¹ Yesu aja omu nkuge, ashabuk'enyanja, aj'omu chishagala chage. ² Honaho, bamulerher'entagenda, elyamire oku chipoyi. Yesu abon'obwemere bwabo, abwira eyo ntagenda: Ochih'omurhima, mwana wani, wamababalirwa ebyaha byawe.

³ Lero baguma omu bashamuka b'ehano, bakenger'omu mirhima yabo: oyu amagomera Nyamuzinda. ⁴ Naye Yesu eyamenyere enkengero zabo, aderha mpu: Gurhe muli mwakenger'amabi omu mirhima yenyu? ⁵ Bichi bigalikire eyo kuderha: Ebyaha byawe byamababalirwa, eri oku derha: yumuka, olambagire? ⁶ Lero yimumenya oku Mwene Omuntu agwerhe obuhashe bw'okubabalir'ebyaha byen'ogulu, abwira ela ntagenda, mpu; yumuka, orhol'echipoyi chawe, oj'emwawe. ⁷ Ayumuka aj'emwage. ⁸ Abantu babere babona ntyo, bayubaha, bakuza Nyamuzinda, owaher'abantu obuhashe buli ntyo. ⁹ Eri Yesu arheng'eyo, agera, abon'omuntu oyikere ahantu hokufurhis'ebarati, ezino lyage Matayo. Amubwira nkulikira. Oy'omuntu ayumuka amushimba.

¹⁰ Eri Yesu aber ali alya omunju, abafurhisa b'ebarati n'abanya -byaha bayinja, balira haguma naye n'abegirizwa bage. ¹¹ Abafarisayo babwenentyo, babwir'abegirizwa bage: chichi chirhumire Nahamwenyu alira haguma n'abafurhis'ebarati n'abanyabyaha?

¹² Yesu ayunvire ntyo, ababwira mpu: Arhali abagumaguma babalagirir'omushake, s'aliko abalwala. ¹³ Mujidosw'ogumwazi chichi guderhere: Lukogo ndonza, s'arhali nchungulo: Nta yinjaga hamagala abachere, s'aliko abanya byaha.

¹⁴ Lero, abegirizwa ba Yohana bashegerera hofi na Yesu banamubwira mpu: Chichi chirhuma rhwabo n'Abafarisayo rhuchishalisa, abegirizwa bawe bowe nanga?

¹⁵ Yesu abashubiza: Abera ba muhya -mulume bankachishalisa bachiri haguma naye? Esiku za chiyinjw'omuhya-mulume abarhengako, n'amo mango banachishalisa. ¹⁶ Ntay'ohangir'echilaka chihyahya oku mushangi gushajire, bulala chanaberw'omushangi n'obubere bwanayushuka. ¹⁷ Ntay'obika amavu mahyahya omu ndaha zamira, bulal'ezo ndaha zanabasha, n'amavu ganasheshekala, wanabul'amavu n'endaha. Aliko banahir'amavu mahyahya omu ndaha zihyahya, bibere bwinja byombi.

¹⁸ Abere aly'aderha eyo myazi, murhegesi muguma ayinja, amuharamya: ¹⁹ Aderha Kachanji kano mwali wani afire, s'alikw'oyinj'omuhire kw'efune, analama. Yesu ayumuka n'abigirizwa bage, bamukulikira.

²⁰ Aho, omukazi wa lwalag'endwala y'okurheng'eshagama myak'ekumi n'ebiri, amuhuluk'enyuma, aahuma oku chishumiro ch'omwambalo gwage. ²¹ Eryalemag'aganiza omu murhima gwage, mpu: Nkahuma oku mwambalo gwage na fuma.

²² Yesu ahindamuka amubona amubwira: Ochihe omurhima, mwali wani, obuyemere bwawe bwakufumize. N'oyo mukazi afuma honaho. ²³ Eri Yesu agera aham'olala murherhegesi n'ery'abon'abali baziha n'okuzina omulizi n'abantu balemaga bajir'olwamo, ²⁴ ababwira mpu; Murhenge, bul'oyu mwana-nyere arhafire s'alikw'ali ero. Nabo bamushekera. ²⁵ Aber'ama fuhir'olubaga, ajw'omunju, afarha okuboko koyo mwana - nyere, n'omwana - nyere azuka. ²⁶ Ogw'omwazi gwa yenera mw'echo chihugo choshi.

²⁷ Eri Yesu arhengaho, mihurh'ebiri yamushimba, yalema yahamagala n'okuderha mpu: Mwene Daudi, mani orhuber'obonjo.

²⁸ Amango Yesu ahikag'omunju, elala mihurha ya mushegerera, ayibwira: Ka muyemerere oku nakabajirira ntyo? Nabo bamushubiza: Nechi, Nahano!

²⁹ Honaho, Yesu abahuma okumesho, ababwira: Bibabere nk'oku mwanayemerere. ³⁰ amesho gabo gahurhuka (gabona), Yesu abakomereza ababwira: Mumenye, ntaye mubwirage. ³¹ Bowe, babere bagenda balumiz'erenge lyage mw'echo chihugo.

³² Okubahuluka ntya, balerhera Yesu akaduma kali mw'abazimu. ³³ Aber'akulam'oyo muzimu, kalala kaduma kaderha. Abantu boshi basomerwa, balema baderha; Okuli ntya kurhasagi bonekana munola Israeli!

³⁴ Aliko Abafarisayo baderha: Obola buhashe bokukula omuzimu, mwami wabazimu omuhere bo.

³⁵ Yesu alemag'agera omu bishagala byoshi, ely'ali ayigiriz'omu sinagogi, alem'ayigiriz'emyazi y'omurhula y'obwami, n'okufumy'endwala zoshi na ngasi bulema. ³⁶ Abwen'echigusho ch'abantu charhamire bwenene achiber'obonjo bunene bulala balemaga balola nka bibuzi birhaherhe mungere. ³⁷ Na ntyo abwir'abegirizwa bage: Omushalulo gulugire, s'alikw'obakozi bakehere. ³⁸ Muhune nin'omushalulo, arhum'abakozi omu mushalulo yage.