¹ Ghachagha busi, bisankogha banene nu bakungu ba bantu bakulumanagha ku lwango lwa kwitya Yesu. ² Mu kushila kumukanda, bamwekagha nu kumwesana kweli Potio Pilato, mukulu wa musumba.

³ Agho Yuda wamwesanagha, kulola buno aghibhwa, isangagha, nu kukulucha makumi masatu ma bichele kweli binsakogha banene nu bakungu,

⁴ mu kutenda: Nakitile bwaghi, mukukubulha mikila sitite bwaghi. Bamwakulagha: Tabitu ibyo? Byobe ibyo. ⁵ Yuda alekelagha bikulo mwa mu numba sa kukumbamila, intuchagha nu kwenda kwikama.

⁶ Basankogha banene bakunsagha byo, nu kutenda: Tabwaswagha bibikwe mu nsagho sa sanana, kubuno byeli ngulo sa mikilha. ⁷ Nu, gha bimilanagha baghulagha n'ibyo bikulo iswa lya kukundila bagheni. ⁸ Ichasula ilw'iswa lya manwa iswa lya mikilha kwikila lelo.

⁹ Agho byabelelagha byatendwagha na mulenganya, Yelemia: Batolagha bichele makumi masatu ma bikulo, kw'imbei lya whoso wasombwinde ku bana ba Isilaeli; ¹⁰ Nu abeleshagha byo kw'iswa lya mulangi, anga bwankakishagha Mukota.

¹¹ Yesu imalagha kue miso ma mukulu wa musumba. Mukulu wa musumba amubushagha luno lubusha: Uwe mwami wa Bayuda? Yesu amwakulagha: Wabutenda.

¹² Tondo ntakulagha kena ku bya mutalikinde bisankogha banene nu bakungu.

¹³ Inga Pilato amubula: Ntu kwongwa bibyo binsai bi bakutalikila? ¹⁴ Nu Yesu tamwakwinde kitondo champa, u cha ghaniaghaniagha mukulu wa musumba.

¹⁵ Mu kisaghulo kinsai, mukulu wa musumba abagha na ntungo sa kukandula mukandwa umoi, whoso waseghwa na kikembe. ¹⁶ Babagha na mukandwa umoi mubibu ukumanwa Balaba.

¹⁷ Bu babagha bakulumanile, Pilato ababushagha: Nai umwashima nibakandulile, Balaba, ali Yesu u kumanwa Kilishitu? ¹⁸ Kubuno amanagha bwesanilwe Yesu ku lughi.

¹⁹ Gha bagha ikalile gha kishumbi cha kukalila mbansa, mughole waghe amubulagha: Kubaghe kena ghasamba uwe n'oso wasanana; kubuno lelo nanuba mu ndoshi kubushi bwaghe.

²⁰ Bisankogha banene nu bakungu babulagha kikembe baseghe Balaba, nu bite Yesu. ²¹ Mukulu wa musumba abushagha: Nai kwabo babili u mwashima akandulwe? Bamwakulagha: Balaba.

²² Pilato ababulagha: Nikite kiki na Yesu, olya ukumanwa Kilishitu? Bansai bakulagha: Itwe ku musalaba. ²³ Mukulu wa musumba atendagha: Tondo bubi ki bwakitile? Nubansai bakughile bubibu: Itwe.

²⁴ Pilato mwa mukulola buno ntena kena, tondo lwayo lwaba lwingi, atolagha masi, nu kogha maboko mu miso ma kikembe, nu kutenda: Nshite bubi na mikilha s'ono wasanana. Binu ibyo.

²⁵ Nu bansai bamwakulagha: Mikilha saghe sibe ghantata ghitu nu bana bitu. ²⁶ Agho Pilato abasunulilagha Balaba, nu kushila kupunda Yesu na tuti, amwesanagha buno itwe ku musalaba.

²⁷ Basula ba mukulu wa musumba, bendagha na Yesu ku mu mulungu wa mbasa, nu bakulumanyagha mu ntungo saghe kikembe kinsai. ²⁸ Bamutuchagha nshulu saghe, nu bamushwalichagha kankamba kengenga. ²⁹ Balukagha lukumbu lwa mikele nu kumubika lo ghantata itwe, nu kumwelesha lukati mu kuboko kw'indume; bakomagha mashwe ghabusho nawe, mu kumusekelela nu kutenda: Samba, mukota wa Bayuda! ³⁰ Nu bamushwilinde matai, nu bakatilinde nkati, nu kumupunda kw'itwe. ³¹ Gha bashilagha kumusekelela, bamutuvhagha kankamba, nu kumukulukisha nshulu saghe, nu kumweka bende ku mwita ku musalaba.

