¹ Mbapira yo ntampuko ya Jesus Kristus, mona David, mona Abraham. ² Abraham kwa kalire vase va Isak, ntani Isak vase vaJakob, ntani Jakob vase vaJuda ntani nava wuni vendi. ³ Juda kwa kalire vase vaPerez na Zera va Tamar, Perez vase vaHesroni, ntani Hesroni vase vaRam. ⁴ Ram kwa kalire vase va Amminadab, Amminadab vase vaNashshon, ntani Nahshon vase va Salomon. ⁵ Salomon kwa kalire vase vaBoaz wa Rahab, Boaz vase va Obed wavo na Rutu, Obed vase va Jessi. ⁶ Jessi kwa kalire vase va David waHompa, David vase va Solomon ko mukamali wendi Uriah. ⁷ Solomon kwa kalire vase va Rehoboam, Rehoboam vase va Abijah, Abijah vase va Asa. ⁸ Asa kwa kalire vase va Jehoshaphat, Jehoshaphat vase va Joram, ntani Joram mudimu wa Uzzia. ⁹ Uzzia kwa kalire vase va Jotham, Jotham vase va Ahaz, Ahaz vase va Hesekiya. ¹⁰ Hesekiya kwa kalire vase va Manasseh, Manasseh vase va Amon, ntani Amon vase va Josiah. ¹¹ Josiah kwa kalire va nyakulya va Jekonia ntani no vauni vendi pa siruwo salidiruko ku Babilon.

¹² Kutunda pa lidirukiro ku Babilon, Jekonia kwa ka kalire vase vaSealtiel, Sealtiel kwa kalire mudimu wa Zerubbabel. ¹³ Zerubbabel kwa kalire vase va Aliud, Abiud vase va Eliakim, ntani Eliakim vase va Azo. ¹⁴ Azo kwa kalire vase va Zadok, Zodak vase va Achim, ntani Achim vase va Eliud. ¹⁵ Eliud kwa kalire vase va Eliza, Eliza vase va Matan vase va Jkob. ¹⁶ Jakob kwa kalire vase va Josef vya Maria, owo a sampurukiro Jesus, owo vatwenyanga si Kristus.

¹⁷ Ruvharo naruntje kutunda kwa Abraham dogoro kwa David kwa kalire maruvharo ronane, kutunda kwa David dogoro kulidiruko lyo ku Babilon maruvharo ronane, ntani kutunda kulidiruko lyo ku Babilon dogoro kwa Kristus maruvharo ronane.

¹⁸ Lisampuruko lya Jesus Kristus kwa sorokilire mundjira dino dina ka kwamoko. Vawina, Maria, kwava vandikilire va kware Josef, enne ngoli kumeho vakalire kumwe, kwa wanine uye lira ku Mpepo yo kupongoka. ¹⁹ Enne ngoli Josef, nturaumbo yendi, murume wo muhungami ntani kapi a sanine ku mu swaukita kumeho ya kehe uno, uye kwa hayalire ku mukomba mu kahorehore. ²⁰ Apa a hayalire kuhamena vininke vino, muEngeli waHompa a moneke kwendi mundjodi, nokumutantera asi, "'Josef mona David, kapisi utjire ku upa Maria akare mukamali woye, mukonda asi evi vinakaro mwendi kuna tundu kuMpepo yoKupongoka. ²¹ Uye nga sampuruka mwanuke wo mumati, ntani ngau muruke lidina lyendi Jesus, uye nga popera vantu vendi kundjo davo. ²² Navintje vino kwa sorokire mukutikitamo ovyo a ghambire Hompa kupitira muPorofete, mukughamba asi, ²³ "Kenga, mukamali a diro ku kara rumwe na mukafumu ngakara nalira ntani nga wana mwanuke wo mumati, ntani ngava kuwa lidina lyendi Immanuel" - olyo ngava toroka asi, "Karunga natwe ana kara." ²⁴ Josef a rambuka muturo twendi ntani aruwana mbyo vyo amu rawilire muEngeli wa Hompa, naku muupa a kare mukamali wendi. ²⁵ Enne ngoli kapi amuyivire dogoro awanine mwanuke womumati. makura a muruku lidina Jesus.