riwahinyre —rirarwyònyre Ijaò. ⁶ Taitaiwedena boho tariòre boho wana Esau tyy-ò ritehemynyrenyre, kia ikoki tarati ribedenyrenyre. ⁷ Irahudita Léia tariòre boho wana dòidenyde, kia tarati ribedenyrenylere. Kia ikonanarenymy tahe Jyje Rakeli wana tarati ribedenyrenyre. ⁸ Irahudita Esau rỹỹraxire: —Kia aõbo tahe kua ijoi mahãdu roire, kia ryki iki boho wana witxi rekoarenyre. Ijaò rirawyònyre: —Jyhyrarenymy rahõtinyre aaõwiwi ainytyhy ixiki arimykremy. ⁹ Tai Esau rarybere: —Diarỹ sõemy ijõdire, waseriòre; kia anohõ-di ixiki atxike. ¹⁰ Ka Ijaò tahe rõhõtiõre: —Teramy ijaraõmyke. Txibo-diarỹ aaõna adee rewinymyhỹre my reamyhỹre my, adee rewahinyreri ixiki bimyke. Wadee heka aõsỹny-di retehereri, kia Deuxu-òsỹny-di itxere wesena rare, kia awityhymy kai tiwaijeteri. ¹¹ —Txioini ixiki bimyke adee rewahinyreri,-diarỹ heka adee nadiwyde. Deuxu heka awimy wadee rare, kia ibutumy wadee riwahinyre aõmybo reamyhỹre. Kia Ijaò rõhõtiõre, kiata Esau tamy reobyre. ¹² Taita Esau rarybere: —Awire, rykòirenyke;-diarỹ akorenymy arakre. ¹³ Taita Ijaò rirawyònyre: —Wadinodu, kai teeryte uladu mahãdu teywese tõmorenyre, kia-diarỹ ta rahõtinyre budoeni boho-di, broreni hãwyy mahãdu iriòrerenydimy rỹirenyreri-di. Txibo tarurumy wymy rariarenykeki, kia txu sohoji keki hãrele, kia ibutumy iròdu iròdu rururenyke. ¹⁴ —Kia awityhyre wadinodu wakomy makre aijoi mahãdu wana.-diarỹ ywiywimy arakre, kia iròdu iròdu rirareherenydi, kia weryry boho rirareherenydi, kiata Edom-ò arehemynyke, tai kai tahãwanymyhỹteki. ¹⁵ Esau rarybere: —Taibo wadeòdurenyõ akireny rarikre arahe]udunyrenykremy. Ijaò rirawyònyre: —Tuu reaõlereri.-diarỹ heka wadinodu biòwa sojolimy aratxikemy resỹnyreri. ¹⁶ Kua txuu Esau roosere tarytybydile Edom-ò. ¹⁷ —Ijaò tanonanamy rare Sucote-ò. ¹⁸ Kawesemy tahe Ijaò Mesopotamia ribi roosere Kanaã-ò; tii rehemynyrenyre awihyylemy Siquém hãwã -ò, kia tabre-ò riòre ridere kua ityyki. ¹⁹ —Kia 100 moeda de prata-di Hamor riòre boho ribi, Siquém tyby ribi suu riõbaranyre, kia tai tahe tabre-ò riòre ridere. ²⁰ —Tai tii bede ratòò riwinyre, kiata rininire El my, Israel Deuxu.