¹ Ubo busi, Yesu atukagha mu numba nu kwikala ku mutili wa kitatenge. ² Musanganano munene wa bantu wakulumanagha bwighi nawe, ingilagha mu bwato nu kwikala. Musanganano unsai wabagha ku muse. ³ Ababulagha bitondo bingi mu mashumo nu kutenda: ⁴ Mushiki endile kushika mbuto saghe. Nu mu kusansa mbuto 'emoi sa kolokinde muntungo na nsila, nu tusoni twashwile, nu kulya. ⁵ Engo sa kolokinde ghantata na lughangala, kuteli 'itete lingi, sasagha nu kubuno sindagha'itete, ⁶ tondo, ghasanagha musi, sayile nu kukama, kubuno sindagha mishi. ⁷ Engo sakolokelagha mu mikele, mikele sakulagha nu kusikundeghelesha. ⁸ Engo sakolokelagha mw'itete lisogha; Sakonamyagha bighuma bingi, emoi ighana, nu engo makumi mutuba, nu engo makumi masatu. ⁹ Olya w'ite matui makongwa, ongwe.

¹⁰ Begheshibwa bashighelelagha nu kumubula: Buni buukutenda nabo mishumo?

¹¹ Yesu abakulagha: Kubuno benywe mweleshibwe menge ma kumana bindo bya bukota bw'ighulu, nwabo tabeleshibwe bo. ¹² Kubuno akeleshibwa olya wite kikai nu 'akaba na bingi, tondo olya utite kena, akanaghwa nu cha kiite. ¹³ Uchasula, nkutenda nabo mu mishumo, kubuno mu kulola tabakulola, nu mu kongwa, tabakwongwa nu taba kumana. ¹⁴ Nu ku beli, bikuke bibyo byatendwagha na mulenganya Isaya; Mukongwa na matui minu nu tamukamana, mukalola na miso minu nu tamukateghelesha.

¹⁵ Kubuno, mutima w'icho kilongo weli mubibu; bashibile matuyi mabo nu kushiba miso mabo, buno bamonaghe na miso mabo, ali kongwa na matuyi mabo, nu ta bekuteghelesha na mitima sabo, tabaghaluke nu nshibalamye.

¹⁶ Tondo, makasanilwe miso minu, buno makumona, nu matui minu, buno makongwa. ¹⁷ Nkubabula bulili balengenya bengi nu bantu basogha bashimagha kumona ku binsai bi mukumona ko, nu tabamonile kubyo, kungwa ku bimukongwa, tabongwilile kubyo.

¹⁸ Benywe lino, mongwilile bwatenda mushumo wa mushiki wa mbuto. ¹⁹ Ndi muntu ongwa kitondo cha bukota nu nta teghelesha cho, musumbu nti ashwa kutucha cha shikwagha mu mutima waghe; whoso muntu u'olya wa mbuto sa kolokelagha mu ntungo na nsila. ²⁰ Olya wa mbuto sakolokinde ku lughangala, u 'whoso ukongwa kitondo nu nti akikatilila na mboghimboghi; ²¹ Tondo kubuno ntite mishi munda nawe, ta kukokomesha nu ndi munubo ali lubabasho lwika kubushi bwa kitondo, nu nti amona nsila s'ikitalo. ²² Olya wa mbuto sa kolokelagha mu mikele u'ghoso ukwongwa kitondo, tondo tubebe twa bindi nu bwengelela bwa bikulo bi kukundeghelesha kicho kitondo nu ntakukonamya kena. ²³ Whoso wa mbuto sakolokelagha mw'itete lisogha, u'whoso ukongwa kitondo nu kukiteghelesha; akukonamya bighuma, emoi ighana, engo makumi mutuba, nw'engo makumi masatu.

²⁴ Ababulagha ungo mushumo: Bukota bwa mw'ighulu bwasusana na muntu washikile mbuto nsogha mw'iswa lyaghe. ²⁵ Tondo ghabagha bantu bayama, mughinighini waghe ashwagha, ashikagha mbuto mbi sasusa ngano munkatighi na ngano, nu endagha. ²⁶ Mu kwasa kwa mbuto nsogha nu ku konamya bighuma, eso mbuto mbi nuso samonekagha ko. ²⁷ Bakiti b'inene iswa bashwagha kumubula: Mukota, ntwashikagha mbuto nsogha mw'iswa lyobe? Kuni kwatukila seso mbi?

²⁸ Abakulagha: Mughinighini u wakitile ubo. Nu bakiti bamubushagha: Washima twende kutomola so?

