¹ Bukuit nebo oretab Jesio Kristo, weritab Daudi, weritab Abraham. ² Kisich Abraham Isak, ak kisich Isak Jakobo nebo Juda, ak chE tupcho. ³ Ak kisich Juda Pares ak Zera eng' Tamar, ak kisich Pares Hesron ak kisich Hesron Ram. ⁴ Ak kisich Ram Aminadab, ak kisich Aminadab Nason, ak kisich Nason Salomon. ⁵ Ak kisich Salomon Boas eng' Rahab, ak kisich Boas Obed eng' Ruth, ak kisich Obed Jesii. ⁶ Ak kisich Jesii Laitoriat Daudi. Ak kisich Daudi Solomon eng chepyosetab Uriah. ⁷ Ak kisich Solomon Reoboam, ak kisich Reoboam Abija, ak kisich Abija Asa. ⁸ Ak kisich Asa Jeosapat; ak kisich Jeosabat Joram, ak kisich Joram Usia. ⁹ Ak kisich Usia Jotam, ak kisich Jotam Ahas, ak kisich Ahas Hesekia. ¹⁰ Ak kisich Hesekia Manase, ak kisich Manase Amon, ak kisich Amon Josia. ¹¹ Ak kisich Josia Jekonia ak che tupcho eng' betusiek che kiga kimut biko koba Babulon.

¹² Ak kingo kagemut koba Babulon, ak kisich Jekoniah Sealtiel, ak kisich Sealtiel Serubabel. ¹³ Ak kisich Serubabel Abiud; ak kisich Abiud Eliakim; ak kisich Eliakim Asor. ¹⁴ Ak kisich Asor Sadok, ak kisich Sadok Akim, ak kisich Akim Eliud. ¹⁵ Eliud ne kikwandab Eleasar, Eleasar ne ki kwanitab Matan, Matan ne kikwanitab Jakobo. ¹⁶ Jakobo ne ki kwanitab Josep boiyotab Maria ne kisich Jeiso ni kiguure Kristo.

¹⁷ Kiek ebenwek tugul taman ak ang'wan kong'etee Daudi agoi kamutet ne kigimut biko koba Babulon, ak kiek ebenwek taman ak ang'wan, kong'ete ng'emut koba Babulon agoi Kristo.

¹⁸ Sigetab Jesio Kristo ko kibiit eng oret ne u ni. Kingo kagochamyechi Josep Kotungei ak Maria kametab Jesio, ko kingo tomo kotuiyo, kotook kele managat inendet eng' Tamirmiriet Ne Tilil. ¹⁹ Ako kimoche Josep, sandenyi, kole kobagakta eng' ung'ot amu kima cham kotewer inendet eng' taitab biko, amu ki chi ne bo imanda inendet. ²⁰ Ago kingoto kobwati tuguchuto, komongji inendet malaikaiyatab Kiptaiyat eng' karuotitoet, kole, "Josep weritab Daudi ameiywei imutyigei Maria chepyoseng'ung' amu managat inendet eng' Tamirmiriet Ne Tilil. ²¹ Tun sichei inendet werit ne saru bikyii eng' tengekwogikwai". ²² Ak kiyoogis tuguchu tugul, si kobiit kosulda ne kiga mwa kiptaiyat eng' maotiot kole, ²³ "Keer, anyun manochi bergeiyat ak kosich werit, ak keguure kainennyi Imanueli"---- ne ngeweech ko, "Mito Jehovah kobotech." ²⁴ Ak king'eet Josep eng' rwondonyi ak koeei ko u ye king'at malaikaiyatab kiptaiyat ak kimutyigei chepyosennyi. ²⁵ Ak kima rikyi inendet agoi kosich werit. Ak kiguree kainennyi Jeiso.