¹ Apas ka anam arie Yesus ngicakng Petrus, Yakobus, ba Yohanes adik-baradik-E, barage-rage ba kabatne Ia naik ka sabuah bukit nang tingi. Dikoa kabatne babro kahe. ² Lalu Yesus barubah rupa ka depan mata kabatne; muha-E bacahaya aya tolen mataari ba pakean-Ne jaji putih basinar tarakng. ³ Tarus kateeatnlah ka kabatne Musa ba Elia agik bakatai' ba Ia.

⁴ Ja Petrus ka Yesus: “Jubata repo sidi rasae parasa kami bisa ada ka tampat nyian. Kade Kao mao', biarlah ku diriatn dian talu kemah, sote' untu Kao, sote' untu Musa, ba sote' untu Elia.”

⁵ Lalu tiba-tiba ia agik bakata-kata turutnlah rahu' nang tarakng nonoi'k kabatne ba dari daapm rahu' koa kadangaratn suara nang bakata: “Nyianlah Anak nang Ku ngasihi, ka-Ialah Aku berkenan, dangaratnlah Ia.”

⁶ Nangaratn koa tasongkoplah murit-murit-Te ba kabatnne kagaianan. ⁷ Tarus Yesus atakng ka kabatne ba nyantuh kabatne sambi bakata: “Badirilah, ame gai'k!” ⁸ Ba sawaktu kabatne ngangkat kapala, kabatnne ina nee seko' urakng pun kacuali Yesus babaro.

⁹ Sawaktu kabatnne turutn dari bukit koa, Yesus bapasatn ka kabatne: “Ame kao curitaatn paneanan koa ka sae pun sanape Anak Manusia dibangkitatn dari antara urakng mati.”

¹⁰ Lalu murit-murit-Te batanya ka Ia: 'kade yakoa ngahe ahli-ahli taurat bakata kade Elia harus atakng doho'?

¹¹ Sahut Yesus: “Memang Elia ana akan atakng ba mulihatn sagala sasuatu ¹² ba Aku bakata ka kao: Elia udah atakng, tapi urakng ina nganal ia, ba memperlakukan ia menurut kamaoan kabatnne. Yakoa ugak Anak manusia akan atakng menderita di kabatnne. ¹³ Pas waktu koa ngaratilah murit-murit Yesus kade Ia bakata parihal Yohanes Pamaptis.

¹⁴ Sawaktu Yesus ba murit-murit-Te muakng ka urakng manyak koa, ataknglah seko urakng namui'k Yesus ba nyambah Ia, ¹⁵ jare: “Jubata, kasihatniklah anakku. Ia sakit gila babotn ba menderita sidi. Ia sering jantu' ka daapm api ba kadaapm aik ugak. ¹⁶ Aku udah ngicakng ia ka na murit-murit-Nyu, tapi kabatne ina' bisa nomoan ia.”

¹⁷ Lalu ja Yesus: “Hei kao angkatan nang ina' picaya ba sasat, sangahe lama agik Aku harus diapm ka antara kao? Sangahe lama agik Aku harus sabar ka kao? Icaknglah kamuda' koa ka dian!” ¹⁸ Yesus karas nagur ia, tarus kauwarlah setan koa dari kamuda' koa saketika koa ugak samuh lah kamuda' koa.

¹⁹ Tarus murit-murit Yesus atakng ba sawaktu kabatne babaro kahe ba Yesus, batanyalah kabatne: “Ngahe kami ina bisa ngajang setan koa?”

²⁰ Ia bakata ka kabatne: “Barang kao kurang picaya'. Koalah Aku bakata ka kao: Sasidie sakira' e kao ada ba iman sa aya'k egek sesawi maan kao bisa bakata ka bukit nyian: Pindah dari tampat nyian ka naun, tarus bukit nyian akan pindah, ba ina akan ada nang mustahil baginyu. ^{21 + [Jenis nyian ina bisa di gajang kacuali di usir bapuasa iya ba doa.]"}

²² Pas waktu Yesus ba murit-murit-Te barage-rage ka Galilea, Ia bakata ka kabatne: “Anak Manusia akan disarahatn ka daapm kokot Manusia ²³ ba kabatne akan munuh Ia ba ari ka talu Ia akan di bangkitatn. “Lalu ati murit-murit-Te koa pun jaji sedih sidi.

²⁴ Sawaktu Yesus ba murit-murit-Te sampe ka Kapernaum ataknglah panaap pajak Bait Jubata ka Petrus tarus bakata: “Gurunyu ina' gek mayar pajak dua dirham koa?”

²⁵ Sahut Petrus: Ia mayar.” Tarus waktu pas Petrus taama' rumah, Yesus nohoi'k ia ba pertanyaan: “Ahe gek pendapatnyu, Simon? dari sae gek raja-raja dunia nyian naap pajak? Dari rakyate gek dari urakng asing?”

²⁶ Sahut Petrus: “Dari urakng Asing!” Lalu ja Jesus ka ia: “Jadi bebaslah rakyate. ²⁷ Tapi biar ame diri' jaji batu sandungan untu dangan, ampuslah mancing ka danau. Tarus ikatn nang pertama nang kao mancing, taaplah ba bukalah moote, ana kao akan namuan mata duit ampat dirham ka daapme. Taaplah koa ba bayaratnlah ka kabatne, untu Ku ba untu nyu ugak.”