¹ Apa Jesusa ntani navarongwa vendi apa vatikire muJerusalema ntani avaya kuBathpage, kundundu ya Maghuywe, makura Jesusa atumu varongwa vaviri, ² a ghamba kwavo ashi, "Yendenu mumukunda wakukwamako, kumukawana shidongi vana mangerere kunya, ntani shidongighona shina karopo. Kavimangununenu makura mukaviyite kwande. ³ Ntjene mpwali ogho akaghambo kehe vino kwenu kuhamena kwvyo, mukaghambe ashi,' Hompa ana vishano' ntani ogho muntu mpo ngoli akamutuma mukaye navyo.

⁴ Vino kwayire kuhamena ashi ovyo vaghambire kupitira mumuporofete vitikiliremo. Ghuye a ghamba ashi, ⁵ "Tanterenu Mona Siyoni wamukadona, kenga Hompa ghoye kuna kuya koye, kuna kukudidipita ntani nakuyendera pa shidongi-pashidongighona, shidongighona mona washidongi."

⁶ Makura varongwa avayendi nakarughuna ovyo ava nangwilire Jesusa. ⁷ Vakayitire shidongi ntani nashidongighona makura ava tura vyuma vyavo pavyo, Jesusa makura ashungiri pavyuma. ⁸ Hambara mbunga nayintje vayalire vikoverero vyavo mushitaghura, ntani vamwe vatetire dimutavi kuvitondo makura avaviyara mushitaura. ⁹ Makura mbunga oyo yayendiro kumeho yaJesusa ntani novo vamukwamino vayiyilire, "Hosiyana kwa mona David! munalirago ogho ana kuyo mulidina lya Hompa! Hosiyana yakuwiruwiru!"

¹⁰ Jesusa apa ayire muJerusalema, vitata navintje vyavagumine nakughamba, "Are ghuno?"

¹¹ Mbunga ayi limburura, "ghuno ndje Jesusa muporofete waku NAZARETA muGalilea."

¹² Makura Jesusa a ngene muntembeli. Ghuye a tjida ovo vayitiro ntani novo vaghulitiro muntembeli, ntani agandanga ntishe dava tjindji maliva ntani navipuna ovyo vaghulitiro vankutji. ¹³ A ghamba kwavo, "Vavitjanga, 'Ndjugho yande ngava yitwenya ashi ndjugho ya ndapero' ano ngoli muna yitura yikare yava widi."

¹⁴ Makura vitwiku ntani virema avaya kwendi muntembeli, makura ghuye avaverura.

¹⁵ Ano ngoli vapristeli va akurona ntani valirongi matjangwa apa vamonine vininke vyaviwa vino arughanine, ntani apa vayuvire vanuke kuna kuyighira muntembeli ntani nakughamba, "Hosiyana kwa mona David," vavo ava garapa ghunene.

¹⁶ Ava ghamba kwendi, "Kuna kuyuva ovyo vana kughamba?" Jesusa a ghamba kwavo ashi, Nhii! Ano ngoli kapi mwavarunga ndi, Mukanwa kavanuke ntani vakeke mawapayikire lishamberero?"

¹⁷ Makura Jesusa avashuvu ntani atundumo mushitata ayende kuBethani akakaremo matiku ghanya.

¹⁸ Ngura-ngura apa avyukire mushitata, ayuvire ndjara. ¹⁹ Amono shitondo sha ghukuyu kuntere yashitaura, ghuye ayendi kwasho navimweshi akawanineko nkwandi mahako tupu, ghuye a ghamba kwasho;" Narumweshi ngakukara nyango koye nka," mpopo shitondo shaghukuyu ashikukuta.

²⁰ Varongwa vendi apa vavimonine, avatetuka ntani nakughamba, "Weni omo shitondo shaghukuyu shina kukuta ntantani weno?"

²¹ Jesusa avalimburura nakughamba kwavo, "Ghushili nakumutantera, ntjene mwakara nalipuro ntani mwahana mashinganyeko, kapi murughana tupu ovyo vina shoroko kushitondo shaghukuyu shino, nani ngoli kuvura mughambe kundundu yino, 'Damuka ghuka tentame mulifuta; makura vyavyo kushoroka. ²² Kehe vino muromba mundapero, kukara nalipuro, ngamu viwana."

²³ Jesusa apa ayire muntembeli, Vapristeli vavakurona ntani vakurona vavantu avaya kwendi ghuye kuna kushonga, makura ava ghamba, "Nankondo munke warughananga vivnke vino, ntani are akupo ghunankondo?"

