¹ Jesus arupuka muntembeli aka yende. Makura varongwa vendi ava ya kukwendi ava ya muneyeda matunho gha Ntembeli. ² Ano ngoli Jesus ava limburura na kuvatantera ashi, "Ovino navintje muna kumona? Kuna kumutantera ghushili ashi, kwato nampili liwe limwe tupu olyo ngalihuparo pantunda ya mawe olyo ngava pira kuyungurura ngali pire kubomauka."

³ Kutunda po Jesus ayendi aka shungire pakatji kandundu da ma ghuywe, varongwa vendi ava ya kukwendi mukahore-hore pa pentjavo ava pura Jesus ashi, "Tutantere, shirugho munke ngavishoroka vyene vino? Viyivito munke ovyo ngavi neyedo ashi pepi ghuna kara ntani tutantere viyivito ovyo ngavi neyedo ashi ghuhura wa udjuni pepi unakara?"

⁴ Jesus ava limburura kumwe na kuva tantera ashi, "Karenu muna vangara mposhi kapishi ngava mupukite ngava mushuve muliyome. ⁵ Mbyovyoshi, vavangi ngavaya mulidina lyande. Vavo ngava yaghamba na kukukitaghukira ashi, Ame Kristus,' mposhi ngava tware vantu vavangi muliyome." ⁶ Anwe ngamuyuvha vita na marapoto ghaku kutjoka-tjoka. Anwe karenu muna vangara kapishi ngamu kare naghoma, ovino navintje vina hepa kushoroka; ano ngoli shimpe kapishi ngo uhura wa udjuni. ⁷ Mbyovyoshi dimuhoko ngadi kulimba-limba ntani virongo navyo ngavi kulimba-limba. Ngakukara lirumbu na likankamo livhu kuma vhango ghakuku shuva-shuva. ⁸ Ovino navintje mbyo ngavi hovo pa kutanga kwa udito wa unene.

⁹ Ntani anwe ngava kwata ngava kamuhepeke mwamudona ntani ngava kamudipaya. Anwe ngava kamunyenga mudimuhoko nadintje mukonda ya lidina lyande. ¹⁰ Vavangi ngava puka vatunde mulipuro, vavo ngava kurapota-rapota kumwe na kukunyenga-nyenga vene na vene. ¹¹ Ntani nka ngapa shoroka vaporofete vavi mpempa ovo ngava pukito vantu vavangi. ¹² Mukondashi urunde ngaghu vhuka unene, shihoro sha vantu vavangi ngashi kara shina tende. ¹³ Ano ngoli ogho ngakaro na lididimiko dogoro ku ghuhura ndje ngaka paruko. ¹⁴ Ano ngoli yino Mbudi ya Ruhafo ya Untungi wa Karunga vana hepa kuyi yuvita mu udjuni mudima na untje kayi kare umbangi ku dimuhoko na dintje. Ntani nga kukakwama uhura wa udjuni.

¹⁵ Ntani nka, ngamu mona urunde wa udona mulivhango lya kupongoka, ogho aghambire muporofete Daniel" (Ogho ngavi varuro nga kwate lighano), ¹⁶ "Makura ovo vakaro mu Judeya ngamu dukire kundundu, ¹⁷ kehe uno nga karo pawiru ya ndjugho kapishi nga vyuke aka ngene mundjugho aka damunemo kehe shino, ¹⁸ ntani kehe uno ngakaro mulifuva kapishi ngavyuke ko kumundi akashimbe shikoverero shendi. ¹⁹ Ngoli Vitanga kovo vanakaro navanuke ntani kovo vana kuyamweko vakeke mumayuva ogho! ²⁰ Rapererenu ashi Ndira yenu kapishi ngayi kare pakufu ndi ashi mu Sabata. ²¹ Pa weno ngapakara lihepeko lyalinene, yira momu vya dira kushoroka kuntamekero ya Udjuni dogoro weno, hawee, ndi ashi ngavikara ko nka. ²² Nkwandi mayuva ogho vaghafupipita, kudereko rutu ngava yowora. Ngoli mukonda yavo vatoghorora mayuva ogho ngava ghafupipita.

