¹ “AME kao ngakimi, biar kao ina di akimi. ² Barang ba pangakiman nang kao make untu ngakimi, kao pun akan di akimi ba ukuran nang kao make untu ngukur, pun akan di ukuratn ka kao.

³ Ngahe gek kao nee saimar kaimpanan ka mata kamaruk nyu, padahal balok ka daapm matanyu ina kao tauatn? ⁴ Aya mae gek kao bisa bakata ka kamaruk nyu: Biaratn aku muokatn kaimpanan koa dari matanyu, padahal ada balok ka daapm matanyu. ⁵ Hai urakng munapik, buokatn lah dohok balok dari matanyu, kao pun bisa nee tarakng untu muokatn kaimpanan ka mata kamaruknyu.”

⁶ “Amelah kao mareaatn barang nang kudus ka asuk ba ame kao nabakatn mutiaranyu ka babotn, biar ame di tinyak-tinyak di paha e, lalu babalik nyarang kao.”

⁷ “Mintalah, ana di bareatn ka kao; gagoklah, kao pun ana namuan; tarodok lah ana pintu di bukaatn untu kao. ⁸ Barang satiap urakng nang minta di bare' ba satiap urakng nang bagagok, namu, ba satiap urakng nang narodok pintu, pintu pun dibukaatn untu ia.

⁹ Ada gek urakng dari kao nang mare batu ka anake, kade ia minta roti, ¹⁰ gek mare uwar, kade ia minta ikatn? ¹¹ Jadi kade kao nang jahat nauan mare pamareatn nang baik ka anak-anaknyu, ahe agik Apaknyu nang ka saruga! Ia akan mareatn nang baik ka dangan nang minta ka Ia.”

¹² “Sagala sasuatu nang kao maon biar urakng pabuat ka kao, pabuatlah yakoa ugak ka dangan. Koalah insi' saluruh ukum Taurat ba kitab nabi-nabi.

¹³ Taamaklah ngalalui'k pintu nang sasak koa, barang ayak'lah pintu ba luaslah jaatn nang nuju ka kabinasaatn, ba manyak urakng nang taama'k ngalalui'k ia; ¹⁴ barang sasaklah pintu ba sampetlah jaatn nang notok ka kaidupaatn, ba sadikit urakng nang namuan ia.”

¹⁵ “Waspadalah ka nabi-nabi palsu nang atakng ka kao nyamar aya domba, tapi sabanare kabatne koa sarigala nang buas. ¹⁶ Dari buahe lah kao nauan. Bisa gek urakng mebet buah anggur dari rompoatn duri gek buah ara' dari rumput baduri? ¹⁷ Yakoa lah satiap puhutn nang baik ngasilatn buah nang baik, sedangkan puhutn nang ina baik ngasilatn buah nang ina baik. ¹⁸ Ina mungkin puhutn nang baik koa ngasilatn buah nang ina baik, gek puhutn nang ina baik, ngasilatn buah nang baik. ¹⁹ Ba satiap puhutn nang ina ngasilatn buah nag baik, pasti ditabakng ba dibuakng kadaapm api. ²⁰ Jadi dari buahe lah kao akan nee kabatne.

²¹ Buke satiap urakng nang nyaru'k-Aku: Jubata, Jubata! akan taama'k ka daapm Karajaan Saruga, tapi ia nang melakukan kamaoan Apak-Ku nang ka saruga. ²² Ka ari dudi ana manyak urakng basaruk ka Aku: Jubata, Jubata, buke me kami ba nubuat demi dama-Nyu ba ngadaatn mujijat demi damaNyu ugak? ²³ Pada waktu koalah Aku bakata sasidie ka dangan koa: Aku ina suah nganal kao! Darilah kita' samua paminjawat kajahatan!”

²⁴ “Satiap urakng nang nangar pakataatn-Ku nyian ba melakukan iya, ia koa sama ba urakng nang bijaksana, nang madiriatn rumahe ka atas batu. ²⁵ Lalu turutnlah ujatn ba ataknglah banjer, lalu angin ngipong rumah koa, tapi rumah koa ina rorok barang di madiriatn ka atas batu.

²⁶ Tapi satiap urakng nang nangar pakataatn-Ku nyian ba ina melakukan iya, ia sama ba urakng nang bodo, nang madiriatn rumahe ka atas pasir. ²⁷ Tarus turutnlah ujatn ba ataknglah banjer, lalu angin ngepong rumah koa, tarus roroklah rumah koa ba parahlah karusakatne.”

²⁸ Apas Yesus marantiaatn pakataatn nyian, batakajupatnlah urakng manyak koa nangar pangajaratn-Ne, ²⁹ barang ia ngajar dangan koa bakuasa, ina aya tolen ahli-ahli Taurat kabatne koa.