¹ Jesus opo aghurumukire atunde kundundu, mbunga yayinene nayo ayi mukwama. ² Makura, muntu wavingondwe aya kukwendi makura atongamene kumeho yendi, aghamba ashi, "Hompa, nkene kughuvipanga, kuvhura ghunkenite nuveruke."

³ Jesus makura ahonyonona lighoko lyendi amukambeke, aghamba ashi, "Ame navipanga. Veruka." Mpopo tupu averuka akare ana kushuka, vingondwe avitundupo pa rutu rwendi. ⁴ Jesus amutantere ashi, "Kenga weno shapuka ghuyende kwato ogho ghuvhura kughamba naye mundjira yoye. Yenda mundjira yoye, ghuka moneke ku vapristeli, makura ghuka tape ndjambo yoye oyo aturapo Moses, yika kare umbangi ghoye kukwavo.

⁵ Jesus opo ayatikire muKaperenimu, makura mukurona wa vakavita aya ku kwendi, ashungida ⁶ kumwe na kughamba ashi, "Hompa, mukareli wande kunarara mumundi kwato kuyenda, kwato nkondo murutu kuna ku vera unene."

⁷ Yesus amutantere ashi, "Ame kunu yenda nuka muverure."

⁸ Mukurona wavakavita alimburura kumwe naku ghamba ashi, "Hompa, ame kapi nahungama ashi ove ghuvhure ku ngena mumundi wa wande. Ghamba tupu nkango makura mukareli wande ndi kwa veruka. ⁹ Mukonda shi name muntu ogho vatura mushiruwana sha lipangero, ntani nakara na vakavita munda ya lipangero lyande. Nkene anu ghamba kwa ghumwe ashi, "Yenda," akona kuyenda ntani, ndi nughambe kwa umwe ashi, "Ya," ghuye akona kuya ntani, ntani nange anu tantere mukareli wande ashi, 'ruwana vino,' akona kulimburukwa ntani ghuye aviruwane.

¹⁰ Yesus opo ayuvhire vino, ghuye kwatetukire unene makura atantere mbunga yavantu ovo vamukwamino ashi, "Ushili vya ushili na kumutantera ashi, ame shimpe kapi nawana mo ghumwe walipuro lyaku hura-pano mu vaIsraeli. ¹¹ Ghushili na kumutantera ashi, vavayingi ngava katunda ku upumeyuva na ku utokero, makura ngavaka shungira ku ntishe ngava kadjombwane kumwe na Abrahamu, na Isak, ntani na Yakopu, mu untungi wa liwiru. ¹² Ano ngoli vantu vamu untungi ghuno ngava kava vhukumina pandje mulikurundema, omo ngava kalira-malira-nkali kumwe naku kukwetja pamayegho." ¹³ Yesus atantere mukurona wa vakavita ashi, "Yenda! Vishoroke kutwara mu lipuro lyoye, mo va vhura kuvi kuruwanena." Makura mukareli wendi averuka mpopo pa shirugho osho.

¹⁴ Yesus opo ayatikire mumundi wa Petrusi, aya wana va ngumweyi va Petrusi vana rara kuna kuvera lishakima. ¹⁵ Yesus ava vakwata ku lighoko lyavo, makura lishakima ali vatundu. Mpopo tupu ava shapuka vatameke ruwana muyusha vatape kukwendi.

¹⁶ Opo lya ghombokire liyuva, vantu ava yita vantu vavayingi ovo va kaliro na mpepo dadidona vavayite kwa Yesus. Ghuye atjidamo mpepo dadidona na nkango makura averura vaveli navantje. ¹⁷ Vino kwa shorokire mposhi ditikiliremo nkango odo aghambire muporofete Isaya ashi, "Ghuye mwene kwa ghupa mbyo adamuna ashimbe ma uvera na mahamba ghamu rutu rwetu mposhi atwe tukare na marutu gha ndjewa-ndjewa."

¹⁸ Yesus opo amonine mbunga yayinene yina mu kundurukida, ghuye atantere vantu vamutware musheli munya ya lifuta lya Galileya. ¹⁹ Makura murongi matjangwa ghumwe aya kukwendi aghamba ashi, "Murongi, ame kehe kuno ngaghu yenda ove nganu kwama-kwama."

²⁰ Yesus alimburura ashi, "Vambwawa kwakara namakwina ghavo, ntani vidira vya ku wiru vya kara na vitunguru vyavo, ano ngoli Mona Muntu kundereko livhango lyaku vhura kutatera mutwe wendi."

²¹ Ghumwe wa varongwa vendi aghamba ashi, "Hompa, pulitira tanko nuvyuke nganu kavhumbike va vava."

²² Yesus amutantere ashi, "Ove nkwame, shuva vafe va vhumbike vafe vavo."

²³ Yesus opo arondire mu wato, varongwa vendi navo ava rondo vamukwame. ²⁴ Vakuharukako tupu likundungu lya mankumpi na mpepo kuna kuyunga unene mulidiva, wato kuna kuyura ma nkumpi. Ano ngoli Yesus ghuye kuna rara turo. ²⁵ Varongwa vendi ava ya kukwendi vamu rambwite kuturo, kumwe na kughamba ashi, "Tupopere, Hompa; atwe kuna kufa!"

²⁶ Yesus ava tantere ashi, "Vinke muna kutjira, anwe va lipuro lya lididi?" Makura ghuye ashapuka ntani aharukiri mpepo na lifuta. Mpopo tupu lifuta ali kutura teyete.

²⁷ Varume navantje avatetuka, ava ghamba ashi, "Muntu munke ghuno, nampili mpepo na lifuta kulimburukwa kukwendi?"

²⁸ Yesus opo akatikire musheli munya ya lidiva mu shirongo shaGadarena, vaka fumu vavili ovo vakalire nampepo dadidona avaya kukwendi vamu kondawire. Vavo kwa rupukire vatunde mumayendo ntani vavo kwa kalire shiponga unene, kwato ogho kayendango apite oyo ndjira. ²⁹ Tupu vamumona, vavo ava tameke kulira kumwe nakughamba ashi, "Natwe nove panke nka vitu tunda, ove Mona Karunga? Ove kunaya ghuya tuhepeke shasho shirugho shetu sha hana kutikamo ndi?" ³⁰ Ghutanga wa vinguru vyavi yingi vyavyo kuna kara mumalyero, pepi tupu no po vakalire.

³¹ Mpepo dadidona adi shungida Yesus kumwe naku ghamba ashi, "Nkene kughutu tjida tutundemo muno, tushuve ngoli tungene mu utanga wavinguru."

³² Yesus aghamba ashi, "Ka yendenu!" Mpepo dadidona adirupukamo makura adi kangena mu utanga wa vinguru; vamonako tupu utanga wavi nguru na untje kuna kuduka vingene mulidiva makura navintje avi fu kumema. ³³ Vashita va vinguru ava duka vakayende makura ava katapa mbudi mu Shitata kuhamena ovyo vya shorokiro navintje, ntani navyo vya shorokiliro vano vakafumu vakaliro nampepo dadidona. ³⁴ Makura, vantu vamu shitata navantje ava yendi kwa Yesus. Opo vaka muwanine vamumone, makura ava mukanderere atunde mushirongo shavo.