¹ Hanyuma ha ubuswa wa Yesu uya Betelehemu kya Bayuda masuku ma olo Herode, batu ba balikikye uhuma koo mlukulu bahiile Yelusalemu. ² Lili uhi Olo lya Bayahudi line lia buswa? tumonine ambala mbala agee mlukulu na beswe twachwa ukimanina.

³ Hahuliche olo Herode biya kunokeye mtima na ba yelusalemu bose hamwechi nagee. ⁴ Helode noo uongola bibuli biose na ba-gochi ba batu, gee nuubabucha, “Kilisto kwibuswa uhee?” ⁵ Bamsambile, Betelehemu kya Bayuda, bululi bibio noo bikolilwe na ibuli, ⁶ Gokwe Betelehemu esee gya Bayuda ushi mcho mcho mtulombwe twa Ba Yuda, yulu wehuma obe uchwa mine ugwinamina bange ubausa batu banyi Isilaheli!

⁷ Bibyo Herode kubakishile baya ba lwengu wa bubisama na ubabucha ii mengo nahee hemoneye aya ambala mbala. ⁸ Gee noo ubahila Betelehemu, nuukana, “kidakwe na bweenge umenga kuya mwana mine kubushilwe. Hamwimmona, mwachwe upa mwano na nene nakye upungila machwe” ⁹ Hanyuma ha uumulicha olo, bagelelelee na lwendo lwabo, aya ambala mbala ababele humona mlukulu abalombwele na ukia ukimana hene habele mwana mpuswe. ¹⁰ Habamonine ambala mbala, baseelele wa saso lyiata. ¹¹ Bakingile mndu na uummona mwana mine kubushilwe na Maliamu mnage. Bamkinamine na uubungila machwi. Basulile tuhwaba twabo boo noo uma bitundu nolo, buvumba, na aswenge. ¹² Abetcha Pungu oo nubasambila umalo bashikiwile wa Helode, bibio bakiwile ukya wabo mkinge ndila.

¹³ Hanyuma haboo ukia Malaika ma Mlume kumtobwele Yusufu uu malo na ukana, “kimana, ukuhe mwana na mnake msinine Misili. Mwashame ubu mpaka chuba liandiusambila, yulu Helode kulihubenja kahake mwana. ¹⁴ Mpaka bubo busuku Yusufu kubywile na ukuha mwana na mnake noo usinina Misili. ¹⁵ Kushamine uya mpaka biwile Helode. Iyo iwilile iya yine idokomine Mlume kudokomine uhitila eebule, “Uhuma Misili nimkishile mwananyi.” ¹⁶ Hanyuma ha haho Helode kumonine kwabichiwa na balwengu, kushikililwe. Gee noo uhila mmano kwage kuhaka baana bose ba balumiana babele Betelehemu na bose ba mibamba bene babele na miaa kyopi na usala hasi ulamana na maya mengo kushibele mmane abisa uhuma ubaya batu babalikikie. ¹⁷ Haho noo hawilile iya inywa ikaninwe na eebulee Yelemia, ¹⁸ “Lidii lihulichiwe lama, lilo na mihungio kingi, Laeli kulilila bana bake, kuhaminye mmungio yulu bashiho iyaka.

¹⁹ Helode he hwile uwa, lola Malaika ma Mlume kumtobwele Yusufu u malo ubo Misili na ukana, ²⁰ “Kimana ukuhe mwana na mnake, na m'bekiwila msii kya Isilaeli yulu bene babele huenga mweko kwa mwana bahwile uwa.” ²¹ Yusufu kukimene, kukuhile mwana na mnake, kuhiile msii kyia Isilaeli.

²² Helihuliche ukana Alikilao gwa hushama ubuholo bwa Ba Yuda ha nswe kwa sake Helode, kumonine boba ukyia ubo. Hanyuma ha Abetcha Pungu uumsambila uu malo, kukimene na ukia uu mkoba kwa Galilaya, ²³ Kukile ushama m'mbuka kilihukiswa Nazaleti. Iyo ii uwilicha iya yine ihuile ukanywa wa ndila kwa bambuwa, ukana kuikiswa Mnazaleti.