²⁹ Nu kilo, mukutomola so munatomola nu ngano. ³⁰ Mubishighe bikulile ghamoi, kwikila bindi bya buusi nu mw'ibyo bindi n'kabula bakani, mwatomolagha tanga mbuto mbi, nu kuasikanda bibombo bibombo nu kubighisha, tondo mwa kunsamanyagha ngano mu kigholo chani.

³¹ Ababulagha ungo mushumo nu kutenda; Bukota bwa mw'ighulu bwasusana na mubhibho washikagha muntu mw'iswa lyaghe. ³² Seli nkeke ku mbuto insai tondo mwa mu kukula kwa'so, satinga bilibwa nu kuba muti, tusoni tw'ighulu nti twashwa kobaka mu ntabe saghe.

³³ Ababulagha ungo mushumo: Bukota bwa mw'ighulu bwasusana na mughagho w'indagha mukashi mu ntengi isatu sa nshano, inga saghaghya buntu bunsai.

³⁴ Yesu atendagha na musanganano bitondo binsai mu mashumo, ntatendile nabo mute mu mashumo. ³⁵ Kubuno bibelelele byatendwagha na mulenganya: Nkatenda mu mashumo, nu nkasansa bibyo byabisilwe kulingila kubumbwa kwa kisi.

³⁶ Agho akuluchagha musanganano, nu kwingila mu numba. Begheshibwa baghe bashighelelagha bwighi nawe nu kumubula: Tulimbulile mushumo wa mbuto mbi mw'iswa.

³⁷ Abakulagha: Olya ukushika mbuto nsogha u Mwana wa Muntu; ³⁸ iswa u kisi, mbuto nsogha, u bana ba bukota, mbuto mbi u bana ba musumbu; ³⁹ mughinighini wasishikagha u Kahinga, buusi u busi bushinda bwa kisi, bakani u baghensi. ⁴⁰ Nu anga buku tomolwa mbuto mbi nu kusilekela mu kaya, u bukaba kindi kishinda. ⁴¹ Mwana wa muntu akasinga baghenshi baghe bakatucha mu bukota bwaghe binsai bikwaghya nu babo bakukita bwaghi; ⁴² Nu ba kabalekela mu mutula munene wa kaya u kukaba indilo nu kukala mino. ⁴³ Agho, bengya mitima bakasana anga musi mu bukota bw'ise wabo. Olya wite matui ma kongwa ongwe.

⁴⁴ Bukota bwa mw'ighulu bwasusana lingo na bikulo byabisilwe mw'iswa. Muntu wa bimonagha abibisagha nu mu mboghimboghi saghe endagha kughusha byaghe binsai nu kughula lily'iswa.

⁴⁵ Lingo, bukota bwa mw'ighulu bwasusana na mutimbuli u kulonda tutungwa tusogha. ⁴⁶ Nu ghamonagha katungwa k'imbei linene; nu endile kughusha binsai byabagha nabyo nu kukaghula.

⁴⁷ Bukota bwa mw'ighulu bwasusana lingo na kakila kalekelwagha mu kitatenge, nu kakunsumanyagha bisonga bita susana. ⁴⁸ Gha kisalagha, babughi bakabuluta; nu mu kwika gha muse, babika bisonga bisogha mu nshi nu kuta bya bibi. ⁴⁹ U bukaba ubo busi bushinda bwa kisi. Baghenshi bakashwa kulekanucha babi nu basanana, ⁵⁰ nu bakabalekela mu mutulha munene wa kaya, u mukaba indilo nu kukala mino.

⁵¹ Mwongwa bino bitondo binsai? Naki, bamwakulagha: Twongwa.

⁵² Nu ababulagha: Uchasula musanshi unsai wegheshwa bitondo bya bukota bwa mw'ighulu, asusana n'i nene numba ukusombola mw'isengo lyaghe bikai bya tenene nu bibyo bindisha.

⁵³ Mu kushila kutenda amo masumo, Yesu, atukagha uko. ⁵⁴ Mu kwika mu kisi chaghe, egheshagha mu masinakoki, nu babo bamwongwililagha batangalagha nu kutenda: Kuni kwatucha, whono muntu mano menge nu bino bitangalo? ⁵⁵ Whono t'o mwana wa muselemala? Ta nina u Malia, Yakobo, Yosefu, Simoni nu Yuda ta bisakwabo? ⁵⁶ Nu babitu baghe tabeli mu kantighi na beshwe? Kuni kwatucha lino bino bitondo binsai?

⁵⁷ Nu abinde nsila s' ikitalo ku beli. Tondo Yesu ababulagha: Mulenganya ntabengwe mute mu kisi chaghe nu mu numba saghe. ⁵⁸ Nu ntakitile lingo bitangalo bingi uko, kubushi bwa kutakatisha kwabo.