¹ Sawaktu Yesus nee urakng manyak koa, naiklah Ia ka atas bukit apas koa Ia duduk, ataknglah murit-murit-Te ka Ia. ² Tarus Yesus pun mulai bakata ba ngajar kabatne, jakata-E:

¹¹ Bahagialah kao, kade karena Aku kao di nyaci ba di nganiaya ba ka kao di nuduhatn sagala nang jahat. ¹² Basukacitalah ba karepoatnlah, barang upahnyu ayak ka saruga, barang yakoa ugaklah udah di nganiaya nabi-nabi nang sanape kao.”

¹³ “Kao adalah gare'k dunia. Kade gare' koa jaji tawar, ba ahelah agik ia di padaatn? Ina ada agik gunae salain di buakng ba di urakng tinyak.

¹⁴ Kao adalah tarakng dunia. Kota' nang barada ka atas bukit ina mungkin tataporatn. ¹⁵ Agik pun urakng ina ngidupatn lampu lalu dinarohatn ka babah gantang, tapi ka atas tampat lampu tarus bisa narakngi samua urakng ka daapm rumah koa. ¹⁶ Yakoa ugaklah haruse tarakngnyu bacahaya ka depan urakng, biar dangan bisa nee pabuatatn nyu nang baik lalu muliatn Apaknyu nang ka saruga.”

¹⁷ “Amelah kao nyangka, kade Aku atakng untu ngilangan ukum Taurat atau gek kitap na nabi. Aku atakng buke untu ngilangan, tapi mengganapi ia. ¹⁸ Barang Aku bakata ka kao: Sasidie salama nape ilang angit ba bumi nyian, sege'k iota gek sege'k titik pun ina akan di ilangan dari ukum Taurat, sanape samua koa jaji.

¹⁹ Barang koa sae nang niadaatn sete pun parentah ukum Taurat sakaipun nang paling enek, ba ngajaratn aya koa ka nang lain, ia akan nuduki' tampat nang paling babah ka daapm Karajaan Saruga; tapi sae nang ngalakukan ba ngajaratn sagala parentah-parentah ukum Taurat, ia akan nuduki' tampat nang tingi ka daapm Karajaan Saruga. ²⁰ Sasidie Aku bakata ka kao: Kade idup kaagamaan nyu ina labih banar dari pada idup kaagamaan ahli-ahli Taurat ba urakng-urakng Farisi, sasidie kao ina akan taama'k ka daapm Karajaan Saruga.

²¹ Kao udah nangar nang di firmankan ka enek moyang diri'k: Ame munuh; sae nang munuh harus diukum. ²² Tapi Aku bakata ka kao: Satiap urakng nang bera ka kamaruk'e harus di ukum; sae nang bakata ka kamaruk'e: Kafir! harus di adapatn ka Mahkamah Agama ba sae nang bakata: jahil! harus di sarahatn ka daapm neraka nang banyala-nyala.

²³ Barang koa, kade kao nyarahatn persembahan nyu ka atas mezbah, lalu kao taringat sasuatu nang ada daapm ati kamaruknyu ka kao, ²⁴ tingaatnlah persembahannyu ka adapatn mezbah koa tarus ampuslah badamai dohok ba kamaruknyu, lalu muaknglah agik untu nyarahatn persembahanyu koa.

²⁵ Bijaki'lah babaikatn ba munsuh nyu salama kao ba ia ka tangah maraga, biar munsuhnyu koa ame nyarahatn kao ka hakim, tarus hakim koa nyarahatn kao ka pambantu'e lalu kao di tabakatn ka pinjara. ²⁶ Aku bakata ka kao: Sasidie kao ina akan kaluar dari naun, sanape kao mayar utakng nyu sampe lunas.

²⁷ Kao udah nangar firman: Ame bajinah. ²⁸ Tapi Aku bakata ka kao: Satiap urakng nang nee nang bini tarus tanitiatn nang bini koa, ia udah bajinah ba ia ka daapm atie. ²⁹ Kade matanyu nang kanan nyasatatn kao, congkellah ba buaknglah koa, barang labih gagas bagi nyu kade sete'k dari anggota tubuhnyu binasa, dari pada tubuhnyu nang utuh ditabakatn ka daapm neraka. ³⁰ Ba kade kokotnyu nang kanan nyasatatn kao, tataklah ba buaknglah koa, barang labih gagas baginyu kade sete dari anggota tubuhnyu binasa dari pada tubuhnyu nang utuh taama'k ka neraka.

³¹ Udah di firmankan ugak: Sae nang nyareatn binie harus mare surat care ka ia. ³² Tapi Aku bakata ka kao: Satiap urakng nang nyareatn binie kacuali bajinah, ia nyajiatn binie bajinah; ba sae nang panganten ba nang bini nang di nyareatn, ia babuat jinah.

³³ Kao udah nangar ugak nang di firmankan ka na enek moyang diri'k: Ame basumpah palsu, tapi gangapmlah sumpahnyu ka adapatn Jubata. ³⁴ Tapi Aku bakata ka kao: Amelah sakai-sakai basumpah, baik demi angit, barang angit koa tahta Jubata, ³⁵ gek demi bumi, barang bumi koa pantinyakatn paha-E, atau gek demi Yerusalem, barang Yerusalem koa kota Raja Ayak; ³⁶ amelah ugak kao basumpah demi kapalanyu, barang kao ina bakuasa mutihatn gek ngitaman saamar buuk pun. ³⁷ Kade auk, kataatn auk, kade ina', kataatn ina'. Ahe nang labih dari pada koa barasal dari si jahat.

³⁸ Kao udah nangar firman: Mata ganti mata ba gigi ganti gigi. ³⁹ Tapi Aku bakata ka kao: Amelah kao malawan urakng nang babuat jahat ka kao, tapi sae pun nang nampar koo'k kanan nyu, bare'klah ugak ka ia koo'k keba' nyu. ⁴⁰ Ba ka urakng nang mao'k ngaduatn kao barang maoan bajunyu, sarahatnlah ugak salubong nyu. ⁴¹ Ba sae pun nang maksa kao bajaatn sa mil, bajaatnlah ba ia ugak sajauh dua mil. ⁴² Bare'klah ka urakng nang ba pinta ka kao ba ame lah nolak urakng nang mao' minyapm ka kao.

⁴³ Kao udah nangar firman: Kasihi' lah sabaya nyu manusia ba tegetatnlah munsuhnyu. ⁴⁴ Tapi Aku bakata ka kao: Kasihi' lah munsuhnyu ba badoalah untu dangan nang malasah kao. ⁴⁵ Barang aya koalah kao nyajiatan anak-anak Apaknyu nang kasaruga, nang narabitatn mataari untu urakng nang jahat ba urakng nang baik ba nurunan ujatn untu urakng nang banar ba urakng nang ina banar. ⁴⁶ Kade kao ngasihi urakng nang ngasihi kao, ahe gek upahnyu? Buke' me pamungut cukai tolen yakoa ugak? ⁴⁷ Ba kade kao kahe mare' salam ka kamaruk-kamaruk nyu maan, ahe gek labihe dari pada pabuatatn urakng lain? Buke me urakng nang ina nganal Jubata pun babuat ya koa ugak? ⁴⁸ Barang koa saharuse lah kao sampurana, sama aya Apak nyu nang ka saruga koa sampurana.