¹ Bafalisayo nu basanshi batukagha ku Yelusalema, bikagha kweli Yesu nu kumubula: ² Ku buni begheshibwa bobe bakubela ntungo sa bakungu? Kubuno bakulya taboghile maboko.

³ Abakulagha: Nu benywe buni bumukubela lukakisho lwa Kalagha kubushi bwa ntungo sinu? ⁴ Kubuno Ghongo atendile: Ansa so nu noko; nu olya washulila ise ali nina atungana kukwa.

⁵ Tondo, benywe mukutenda: olya u kubala ise ali nina: Lukaso lunabagha nalo kobe, na lweleshishe Ghongo, nu nta n'ansa ise ali nina. ⁶ Mwatucha kitondo cha Ghongo ku mitali sa ntungo sinu. ⁷ Benywe bengelela, Isaya alenganishe ku mweli gha tendagha: ⁸ bano bantu beku n'ansa na milomo sabo tondo mitima sabo seli bulai n'ine. ⁹ Bekun'ansa tughutughu nu bekw'ighisha bantu nkakisho sa bantu.

¹⁰ Mu kumana kikembe kweli akibulagha: Mwongwe, nu mutegheleshe. ¹¹ Ta kicho kikwingila mu kanywa u kikubigyha muntu; tondo kicho ki kutuka mu kanywa u kikubighya muntu.

¹² Agho lino, begheshibwa baghe bamushighelelagha weli nu kumubula: Ntukumana buno Bafalisayo binishe mitima sabo mukwongwa ibyo bitondo? ¹³ Abakulagha: Mbuto si tashikwa na Tata wani wa mw'ighulu sikatomolwa. ¹⁴ Mubashighe; beli byuku bikusondolela byuku, nu ndi kyuku cha sondolela kingo ky-uku, bakolokela bo babili mu mushinga.

¹⁵ Petelo mukutenda amubulagha: Tulimbulile whuno mushumo.

¹⁶ Nu Yesu ababulagha: Nu benywe mwinda mulenganya? ¹⁷ Tamukumana buno ki kwingila mu kanywa kikwenda munda, nu nti chatebwa ku mambwe? ¹⁸ Tondo chatuka mu kanywa, kikutuka mu mutima, nu u kikubighya muntu. ¹⁹ Kubuno, mu mutima u'mukutuka makengelo mabi, bwiti, matensha, malimbya, bwimbi, nu buteneneki bwa manko, kutulanya bango. ²⁰ Lola ibyo u bikubighya muntu, tondo kulya nu nt'oghile maboko taku kubighya muntu.

²¹ Yesu mu kutuka agho, endagha mu kisi cha Tilo nu Sidona. ²² Nu lola, mukashi wa ku Kanana watukagha kushindashinda, amulekelagha mulenge: Mukota Mwana wa Daudi nkw'ile lukogho! Mukinga wani akutetembwa n'isumbu.

²³ Nta mwakwinde kena, nu begheshibwa baghe bashighelagha kweli nu kumubula na lukakisho: mutibite atwita na lwayo kumbusa kwitu.

²⁴ Akulagha: Nasingilwe tughu ku mbuli sa shiminde sa numba s'Isilaeli.

²⁵ Tondo amkomelagha mashwe mu kutenda: Mukota n'kashe,

²⁶ akulagha: Ta busogha kutola kampapa ka bana nu ku kalekela ku byana bya mbwa.

²⁷ Atendagha: Naki e Mukota, tondo byana bya mbwa bikulyagha bibyo bikukoloka ghakulila bisa mbwa.

²⁸ Agho Yesu amubulagha: Mukashi, lukatisho lobe luli lunene; kitilwa anga bubo bu washima. Nu mukinga waghe alamagha mweso nkungu.

²⁹ Yesu atukagha mwibyo bishiki, nu kwenda bwighi na kitatenge cha Galilaya. Mu kuba abakama mwinduko, a bundagha ghansi. ³⁰ Agho, kikembe kinene chashighelelagha kweli, bite babensekile bighansa, byuku, tulumbu nu basambi bengi. Babikwagha ku maghulu maghe nu abalamyagha; ³¹ nu kikembe chaghanaghanagha mu kulola tulumbu twatenda, basambi balama, ba bensekile bighansa batabanga, byuku bamona, nu chaghanulagha Ghongo wa Isilaeli.

³² Yesu mu kumana begeshibwa baghe atendagha: Nakwila kino kikembe lukogho kubuno bindi bisatu bino nili nabo nu tabite bya kulya. Nshinashima bende tabalile banakwila munsila.

³³ Begheshibwa bamubulagha: Buni butunaghula tumpampa twakwikutya kino kikembe kinene muno mu kalula? ³⁴ Yesu ababushagha: Mwite tumpampa tunga? Bamwakulagha: Mutubakamu nu bisonga bikeke.

³⁵ Agho lino, abulagha kikemb'e kibunde ghansi, ³⁶ Atolaha uto tumpampa mutubakamo nu ibyo bisonga, nu, kushila kukasanila, atuketulaketulagha. Nu atweleshagha begheshibwa baghe, nubo babeghanishagha to kikembe. ³⁷ Bansai balyagha nu bikutagha. Nu bisasagha byanshi mutubakamo na bindibindi byashighalagha. ³⁸ Babo balyagha babagha balume elefu inayi kutucha bakashi nu bana.

³⁹ Kushila agho, alaghagha kikembe, ingilagha mu bwato nu kwenda ku myelo sa kisi cha Magadani.