¹ Ak kinyo eng' betusiechoto Johana kabatisanindet koamdaati eng' surkwenutab Judea kolen, ² "Osigu, amu kagorik bounatetab kipsengwet." ³ Amu inendet ne ki kamwa maotiot Isaia kole, "Tugetab inendet ne kursei eng' surkwen, kolen 'Ochob oretab Kiptaiyat, olitit ortinwekchi."

⁴ Ak kiiloochi Johana sambutab tambesaik, ak kirotegei birirwetab muito eng suwennyi. Ak ki amitwogikyi ko chereng'enyik ak kumiatab kertit. ⁵ Ak kimong' bikab Jerusalem ak Judea komugul ak komoswek che legite Jordan koba ole mi inendet. ⁶ Ak kibatisan inendet icheket eng' Ainet ne kiguure Jordan, kong'anyei tengekwogikwai.

⁷ Ago ye kingogeer che chang che bo Parisaik ak Sadukaik kobwanjini kabatisanenyi, koleji icheket," Legochu bo erenok che ng'wonen, ng'o ne keteiywok oyestae nerekek che bwonii? ⁸ Oiiye anyun logoek che nyoljini sigunet. ⁹ Ama tobwat eng' kwenung'wong omwoe ole, 'kitinye kwandanyo Abraham.' Amu amwawok ale imuchi Jehova kong'eetyi Abraham leguk eng' koichu. ¹⁰ Mbo raa ko kigendeno aiywet tikitikab ketik tugul. Ago kitile anyun ketit age tugul ne ma iye logoek che kororon ak kewirji mat.

¹¹ Abatisonok iman eng' beko ne bo sigunet. Ago tinyei kimnatet kosiiro inendet ne rubwo, ma nyolunot mbo aipchii kweonikyi. Ibatisonok inendet eng' Tamirmiriet Ne Tilil ak eng mat. ¹² Tinye eng' eunyi keibenyi ak kotilili komie kieng'ut ak koumji nganuk chokennyi. Ak kobelei metetek eng mat ne ma ki muchi kebar."

¹³ Kinyo anyun Jeiso kobunu Galili, agoi Jordan ole ki mito Johana si kobiit kibatisan. ¹⁴ Ago kimachei Johana kotai, kolejini, "Kanyol ibatisana inyendet, ago kechonjo ane?" ¹⁵ Ago kiwolji Jeiso koleji, Chamjii raa, amu kanyoljech kesulde imanda tugul." Ko u noto kocham anyun Johana.

¹⁶ Ak kingo kagebatisan, komong anyun Jesio kolong' eng' beko, ak ogeero, kiyaatagis kipsengwetisiek. Ak kigeer Tamirmirietab Jehovah kowolu ko uu cheptuget ak kotonoon eng barakunyi. ¹⁷ Ogeer anyun, kimong' tuget kobun kipsengwet, ne kimwa kole, "Ni ko werinnyu ne achame. Abaibai mising agobo inendet."