¹ Makura Jesus ayi mutwara Mpepo ya Karunga mumburundu aka kare mumasheteko gha Satana. ² Ghuye kwa kalire mulidililiro ghure wa mayuva dimurongo-ne na matiku dimurongo-ne, ndjara ayi mukwata unene. ³ Musheteki aya kukwendi kumwe nakugha ashi, "Nkene shi ove Mona Karunga, tantera oghano mawe ghaku tjindje akare mboroto." ⁴ Ano ngoli Jesus amulimburura kumwe nakughamba ashi, "Matjangwa kwatanta ashi, 'Muntu nakuvhurashi kuparuka kumbororto pentjayo, nane ngoli na kehe yino nkango yakutunda mukanwa kaKarunga." ⁵ Makura Satana amutwara kushitata sha kupongoka aka mutura pawiru-wiru yaNtembeli, ⁶ makura amutantere ashi, "Nkene shi vya ushili ove Mona Karunga, vatuka ghuyende palivhu, matjangwa kwa tanta ashi, 'Ghuye ndi ngatuma vaEngeli vendi vakukaure; ntani 'Vavo ngava kudamuna mumaghoko ghavo, ngaghupire kulyata na kupunduka mpadi doye mu liwe.'" ⁷ Jesus alimburura kumwe nakughamba ashi, "Waro, matjangwa kwatanta ashi, 'Nakuvhurashi kusheteka Hompa Karunga ghoye.'"

⁸ Waro, Satana amudamuna amutwara kuwiru-wiru yandundu yayire unene makura aka muneyeda maghuntungi naghantje ghamu udjuni kumwe namfumwa naghuyerere wamo. ⁹ Ghuye amutantere ashi, "Limona nalintje lino ndi nganu litapa kukoye, nkene tupu ghutongamena pangoro doye ove ghuraperere kukwande." ¹⁰ Makura Jesus aghamba naku mutantera ashi, "Yenda tundapo pano, Satana! Matjangwa kwatanta ashi, 'Wakona kukarera nakutongamena Hompa Karunga ghoye pentjendi ti." ¹¹ Makura Satana atundupo papendi amushuvu, makura vaEngeli avaya kukwendi vamukwafe.

¹² Jesus opo ayuvhire ashi Johanes vana mukwata mudorongo, makura ghuye atundumo ayende kuGalileya. ¹³ Ghuye kwa tundire muNasareti ayende aka tunge muKaperenimu, kuntere ya lifuta lyaGalileya mulivhango lyaSebuloni na Nafutali. ¹⁴ Vino kwashorokire mposhi ditikiliremo nkango odo aghambire muporofete Jesaya ashi, ¹⁷ Kutunda pashirugho osho Jesus atameke kuyuvita mbudi kumwe nakughamba ashi, "Kushighurenu muwapukurure ghukaro wenu, untungi waliwiru pepi ghuna kara."

¹⁸ Jesus ghuye kuna kuyenda kuntere yalidiva lyaGalileya, a mono varume vaviri, Simoni ogho kava twenyanga ashi Petrusi, kumwe namughunyendi Andrias, vavo kuna kuteya likwe vahuge mulikurudiva, vavo kwa kalire vashakangcongco - ndi vakwati ntjwi. ¹⁹ Jesus aghamba naku vatantere ashi, "Yenu, munkwame, ame nganu mutura mukare vakwati vavantu." ²⁰ Makura vavo ava shuvu makwe ghavo ava mukwama.

²¹ Jesus tupu atunda pano palivhango akayende amono nka varume vaviri, Jakopu na Johanesi, vantu namu nyendi vana vaZebede. Vavo kuna kara muwato kumwe na shovo Zebede kuna kuwapeka likwe lyavo. Ghuye ava yita vaye kukwendi, ²² vavo kapi vakukata-kata kushuva wato kumwe nashavo va kwame Jesus.

²³ Jesus kayendauranga mushirongo shaGalileya nashintje, kumwe nakuronga muSinagoge davo, na kuyuvita Mbudi ya Ruhafo ya untungi wa liwiru, kumwe nakuverura maghuvera naghantje ghaku ku shuva-shuva mukatji kavantu. ²⁴ Mbudi yakuhamena Jesus ayi kuhanene nakuntje dogoro kuSiriya, makura vantu ava yita vaveli vakukushuva-shuva nava vavironda, vampepo dadidona, vingondwe na virema navi puru-puru. Jesus kaveruranga navantje. ²⁵ Mbunga na mbunga yayinene kayi mukwamango ya kutunda kuGalileya, kuDekapolisi, kuJerusalema, na kuJudeya, vamwe kuvindaka mukuro waJorodani vatunde musheli.