¹ Okuhandi Yesu, abwira echigusho n'abigirizwa bage, aderha: ² Abandisi n' Abafarisayo bayikere oku chichumbi cha Musa. ³ Lero mukole n'okulola byoshi yi bababwira: Aliko murhakolaga nk'okubali bakola. Bulala banaderha barhanakola. ⁴ Yi bashana ebikunga bizidohere, n'oku bihira okubirhugo by'abantu, aliko bowe barhakabihumako n'emidoke yabo. ⁵ Yi bakola emirimo yabo yoshi enyanya y'okulonza babonekane n'abantu. N'oku ntyo yi bayambala amagerha (engisha), n'okuyushula ebishumiro by'emyambalo yabo. ⁶ Basima ahantu hembere omu buhya, n'okuyikala embere omu murhundu; ⁷ basima balamuswe omu chambu, n'okuhamagalwa n'abantu rabi, rabi. ⁸ Aliko mwabo, murhakazagilonza babahamagala Rabi; bulala omwigiriza wenyu ali muguma, nenyu mweshi muli ba nda nguma. ⁹ Nta muntu muhamagalage oku gulu mpu ye yisho; okubona oku Yisho ali muguma, oli omu mpingu. ¹⁰ Murhachihamagalaga, bachirongozi, bulala chirongozi wenyu ali muguma, ye Kristu. ¹¹ Owakaba mukulu omu mwabo njaba mukozi wenyu. ¹² Ngasi owakachizamula nji bamuyandagaza, na ngasi wakachiyandagaza nji bamuzamula.

¹³ Buhanya emwenyu mwe bandisi n' Abafarisayo, ndyalya! Bulala munalahiza abantu obwami bw'empingu, nenyu murhanajamo, murhanaleka abalonzeze okuja mo baje mo. ¹⁴ Muli ndyalya! Kubona oku yi mwalya eby'abakana n'okuhuna amahuno galehere; enyanya z'ebyo nji mwahanwa bwenene. ¹⁵ Buhanya emwenyu bandisi n' Abafarisayo, ndyalya! Kubona oku yi mwagenda ebwa nyanja n'omu gulu lyoshi, enyanya y'okulonza muhindamule omuntu, na mukamala muhindamula mumujire mwana w'echihenama kubalusha.

¹⁶ Buhanya emwenyu, birongozi mpumi, muli mwaderha, oku, omuntu wakajira endahiro oku zino ly'eshengero, mpu nta buhaka; aliko owakalahira oku zino ly'ehoro z'omu shengero, eya chishwekere oku chilapo. ¹⁷ Mwe binganyi n'empumi! Bichi bikulu bwenene, eri horo, changwa eshengero lya komyaga e horo? ¹⁸ Eri mwakaderha kandi, ok'omuntu wakahakana oku zino ly'olurhamba nta buhaka; aliko omuntu wakalahira oku zino ly'entulo eli enyanya w'olurhamba, achishwekere oku ndahiro. ¹⁹ Ego mw'empumi, bichi bikulu kulusha, eri ntulo chango olurhamba lwa komyaga entulo? ²⁰ Na mbona omuntu olahirira olurhamba, analulahira n'okulahira ebiri kwo byoshi; ²¹ N'owalahira oku zino ly' eshengero, alahira oku shengero n'oku zino ly'olamire mo. ²² N'olala wakalahira empingu, alahire entebe ya Nyamuzinda n'olala oyikere oku yo.

²³ Buhanya bwenyu, bandisi n' Abafarisayo ndyalya! Bulala muli mwarhula echiguma ch'ekumi ch'emento, n'eneto, n' echimino, mugali leka n'ebya kamaro omu rhegeko, obushinganyanya, n'obonjo, n'okurhalyalihya: ebyo by'ebyalihemerwe bikolwe buzira kuleka ebindi byoshi. ²⁴ Birongozi mpumi, yi mwalibisya emigu n'okumira egamiya.

²⁵ Buhanya bwenyu, bandisi n' Abafarisayo, ndyalya! KUbona oku muli mwashuka emugongo gwe ngumbu n'embale, nabo omu nda muyunjwire obushambo, n'obudambi. ²⁶ Mufariyaso mpumi! rhangw'oshuke omunda w'engumbu n'embale, mpu ly'ebiri emungongo nabyo bikoma.

²⁷ Buhanya bwenyu bandisi n' Abafarisa, ndyalya! kubona oku mushushire nka shinda eshigirw'eburhambi, ekwirire, ebonekene bwinja embuga, aliko omunda mubumbire mavuha n'emifu, n'ezinga lyabuli lubero. ²⁸ Nenyu ntyo kumunali, embuga mwanabonekana nka bashinganyanya, aliko omundalala zenyu mubumbir'obulyalya, na ngasi mabi.

²⁹ Buhanya bwenyu bandisi n' abafarisayo, ndyalya! Kubona oku yi mwayumbaka eshinda z' abalebi, n'okushiga entindiva z'abashinganyanya, ³⁰ n'okuderha mpu nka rhwewe rhwaliri ho amango ga badarha, rhurhankachihebere haguma nabo omu kushesha eshagama y'abalebi. ³¹ Mwamachihamiriziza mwenyine oku muli bana b'abayirhaga abalebi. ³² Muyunjuzage olugero lwa Basho nenyu. ³³ Muli njoka, munali bana banjoka! Gurhe nji mwafuma amalibuko m'echi chihenama? ³⁴ Che chirhumire, mubone, mbarhumire abalebi, n'abanya bwenge, n'abandisi, banene babo mwabayirha n'oku balibuza, n'abandi mw'abashurha emizareti omu mirhundu yenyu, n'oku bashandaza chishagala oku chishagala. ³⁵ Mpu limuheswa ngasi shagama y'abashinganyanya bayirhwa kuno gulu, kurhenga oku shagama ya Abeli muchesibwa, kuger'oku shagama ya Zekariya, mwene Barakiya, mwayirhiraga omu shengero embere z'olurhamba. ³⁶ Okuli mbabwirire eyi myazi yoshi nji yaja oku rhwe ly'ogu mulala.

³⁷ Ego Yerusalema, Yerusalema, yi wayirha abalebi n'oku bashurha amabale, ngasi kubarhuma emwawe, kanga nalonzeze okugusha abana bawe, kula engoko egusha orhurhulage rhwayo omu byubi, murhanalonzaga. ³⁸ Mulole kw'enju yenyu njiyalekwa butambara. ³⁹ Ch'echirhumire mbabwirire, murhakachimbonako chiro, kugerera amango mwaderha: Agishwe oyu oyinjire oku zino lya Nahano !