³² Mu kukukuka, basangagha mulume umoi wa ku Kilene, ukumanwa Simoni, nu bamukakishagha eke musalaba wa Yesu. ³³ Ghabinde bika gha kishiki kimoi ki kumanwa Gologota, ukutenda kishiki cha lukungu, ³⁴ bamweleshagha kunywa mufinyo waswanyibwa na sifongo; tondo, ghabagha asonda kumo, ntashimagha kunywa. ³⁵ Mukushila kumwita ku musalaba, babeghanagha nshulu saghe, nu kwesela so mbale, buno bibelelele bibyo byatendwagha na mulenganya: Babeghanishe nshulu sani nu, besinde lopo lwani mbale. ³⁶ Agho bikalagha, nu kumwengelesha. ³⁷ Kwa kulosha kitondo cha lukwo lwaghe, batilagha ghantata n'itwe lyaghe: Ghono u Yesu, Mwami wa Bayuda. ³⁸ Ghamoi nawe, bitagha bisungu bibili ku musalaba, umoi kw'indume lyaghe nu ungo kw'ikashi. ³⁹ Batingi bamutukagha, nu kutenja matwe, ⁴⁰ mu kutenda: Uwe wakwendula numba sa kukumbamila, nu kusobaka mu bindi bisatu, wi'onye winene! Ndi uli Mwana wa Ghongo, kumba ku musalaba.

⁴¹ Bisankogha banene ghamoi na basanshi nu bakungu, nubo bamusekelinde, nu kutenda: ⁴² Oniagha bango, nu ntanakosha kuiyonia w'inene! Ndi eli mwami w'Isilaeli, akumbe ku musalaba, nu twamukatishe. ⁴³ Imbikagha kuli Ghongo; Ghongo amukandule lino, ndi amushima. Kubuno atendagha: Nili Mwana wa Ghongo. ⁴⁴ Bisungu bitwagha ku musalaba ghamoi nawe, bamutukagha nubo ubo.

⁴⁵ Kulingila saa mutuba kwikila sa mwenda, kantolompishi kabagha mu kisi kinsai. ⁴⁶ Nu mu kwikila sa mwenda, Yesu atendagha n'ishuki linene: Eli, Eli lama sabakitani? Ukutenda: Ghongo wani, Ghongo wani ki chasula wanshighilila? ⁴⁷ Bamoi ku babagha, mukumwongwilila, batendagha: Akumana Eliya. ⁴⁸ Nu agho, umoi kubo endagha lubilo kutola mbusu, ing'isasha so na byeli anga masi ma ndimu, nu kuba asishuka ku lubateka, amweleshagha anywe.

⁴⁹ Bango batendagha: Mushighe tulole ndi Eliya ashwe ku monia. ⁵⁰ Yesu atendagha lingo n' ishuki linene, nu kukala mutima. ⁵¹ Nu lola, nshulu sa numba sa kukumbamila satikagha ngendw' imbili, kulingila kw'ighulu nu kw'ika kunsi, kisi chatengagha, makoi manene matikagha, ⁵² nsinda sighukagha, nu mibili ningi sa basanana a'bo bakwagha, satukagha ku bakui. ⁵³ Ghabinde Yesu atuka ku bakui, babo basanana batukagha kubakui, bingilagha mu musumba wa sanana, nu kumoneka ko na bantu bengi.

⁵⁴ Mukulu wa basula ghamoi na babo babagha nabo buno balange Yesu, mu kulola mwako kalingini nu kw'ibyo byatinga, bakatwagha na boba bunene, nu kutenda: Bulili, whono mulume abagha Mwana wa Ghongo.

⁵⁵ Ghabagha bakashi bengi bakulolela kulai; Babo belekeshagha Yesu kulingila Galilaya mu ku mukitila milimo. ⁵⁶ Ghankatighi nabo Maliya wa ku Magadala, Maliya, nina wa Yakobo nu Yosefu, nu nina wa bana ba Sebedayo.

⁵⁷ Mw'igholigholo, mulume umoi mutumba wa kulimatea, ukumanwa Yosefu, ikagha, abagha nuwe mweghesha wa Yesu. ⁵⁸ Endagha kweli Pilato, nu kumwema mubili wa Yesu. Nu Pilato alekulagha eleshibwe gho. ⁵⁹ Yosefu atolagha mubili, kuubilinga mu mulekani, ⁶⁰ nu kuuwinda mu nsinda lighu, lyatimwagha mu lukunda. Agho ing'atimby'ikoyi linene gha mwingilo nu kwiyendela. ⁶¹ Maliya wa ku Magadala nu uly'ongo Maliya babagha agho bikalile bwighibwighi na nsinda.

⁶² Ghachagha busi bwayangana na bulongonanyi, Bisankogha banene nu bafalisayo, bendagha ghamoi kweli Pilato, ⁶³ nu kutenda: Mukota, twakengela buno whono muntu wa kw'itumbya atendagha, nti echeli gho: Ku bindi bisatu nkatuka ku bakui. ⁶⁴ Lekula nsinda silangwe mu bindi bisatu, begheshibwa baghe banashwa kwimba mubili, nu kubula bantu: Atukile ku bakui. Kuno kw'itumbya kushinda nti kwaghimba kusoki.

⁶⁵ Pilato ababulagha: Mwite balangi; Mwende, mulange ko anga bumwashima. ⁶⁶ Mukushila kubika kamanililo ku nsinda, bendagha na ndemalishi inene ku balangi.