¹ Ushibindelee, na kokwe ushichwe ubindelwa. ² Wa buhuchi boli huambilana, na kokwe wiambilwa. Lubada loli huhana noo lolihelwe bioka biya. ³ Yulu yaai ulihulola ibandu ya ntee mliso lia mshiwenyu, ushi humona ihindi ya ntee ili mliso liobe? ⁴ Wii msambila bihi mshiwenyu, peembee nuuhunye ibandu mliso liobe, na mndi mliso lyiobe muli ihindi ya mtee? ⁵ Lububa umeso kokwe, tula uhunyaa ihindi ya ntee mliso liobe naa hulioosha uhunya ibandu mliso lia mshiwenyu.

⁶ Nangu uhaa awaa bya ugengeda, na nangu utelela ngulube bitu byuungema mbele kiabo, bashibikiatile na makulu mabo, chukaluile na uuchika.

⁷ Sabwe, nabenywe wiihewa, engwe, nabenywe mwimona; Okolwe, na benywe mwibukulilwa. ⁸ Yulu kese kuli husaba kusuuhewa; na kese kulihuenga kusuumona; na kesu kusuokola kwibukulilwa.

⁹ Nanyi kwenyu, mwanake kwahuusaba nkate, kweema lewe? ¹⁰ Ao kwahuusaba swee, kwima ndoa? ¹¹ Wa bibyio, benwe babi mgidii ubaha bana benyu bitundu bisoka, ati! Senyu kwa hekulu kwiima bitundu bya bibenju baya bene bali huumsaba?

¹² Wa bibyio, wahubenja batu bwiitile bia bibenju, na kokwe ubaitile bioka bia; Yulu kikio noo mpendo na bibulee.

¹³ Gingilwe uhitila mchango kwa kuchokucho. Mchango kwata na ndila kiata kulihukwa uu lubu, batu bengi noo bali hukikila. ¹⁴ Mchango kuchokucho, na ndila kichokicho kilihukyia umweko, na balihukimona ii bacho.

¹⁵ Lilolwe na bibuli bia lulimi, balihumchila ba chwala bibambi bya mioo, mnda ii luili lwa buhuchi. ¹⁶ Wa biguma biabo mwibamana. Batu banahomba mizabibu uu mikwa, miti kia saa uu miti kia bululu? ¹⁷ Wa bibyio, miti kibenju bikuma bibenju, na miti kibii bikuma bibii. ¹⁸ Miti kibenju kushi naho bikuma bibii, na miti kubii uhaa bikuma bibenju. ¹⁹ Mti kokose kushiha bikuma bibenju kwikechwa na utelwa waahyia. ²⁰ Wa bikuma biabo bimanyia.

²¹ Kushi kila mtu kwingita, mlume, mlume, kwikingila mbuolo bwa hekulu ii baya bali huita bilii hubenja tata kwa hekulu. ²² Bengi biisambila liya chuba, mlume, mlume tushibuile wa china liobe, uhunya mnaka wa china liobe, wa china liobe tuitile bisaga byata? ²³ Na nene nibasambila hululu, humwe wanyi, nishibakidi, benywe bakichi ba bubi.

²⁴ Kekese, mine kwihulicha binywa byanyi na ubikila kwilingilishiwa na mtu mine kwina malango kukuba ndu kwake hekulu ha liwe. ²⁵ Mbula kinyene, mmua koo nuuchwa, mnaka nuuchwa ulunga kikio ndu, kishikuile hasi, bululi kikubewe hekulu ha liwe. ²⁶ Mtu kekese kulihuhulicha inywa yanyi nanguukila, kwilingilichiwa na mtu mmuki kuhubaile ndu kwake uii isee. ²⁷ Mbula kinyene, mmua kuchuile, mnaka koo nuuchua ulunga kikio ndu. Na ugua wakio ubele ubii.

²⁸ Machuile mengo Yesu hehuile udokoma, ihichiya batu baakakilwe na ukikia wake. ²⁹ Bululi kukikiche nahi mtu mine kuima uoma, nangu nahi mkochi kwabo.