²³ Nange ghumwe aghamba kukwenu ashi, 'Kengenu, Kristusa ndje ghuno! ndi po, 'Kristusa ghunya!' mwashavipura. ²⁴ Va Kristusa na vaPorofete vavimpempa ngavaya nakuya negheda viyivito na vitetu, mposhi vamupukite, nangeshi mpito po, nampili mbovo vatoghorora. ²⁵ Monenu, namutantera kare vino kughuto wa ruvede. ²⁶ Mpo ngoli ashi, ntjeneshi ava mutantere ashi, 'Kengenu, ghuye mumburundu anakara.' mwasha yenda mo mumburundu. Ndi ashi, 'Monenu, ghuye munda anakara,' mwasha vipura. ²⁷ Yira moomu tupu rwavemanga ruvadi nakutwedera kutundilira kuUpumeyuva dogoro kuUtokero, omo mo ngoli ngalikara limoneko lya Mona Muntu. ²⁸ Kehe kuno vyakara vikorama vya kufa, makuvi nayo nko kwakuponga nkooko.

²⁹ Makura kunyima ya maseteko wo liyuva ngali sovagana, ka kwedi kapi ngaka tapa ukenu wako, ntungwedi ngadiwan kuliwiru, ntani ghuna nkondo wo liwiru nga wu kunyunganga. ³⁰ Makura vi yivito vya Mona Muntu nga vimoneka kuwiru, ntani dimuhoko nadintje do pa livhu nga dikara muruguvo. Ngava mumona Mona Muntu kuna kuya pamaremo muliwiru naghu nankondo na ghuyerere. ³¹ Ngatuma va Engeli vendi na rumbendo rwakudameka, makura ngava pongayike vatohoroli vendi kutundilira kumavava ma ne, dogoro nkoko lya shayera liwiru.

³² "Kusongerenuko sirongwa kusitondo sa Ukuyu. Nange tupu asi dimutavi adi vareke kushokera na ku kukumuka mahako, kare kauyiva asi kurombo pepi. ³³ Nka waro, nangesi amumono navintje vino, yivenu ashi pepi ana kara, na livero. ³⁴ Ushili nakumutantera ashi, muhoko ghuno kapi ngaghupita dogoro vininke navintje vino ngavishoroko. ³⁵ Liwiru na livhu ngavidongonoka po, ene ngoli nkango yande kapi kayidongonoka po.

³⁶ Vya kuhamena kuliyuva olyo ndi ashi Vili kundereko ghumwe wakuviyuva, nampili va engeli vamuliwiru, ndi po ashi Mona, ngoli Vashe pentjavo. ³⁷ Yira moomu tupu a kalire ko mayuva gha Nowa, mo nka ngoli ngaya Mona Muntu. ³⁸ Mumayuva ghanya kumeho yaruhandjo kava lyanga na kunwa, nakukwara nakukukwareka dogoro liyuva olyo Nowa angenine mulikepa, ³⁹ kapi vayivire vintu dogoro ruhandjo aruya ruya vapepure po- mo ngoli ngalikara limoneko lya Mona Muntu. ⁴⁰ Vakafumu va viri ngavakara mulifuva- ghumwe ngava mughupa po, ano umwe ngava musuva po. ⁴¹ Vakamali vaviri ngava vakweya nalihina-ghumwe ngava mughupa po ano umwe ngava musuva po. ⁴² Mpo ngoli asi karenu muna vangarara, mbyevi si kapi muyiva liyuva olyo ngaya Hompa. ⁴³ Ngoli yive vino, muhona wamundi ashi ndi ayivire asi ruvede munke aya muwidi, ndi akalire mulikeverero mposi muwidi kapishi avhure kungena mo. ⁴⁴ Mpo ngoli asi, nanwe si karenu muna vangarara, Mona Muntu nga vhura kuya kehe yino vili una diri kutaterera.

⁴⁵ "Are po ngoli wamughushili na mukareli was mukotoki owo atulire muhona mumundi wendi mposi ava pe ndya paruvede runawapero? ⁴⁶ mutungikwa ndje wo mukareli nga ya wana muhona kuna kuruwana ovyo apa ngaya. ⁴⁷ Usili nakumutantera asi, muhona ngaya mutura pakehe sininke ayiva. ⁴⁸ Enne ngoli nangesi mukareli wo mudona aghamba mu mutjima wendi asi, 'Muhona wande akuranga,' ⁴⁹ makura atameke kurwanita vakareli vaunyendi, na ku kulya na kunwa nava nkorwe, ⁵⁰ makura muhona wa mukareli unya nga ya mu liyuva olyo ana dili kutaterera na vili oyo ana dili kuyiva. ⁵¹ Muhona wendi ngamutetaura mughudidi na kumutura mulivega kumwe nava vakuvikutura, oku ngava vhura kulira naku kukwetja mayegho.