Pasal 1

1 Nyianlah silsilah Yesus Karistus, anak Daut, anak Abraham.

2 Abraham maranakatn Ishak, Ishak maranakatn Yakup, Yakup maranakatn Yehuda ba adi'-baradi'k e.
3 Yehuda maranakatn Peres ba Zerah dari Tamar, Peres maranakatn Hezron, Hezron maranakatn Ram,
4 Ram maranakatn Aminadap, Aminadap maranakatn Nahason, Nahason maranakatn Salmon,
5 Salmon maranakatn Boas dari Rahab, Boas maranakatn Obed dari Rut, Obed maranakatn Isai.
6 Isai maranakatn raja Daut. Daut maranakatn Salomo dari bini Uria,
7 Salomo maranakatn Rehabeam, Rehabeam maranakatn Abia, Abia maranakatn Asa,
8 Asa maranakatn Yosafat, Yosafat maranakatn Yoram, Yoram maranakatn Uzia,
9 Uzia maranakatn Yotam, Yotam maranakatn Ahas, Ahas maranakatn Hizkia,
10 Hizkia maranakatn Manasye, Manasye maranakatn Amon, Amon maranakatn Yosia,
11 Yosia maranakatn Yekhonya ba adi-baradi'k e pas sawaktu pambuangan ka Babel.
12 Salapas pambuangan ka Babel, Yekhonya maranakatn Sealtiel, Sealtiel maranakatn Zerubabel,
13 Zerubabel maranakatn Abihut, Abihut maranakatn Elyakim, Elyakim maranakatn Azor,
14 Azor maranakatn Zadok, Zadok maranakatn Akhim, Akhim maranakatn Eliut,
15 Eliut maranakatn Eleazar, Eleazar maranakatn Matan, Matan maranakatn Yakup,
16 Yakup maranakatn Yusup aki Maria, nang maranakatn Yesus nang disabut Karistus.

17 Jadi saluruhe ada; ampat balas katurunan dari Abraham sampe Daut, ampat balas katurunan dari Daut sampe pambuangan ka Babel, ba ampat balas katurunan dari pambuangan ka Babel sampe Karistus.

18 Kalahiran Yesus Karistus saparati aya nyian: Pada waktu koa Maria, uwe'k-E, batunangan ba Yusup, rupae e ia babuntikng dari Roh Baraseh, sanape ia badua koa idup jaji aki bini. 19 Barang Yusup akie urakng nang tulus atie na ia bai ngarusak dama binie ka muha umum, ia bamaksut nyareatna'k ia sacara diam-diam

20 Tapi sawaktu ia nimbang maksut koa, malaekat Jubata kateaatn ka ia kadaapm mimpi tarus bakata: “Yusup, anak Daut, amelah kao gai'k naap Maria untu' jaji bininyu, barang anak nang kadaapm buntiknge koa dari Roh Baraseh. 21 Ia ana akan maranakatn anak nang laki, kao ana akan mare Ia dama Yesus, barang Ia lah nang ana akan nyalamatatn umat-Te dari dosa.”

22 Hal koa jaji biar ganaplah nang difirmankan Jubata di nabi: 23 “Sasidie, anak dara koa akan babuntikng ba maranakatn seko kamuda laki, ba kabatne akan mare Ia dama Imanuel"- nang baarti: Jubata nyaratai diri'k. 24 Apas umpat dari tidure, Yusup babuat aya tolen nang dimarentahatn malaekat Jubata koa ka ia. Ia naap Maria jaji binie, 25 tapi ina basatubuh ba ia sampe ia maranakatn anake nang laki lalu Yusup mare dama Yesus ka Ia.