²⁴ Jesusa avalimbura nakughamba kwavo, "Name kuni mupura lipuro limwe. Ntjene muntantera, kuni mutantera ghunankondo ogho narughanitanga vininke vino. ²⁵ Liyoyero lya Johanesa-kuni lyatunda? "Muliwiru ndi kwatunda kuvantu?" Ava kuyongo mukatji kavo, nakughamba, Ntjene tughambe ashi, 'Kwatunda muliwiru; kwaghamba kwetu, ashi, Vinke ngoli mwadilire kumupura?' ²⁶ Ano ngoli ntjene tughamba, ashi, "Kwatunda kuvantu', tuna tjira mbunga mukonda ashi navantje vamuyiva Johanesa ashi muporofete." ²⁷ Makura ava mulimburrura Jesusa nakughambva ashi, Kapi twaviyiva." Naye aghamba kukwavo," Nameshi kapi nimutantera ghunankondo narughanitanga vininke vino.

²⁸ Ano ngoli vinke muna kughamba? Mukafumu akaro na vana vendi vavamati vaviri. Ayendi kwaghu wakuhova ntani nakughamba, 'Monande, yenda ghukarughane namuntji mushikunino sha vinyu.'

²⁹ Makura monendi alimburura nakughamba ashi, 'kapi niyendako; ano ngoli kunyima atjindji ndunge dendi makura ayendi."

³⁰ Makura mukafumu ayendi kwamonendi waghuviri nakaghamba vyakukufana. Ghuye alimburura na kughamba, "Kuniyenda, mukalikuto", ano ngoli kapi ayendireko. ³¹ Arepo pavana vano vaviri arughanino mpangera yavashe? Avaghamba, "wakuhova." Jesusa aghamba kukwavo, "Vyaghushili naku mutantera, vafutiti mutero ntani varushonda ngava kangena mughuntungi waKarunga kumeho yenu. ³² Johanesa kwaya kwenu muntjira ya ghuhungami, ano ngoli anwe kapi mwamupura. Ano ngoli vafutiti mutero ntani nava varushondavavo vamupura. Ngoli anwe, nampili apa muna mono vino kapi muna kushighura kunyima, ntani nakumupura.

³³ "Teghererenu nka kushifanikito shimwe. Kwakalire mukafumu, mwenya livango. Ghuye akunu shipata sha vhinyu, aturako ngumbu, atimimo shikameno vhinyu, adikilimo kandjugho, ntani a hilita kuvana shikunino. ³⁴ Makura ayendi mushirongo shapeke. Apa rwatikiremo ruvede rwakuyangura nyango, ghuye atumu vakareli vamwe kuvana shikunino vakashimbe nyango dendi. ³⁵ Ano ngoli vana shikunino avaghupu vakareli vendi, ava toghonapo ghumwe, avadipaghapo ghumwe nka, ntani ava toghonapo nka ghumwe wavo. ³⁶ Shimpe nka mwenya shikunino atumu vakareli vamwe, vavangi kupitakana vakuhova, ano ngoli vana shikunino ava kavarughana mundjira yakukufana. ³⁷ Kunyima, muna shikunino atumu Mona wanaghumwendi kwavo, nakughamba, 'Kuva kafumadeka monande.'

³⁸ Ano ngoli vana shikunino sps vsmonine monendi, ava ghamba mukatji kavo, 'Ghuno ndje mupingi. Yiya, tokwenu tumudipaghe ntani tughupa ghupingwa.' ³⁹ Makura ava mughupu, ava muvhukumine pandje ya shikunino sha vhinyu ntani ava mudipagha. ⁴⁰ Makura ngoli apa aya mwenya shikunino, vinke aya rugha kuvana shikunino?"

⁴¹ Vavo ava ghamba kwendi, Ghuye kwaya djonaghura vantu vavadona mundjira yayidona, ntani ghuye makura ngaya hilita shikunino sha vhinyu kuvana shikunino vamwe, vantu ovo ngava mupoko muyangiu pa shirugho shakuyangura."

⁴² Jesusa aghamba kwavo, "Kapi mwavaruranga mumatjangwa', 'Liwe olyo vashwenine vatungi kwalitura likare liwe lyamuhuka. Vino kwatundire kwaKompa, ntani vyavyo viwa ghunene mumantjo ghenu?'

⁴³ Mpo ngoli nakumutantera, ghuntungi waKarunga ngava ghumughupa anwe ntani ngava ghutapa kumuhoko ogho wayimango viyimwa. ⁴⁴ Kehe ghuno awero paliwe ngatjoka-ghuka papadidi. Ano ngoli kehe ghuno ngaliwera ngali mumyona."

⁴⁵ Vapristeli va akurona ntani Vafalisayi apa vayuvire shifanikito shino, vavikwatire lighano ashi ghuye kwaghambire kuhamena kwavo. ⁴⁶ Avapapara vamukwate, vavo vatjilire mbunga, mukonda vantu vamutulire ashi ghuye muporofete.